اعامىزدىڭ ۇيىنەن ورالعاندا، مەن وسى كۇنگە دەيىن قىسىلىپ-قىمتىرىلماي، كەڭ-مول تۇرىپ كەلگەن ەسكى پاتەرىمە سىيماي قالدىم. ومىرىمدە العاش رەت ءوزىمنىڭ الگى... ستاتۋسىم تۋرالى ويلادىم.
زەينەتتەگى ادام بولعاسىن، ءىشى پىستى ما، جوق، باسقا سەبەبى بار ما - وسىدان ءبىراز بۇرىن الدەبىر وتىرىستا، الدەبىر سەبەپپەن تانىسىپ قالعان ءبىر اعامىز تەلەفون سوعىپ: "اينالايىن، سەن وسى ءقازىر ۇيگە كەلە قويشى، جەڭگەڭ شاي قامداپ جاتىر... ءاعالى-ىنىلى بولىپ، وڭاشا وتىرىپ، ءبىر سىرلاسايىقشى" دەدى. اعانىڭ ءسوزىن جەرگە تاستاۋعا بولمايدى، ايتىلعان ادرەس بويىنشا، مەن دە كوپ كەشىكپەي، جەتتىم. اعام بيىكتىگى الدەنەشە قۇلاش بولاتىن تاس دۋالدىڭ سىرتىندا، قاقپا الدىندا تۇرىپ قارسى الدى. كىلەمنىڭ ورنەگىندەي قىمبات تاس توسەلگەن، اۋماعى استاناداعى تاۋەلسىزدىك الاڭىنداي بولاتىن ۇشى-قيىرسىز كەڭ اۋلاعا كەلىپ كىرگەندە... مەن ءتىل-اۋىزدان قالدىم!.. الدىمنان... اكروپولدىڭ اق ءمارمار كولوننالارى اسقاقتاپ شىعا كەلگەندەي بولدى... قابىرعالارىن دا، ءسىرا، اق مارمارمەن ارلەپ-كومكەرگەن مىناداي جويداسىز ءتاج-ماxالدى - ءۇي دەپ ايتۋعا اۋىز بارمايدى...
ماڭداي الدىدا، "ءۇيدىڭ" ەڭسەسىن كوككە كوتەرە سامساعان بيىك-بيىك كولوننالاردىڭ تۇبىنە جەتكەنشە، قاناتىن كەڭ جايا، جارتى شەڭبەر بوپ دوعالانا يىلگەن جىپىر-جىپىر قانشاما باسپالداق... تەمىر سۇيەگى قالىڭ ەمەنمەن قاپتالعان جويقىن، اۋىر ەسىكتەن xاننىڭ التىن سارايىنا كىرگەندەي جاسقانشاقتاپ، بۇگەجەكتەي كىردىم. كىشىگىرىم سالتانات زالى ىسپەتتى جارقىراعان ۇلكە-ە-ەن xوللدىڭ كۇمبەز پورىمدى زاڭعار توبەسىنەن التىنداعان شىنجىر ارقاندارعا اسىلىپ، قۇجىناعان xرۋستالدارىمەن سالبىراي تونگەن شاڭىراقتاي-شاڭىراقتاي الىپ ليۋسترالار مەنىڭ بۇل دۇنيەدەگى قانداي كىشكەنتاي، قانداي قوراش ادام ەكەنىمدى ايعاقتاپ، ەڭسەمدى، سالعاننان-اق، ەزىپ تاستادى...
وڭ جاق قيىرداعى سونا-ا-اۋ ەسىكتەن شىعىپ، جىبىرلاي باسىپ، ءبىر كىشكەنتاي ايەل كەلە جاتىر. جەڭگەي سياقتى... جانىمىزعا كەلگەندە، ءبىر-اق بايقادىم - مىنا الاعاي دا بۇلاعاي، ەرەپەيسىز زور، بيىك جاي بار تۇلعاسىن باسىپ، تۇقىرتىپ-قۋسىرىپ تاستاعانى بولماسا، اعامىز سياقتى بويلى-سويلى، ەتجەڭدى-اق كىسى ەكەن... اماندىق-ساۋلىق، تانىستىقتان سوڭ، جەڭگەمىز شاي قامىمەن جاڭاعى شىققان ەسىگىنە قاراي كەتتى دە، اعامىز ماعان ءۇي كورسەتۋگە ىڭعايلاندى.
