الماتى وبلىسى جامبىل اۋدانىندا وتكەن جەكسەنبىدە جوعالعان مال ساۋداسىمەن اينالىساتىن ءۇش جىگىتتىڭ قايتىس بولعانى بەلگىلى بولدى. ول تۋرالى پوليسيا مارقۇمداردىڭ تۋىستارىنا ەستىرتكەن، - دەپ حابارلايدى Qamshy.kz.

سونداي-اق پوليسيا وسى وقيعاعا قاتىسى بار دەگەن كۇدىكپەن ەكى ادامدى تۇتقىنداعان.

ەستەرىڭىزگە سالساق، 1979 جىلعى دولدان ۇلى جارقىنبەك، 1973 جىلعى زارلىحان ۇلى مۇقيات پەن ءالىمحان قادىلبەك ەسىمدى جىگىتتەر شىعىس قازاقستان وبلىسىنىڭ تارباعاتاي اۋدانىنان 40 باس مال ساتىپ الىپ، ونى ەكى جۇك كولىگىمەن 17 قىركۇيەك، سەنبى كۇنى، الماتى ماڭىنداعى ۇزىناعاش بازارىنا شىعارعان. سودان بەرى تۋىستارى ول ازاماتتاردىڭ ەش حابارىن بىلە الماي، ىزدەۋ سالعان بولاتىن.

كەشە جوعالعان ازاماتتار مال تيەپ كەتكەن ەكى كولىكتىڭ جانە جوعالعان جىگىتتەر بازارعا الىپ شىققان 40 باس ءىرى قارانىڭ 35 باسى تابىلعانى تۋرالى جازعان بولاتىنبىز.