كەيكى باتىردىڭ باس سۇيەگى بۇگىن تاڭعى ساعات 04:50-دە ماسكەۋدەن ارنايى بورتپەن ەلورداعا جەتكىزىلەتىنىن ەستىگەندەر استاناداعى حالىقارالىق اۋەجايعا جينالدى. الايدا، باس سۇيەكتىڭ بۇل ۋاقىتتان بۇرىن ارنايى رەيسپەن جەتكىزىلۋىنە بايلانىستى جينالعان قاۋىم ونى سالتاناتتى تۇردە قارسى الا المادى. بۇل تۋرالى Qamshy.kz قازاقپارات-قا سىلتەمە جاساي وتىرىپ حابارلايدى.
«ءبىزدىڭ ەستىگەن اقپاراتقا سۇيەنسەك، باتىردىڭ باس سۇيەگى ارنايى رەيسپەن كەلىپ جاتىر. وسى ورايدا ەلىمىزدىڭ تانىمال عالىمى، بەلگىلى ەتنوگراف، پروفەسسور نۇرسان ءالىمباي رەسەيدە باس سۇيەكتى قابىلداپ الىپ، ەلگە جەتكىزدى دەپ ەستىدىك. ەندى عالىمدار ارنايى ساراپتاما وتكىزەتىن بولار. باتىر بابانىڭ باس سۇيەگىن سالتاناتتى تۇردە قارسى الۋ كەرەك ەدى، ويتكەنى استانا اۋەجايىنا ەل ازاماتتارى، باتىردىڭ ۇرپاقتارى مەن تۋىستارى كەلدى. بۇل تۇرعىدا كۇندىز ۇكىمەت رەسمي تۇردە ءوز مالىمدەمەسىن جاسايدى دەگەن ويدامىن»، - دەدى ساياساتتانۋشى، قوعام قايراتكەرى بەرىك ءابدىعالي ۇلى.
بۇدان بۇرىن ول فەيسبۋكتەگى پاراقشاسىندا بۇگىن تاڭەرتەڭ 04:50-دە ماسكەۋدەن ارنايى بورتپەن 1916 جىلعى ۇلت-ازاتتىق كوتەرىلىسىنىڭ باتىرى، 1923 جىلى بولشيەۆيكتەر قولىنان قازا تاپقان كەيكى باتىردىڭ باس سۇيەگى اكەلىنەتىنىن حابارلاعان ەدى.
«قازاقستان مەن رەسەي ۇكىمەتتەرى اراسىنداعى ۋاعدالاستىق اياسىندا كەيكىنىڭ باس سۇيەگى جەتكىزىلىپ تۇر. مەنىڭ ەستۋىم بويىنشا ارنايى كوميسسيا قۇرىلىپ، جەرلەۋ ماسەلەسىن قاراستىرادى. سونىمەن قاتار باتىردىڭ ەسىمىن قايتا جاڭعىرتۋعا بايلانىستى ءىس-شارالار قامتىلىپ، الداعى ۋاقىتتا ناقتى قاي وڭىردە جەرلەنەتىنى تالقىعا سالىنادى. ارينە، حالىق پەن باتىردىڭ تۋىستارىنىڭ ويى ەكىگە ءبولىنىپ تۇر. بىرەۋلەر استاناداعى ۇلتتىق پانتەونعا، ال كەيبىرەۋلەر قوستاناي وبلىسىنىڭ امانگەلدى اۋدانىنداعى كەسەنەگە قويىلسا دەگەن تىلەكتەرىن ايتۋدا. وسى رەتتە بۇل ۇسىنىستار قاراستىرىلىپ، ءتيىستى شەشىم قابىلدانادى»، - دەدى ءابدىعالي ۇلى.
ەسكە سالا كەتسەك، رەسەيلىكتەر تاراپىمەن جادىگەردى ەلگە قايتارۋعا كوپ جىلدان بەرى كەلىسسوزدەر جۇرگىزىلدى.