- ءۇي - وسى... - دەدى اعام، قۇلاشىن جازا، ءۇيدىڭ ىشكى اۋماعىن اينالدىرا نۇسقاپ. مەنىڭ ايران-اسىر بولىپ، ەسىمنەن تانعالى تۇرعانىمدى بايقامادى، الدە، بايقاماعان ءتۇر كورسەتتى. - سول... ەكى مىڭ شارشى مەتردىڭ اينالاسى بولىپ قالار... قولدان كەلگەنى، ازىرشە، وسى بولدى. بالا-شاعانىڭ قامى عوي، باياعى.
- ويباي-اۋ... اعا-اۋ!.. مىناۋ... مىناۋىڭىز - ءۇي ەمەس!.. - دەدىم، ەسىمدى جيىپ. - مىناۋىڭىز... - وپەرا تەاترى عوي!..
اعامنىڭ ءجۇزى نارتتاي قىزارىپ، ءلاززات-ماساتى بەتىنە شىعا، جىميدى.
- وي، سەن دە ايتاسىڭ، ەي، xە-xە... ءجۇر، استىڭعى قاباتتان باستايىق.
استىنا تۇستىك. ودان ۇستىڭگى ءبىر قاباتتارعا شىقتىق. قايتا اينالىپ، جوعارىدان تومەنگە تۇستىك... سوندا دا وسى ۇيدە قانشا قابات بار ەكەنىن ۇقپاي-اق قويدىم. ايتەۋىر، سانسىز كوپ بولمە... جانە ءارقايسىسى مەنىڭ ەكى بولمەلىك ەسكى پاتەرىمدى ءدالىز، بالكون، اس ۇيىمەن قوسىپ العانداعىدان كەڭ!... ءار قاباتتاعى جۋىناتىن، دارەت سىندىراتىن بولمەلەردىڭ ەسەبىنەن جاڭىلدىم!.. ءسىرا، ەشكىم باس سۇقپايتىن ترەناجەر زالى... بيليارد-جاي. ساۋنا، باسسەين... كينوتەاتر. قىسقى ب ا ق، جازعى ب ا ق...
اسىرەسە ەسىمدە قالعانى - اعامنىڭ جەكە سۋرەت گالەرەياسى مەن مۋزىكا بولمەسى. ادام ءوزى باي بولسا، ءوزى زەينەتكەر بولسا، ءسىرا، ەرىگە بەرەدى-اۋ... اعامىزدىڭ، ايتۋىنا قاراعاندا، قىلقالامدى قولىنا العاش الۋى زەينەتكە شىققاننان كەيىن عانا بولسا كەرەك. سالعان سۋرەتتەرىنە قاراعاندا - يمانداي شىنى... قابىرعالارعا جاعالاي ىلىنگەن وڭكەي ءبىر قاباقتارى تۇكسيىپ، ساقالدارى سالبىراعان قورقىنىشتى بەينەلەر... ومىردە يا بولعان، يا بولماعان باتىر، بي، اۋليە اتالارىنىڭ پورترەتتەرى-مىس... جاعال-جاعال شىڭدارىنىڭ ءبىرى ەڭكەيىپ، ەندى ءبىرى شالقاسىنان تۇسە قۇلاعالى تۇرعان سايقىمازاق تاۋلاردىڭ فونىندا تۇتاس تۇرقىمەن بەينەلەنگەن - ءوزىنىڭ مۇباراك ديدارى ەكەنىن اعام ءوزى ايتىپ ۇقتىردى. "تۋعان اۋىل" دەپ اتالاتىن سيكلدى سۋرەتتەر تىزبەگى... سول باياعى قۇلاعالى تۇرعان تاۋلار... جوتاعا ورلەپ بارا جاتقان، الدە، بيىكتەن تومەن سورعالاپ كەلە جاتقان وزەن... اياق-قولدارى دوبالداي، باستارى قاۋعاداي-قاۋعاداي اۋىل ادامدارىنىڭ سۇلباسى... ءار سۋرەتتىڭ جاي-جاپسارىن، ونى سالاردا شابىتىنا نە تۇرتكى بولعانىن تاپتىشتەي بايانداعان اعامنىڭ مەنەن ماقتاۋ كۇتىپ، دامەلەنە قاراعان كوزدەرى...
مۋزىكا زالىنىڭ قاق ورتاسىندا ۇلكەن اق رويال تۇر. اعام قاقپاعىن اشىپ، جالعىز ساۋساقپەن تىڭقىلداتىپ، ءبىر قيۋى قاشقان ءوڭسىز اۋەندى وينادى.
- كەيىنگى شىعارعان ءانىم... "اي-xاي، ءومىر!" دەپ قويدىم اتىن...
- و-و!.. - دەدىم، قاپەلىمدە اۋزىما ءسوز تۇسپەي.
- زەينەتكە شىققالى ون شاقتىسى تۋدى-اۋ... ءبىر بەلگىلى كومپوزيتور وسى ءوزىڭ سياقتى قوناقتا بولىپ، ءبىرازىن نوتاعا دا ءتۇسىردى... مەنى وزدەرىنىڭ شىعارماشىلىق وداعىنا قابىلداۋعا كەپىلدەمە بەرەم دەپ ۋادە ەتىپ ەدى، ازىرگە xابارسىز، - دەپ، اعام ماعان جاڭاعى دامەلى كوزىمەن تاعى دا ءبىرتۇرلى قاراعانداي بولدى.
مەن بۇل شاقىرۋدىڭ ءمانىسىن ەندى تۇسىنگەندەي بولدىم... اعامىز مەنى ءىنىسى بولعانىمنان ەمەس، سۋرەتشى بولعانىم ءۇشىن شاقىرىپتى... جاڭاعى وتىرىك ماقتاعان سوزدەرىمنىڭ جازاسىن ەندى تارتاتىن سياقتىمىن!.. ءبىراق مامان مۋزىكانتتار مەن كاسىبي سۋرەتشىلەردىڭ وداعى بۇل كىسىگە نە ءۇشىن كەرەك - ۇقسام، بۇيىرماسىن...
- مەن، اينالايىن، بىلاي دا، ستاتۋسى جوعارى اداممىن عوي، ءوزىڭ بىلەسىڭ، - دەدى، ول، ويىمداعى سۇراقتى وقىپ تۇرعانداي. - ءبىراق ءوزىن ءوزى سىيلايتىن كىسى ءومىر بويى ءوزىنىڭ قوعامدىق مارتەبەسىن كوتەرۋمەن اينالىسۋى كەرەك... كەرەك تاستىڭ اۋىرلىعى جوق دەپ، وسىندايدا ايتادى... جارايدى، شارشاعان شىعارسىڭ، - دەدى سوسىن، ارقامنان قاعىپ. - قوناق بولمەگە بارايىق، جەڭگەڭ كۇتىپ قالدى.
تۇقىرعان ەڭسەم ءبىرجولا جەر بولىپ، مىجىرايىپ، اعاممەن بىرگە اۋماعى اجەپتاۋىر كونسەرت زالىنداي قوناق بولمەگە كىردىم. بۇل بولمەنىڭ ءسان-سالتاناتىن باعالاۋعا مەندە بۇل كەزدە شاما دا قالماعان. ايتەۋىر انا قيىردان مىنا قيىرعا سوزىلىپ جاتقان الاپات ۇستەلدىڭ ءبىر بۇرىشىندا قۋشيىپ وتىرىپ، ۇشەۋمىز شاي ىشتىك.
- قورىقپايسىزدار ما؟.. - دەيمىن، ءۇي ىشىندەگى مۇلگىگەن جىم-جىرت، قۇلازىعان وراسان بوس كەڭىستىككە شوشىنا قاراپ.
- نەدەن قورقامىز؟!.. - دەدى اعام، تۇسىنىڭكىرەمەي.
- ءۇي بولسا - مىناۋ... ىشىندە ادام اداسىپ كەتەردەي!.. جەڭگەي ەكەۋىڭىز عانا...
اعامىزدىڭ الدىڭعى اڭگىمەلەرىنەن بۇل ۇيگە بالالارى جىل ارالاتىپ قانا سوعاتىنىن بىلگەم. قىزى - تۇرمىستا. ۇلى ءبىرجولا شەتەلگە ورنىققان ەكەن. ءۇيلى-باراندى كورىنەدى...
- نەگە ەكەۋمىز عانا؟ - دەدى اعامىز، القىمى، قارنى شامادان تىس جۋان ادامداردىڭ ادەتىمەن، جوتەلگەنى، يا كۇلگەنى بەلگىسىز، ىرق-ىرق ەتىپ. - كۇتۋشىلەرىمىز كۇندە وسىندا عوي. جاڭا قاقپادان كىرگەندە بايقامادىڭ با كۇزەتشى تۇرعانىن؟.. ءقازىر سانتەxنيكتەر دە كەلىپ قالار...
- سانتەxنيكتەر؟..
- ءيا... قۇدايدىڭ قۇتتى كۇنى وسىندا ولار... بۇل ۇيدە جۋىناتىن ون سەگىز بولمە، ون سەگىز دارەتxانا بار، - دەدى اعام، ءسال كەيىگەندەي داۋىسپەن. - ۇدايى پايدالانىپ، كۇندە سۋ اعىزىپ تۇرماعاسىن، ول شىركىندەر قاڭسىپ، شەتىنەن ىستەن شىعا بەرەدى ەكەن. بۇگىن بىرەۋىن جوندەپ كەتسە، ەرتەڭ ەكەۋى دايىن تۇرادى... جىل ون ەكى اي - وسى!..
- وندا نەگە... وسىنشا ۇلكەن سالدىڭىز ءۇيدى؟.. - دەدىم مەن، ەندى شىن تاڭىرقاپ، ءارى،... ءبىر جاعى، جانىم دا اشىپ. - بالالارىڭىز، نەمەرە-جيەندەرىڭىز تۇگەل كەلىپ، جايلاسا دا، وسى ءۇيدىڭ وننان ءبىرى-اق ولارعا كەڭ جايلاۋ ەمەس پە ەدى؟!.
اعام اۋىر ىڭىرانىپ، قىرق-قىرق جوتكىرىندى. جۇزىندە جاڭاعى رەنىشتەن ءىز دە قالمادى. بايسالدى، سالماقتى، ءتىپتى ءبىر اسقارالى-سالتاناتتى كەيىپپەن:
- ەندى... حالىقتىڭ ادامىمىز دەگەندەي... دوس بار، دۇشپان بار... قالاي دەگەندە دە، ستاتۋس ماجبۇرلەيدى عوي، - دەدى. سوسىن تاعى دا نىعىزداپ: - ستاتۋس، اينالايىن، ستا-تۋس!.. - دەدى.
*****
اعامىزدىڭ ۇيىنەن ورالعاندا، مەن وسى كۇنگە دەيىن قىسىلىپ-قىمتىرىلماي، كەڭ-مول تۇرىپ كەلگەن ەسكى پاتەرىمە سىيماي قالدىم. ومىرىمدە العاش رەت ءوزىمنىڭ الگى... ستاتۋسىم تۋرالى ويلادىم. جانە جاتسام-تۇرسام، ويلايتىنىم - سول. كوڭىلىمە "وسى مەن ءوز ستاتۋسىما - قوعامداعى ورنىم مەن كىسىلىك سالماق-مارتەبەمە لايىق ءومىر ءسۇرىپ ءجۇرمىن بە؟" دەگەن كۇدىك كىردى... بۇرىن مەن: "ماعان جىبەك شاپان جاپسا دا، جاراسادى، جىرتىق شەكپەن كيگىزسە دە، قۇنىم تۇسپەيدى" دەپ ويلايتىنمىن. ءسىرا، ولاي ەمەس-اۋ... اعاما بارىپ قايتقالى بەرى، ستاتۋس سالماقتاۋمەن-اق مازام كەتتى. راس، ماتەريالدىق جاعىنان كەلسەك، مەن ءقازىر، جان-جاعىما جالتاق-جالتاق قاراپ قويىپ، ءوزىمدى الگى... ورتا تاپقا جاتقىزۋعا بەيىممىن. تۇراتىن ءۇيىم، مىنەتىن كولىگىم بار، ىشىپ-جەمنەن تارشىلىق كورىپ وتىرعام جوق. قىسقاسى، ەلباسىمىز ورتاشالار ءۇشىن بەلگىلەپ بەرگەن شاماعا ءدوپ تۇسەم... ءبىراق بەس ساۋساق بىردەي ەمەس - ورتاشانىڭ دا ورتاشاسى بار. بەس ساۋساققا تەڭەسەك، ورتالاردىڭ ىشىندەگى مەنىڭ ورنىم سول... شىناشاقتى مولشەرلەپ قالار. جاماندى-جاقسىلى، بۇل دا ستاتۋس... ءبىراق ءبىر تۇسىنبەيتىنىم - مەنىڭ اعامنىڭ ستاتۋسى نەگە سونشا جوعارى؟.. "حالىقتىڭ ادامىمىن" دەيدى... نەمەنە، ادامزاتتى باقىتقا كەنەلتەر ءبىر سۇمدىق جاڭالىق اشىپ پا؟!.. جوق، الدە، بىزگە تاۋەلسىزدىكتى وسى كىسى الىپ بەرىپ پە!.. ءومىر بويى كەڭسەدە وتىرىپ، قاعاز قاجاعان ەگەۋقۇيرىق جاي عانا... راس، قارجى، سالىق جاعىن تەكسەرگەن. تەكسەرسە شە؟.. قاتتى تەكسەرىپ جىبەرگەنى سونشالىق، وزىنەن جوعارىراقتاعى باستىقتار گوگولدىڭ ءبىر كەيىپكەرىنىڭ سوزىمەن: "نە پو چينۋ بەرەش... ستۋپاي!" دەسە كەرەك... سودان كەيىن-اق، قىزمەتى ۇساقتاپ، اياعى ءتىپتى سۇيىلىپ بارىپ، ايتەۋىر قاق-سوققا ىلىنبەي، امان-ەسەن زەينەتكە شىعىپ ۇلگەرگەنىن ەستىگەم. ال مەن - اتاعىم جەر جارىپ تۇرماسا دا، ەل-جۇرتقا اتىم بەلگىلى پالەنشە دەگەن سۋرەتشىمىن! پالەن دەگەن اتاقتارعا، تۇگەن دەگەن سىيلىقتارعا يە بولعام... ءتىپتى، ءبيتىمدى سالسام، قىلقالامدى تەرىس ۇستايتىن ستاتۋسى جوعارى اعامدى سۋرەتشىلەر وداعىنا وتكىزىپ جىبەرەر بەدەلىم دە بار...
اقىرى، بايىز تاپپاي، اعاما ءوزىم باردىم. ەرتىپ الىپ، قالا سىرتىنا شىقتىم. توبە باسىندا تۇرىپ، سوۆەت زامانىنان كەلە جاتقان ەسكى تام، سۇر شاتىرلى ۇيلەر مەن كەيىننەن سالىنعان ايدىك، اسەم كوتتەدجدەردى جاعالاي نۇسقاپ:
- اعا، - دەدىم، - مىنا ۇيلەردىڭ قايسىسى مەنىڭ ستاتۋسىما لايىق؟..
اعام، الدىمەن، باسىمنان اياعىما دەيىن باجايلاي قاراپ، ءبىراز ويلانىپ، مەنىڭ ستاتۋسىمدى انىقتاپ الدى. سوسىن ساۋساعىن شوشايتىپ، ءوزىمىز تۇرعان بيىكتەن جاڭاعى ۇيلەردىڭ باس-باسىنا شۇقشيا ءۇڭىلىپ، اقىرى، شەتكەرىرەكتە وقشاۋ تۇرعان، جاڭاعى سۇر شاتىرلى، سالىنعانىنا، ءسىرا، ەلۋ جىل بولعان ءبىر ەسكى ءۇيدى نۇسقادى.
- قازىرگى جاڭا قۇرىلىس ماتەريالدارىنان وسىنداي ءبىر قاتقان ءۇي سوعىپ الساڭ، مۇرتىڭدى بالتا شاپپايدى، باۋىر! ەڭ باستىسى - ستاتۋس... كوردىڭ عوي؟
اعاما ىشتەي رەنجىپ تۇرمىن. كورسەتىپ تۇرعانى - مەن ءۇشىن ايپاراداي-اق ءۇي. قازىرگى تۇرىپ جاتقان ەكى اۋىز تاس پاتەرىممەن سالىستىرعاندا، xان سارايى دەرلىك. ءبىراق اعامنىڭ ءۇي دەپ ايتۋعا كەلمەيتىن ءتاج-ماxالىنىڭ جانىندا... - تاۋىق كۇركە عوي مىناۋ!..
دەگەنمەن، قۇرىلىستى باستاپ كەتتىم. ىرگەتاسىن اجەپتاۋىر كەڭ الىپ تۇرعىزا باستاعان ءۇيىم، سالىنا كەلە، وز-وزىنەن قۋشيا باستادى... كوز - الدامشى عوي، ءبارى دۇرىس شىعار دەپ، كوڭىل بولمەي، جۇمىستى ارى قاراي جالعاستىرا بەرگەم. اقىرى، قۋسىرىلا-قۋسىرىلا، سالىپ جاتقان ستاتۋستى ءۇيىم، قۇرىلىس اياقتالعاندا قاراسام، اينالا-اۋلاسىمەن قوسا تارىلىپ، ۇزىنى - بەس، كولدەنەڭى - ءۇش اتتام، ءيتتىڭ ۇيشىگىندەي بىردەڭە بولىپ شىعىپتى... ميستيكا!..
ءوز كوزىمە ءوزىم سەنبەي، اۋلاقتاۋ بارىپ قارايمىن، جاقىنداپ كەلىپ قارايمىن... وزگەرگەن ەشتەڭە جوق. قالاي قاراسام دا - سول: ولاي قاراي بەس قادام، بىلاي قاراي - ءۇش... شارشاعان شىعارمىن دەپ، ءبىر اپتا الاڭسىز دەمالىپ، قايتا كەلدىم. وسى ماڭداعى بولاشاق كورشىلەرىم بولسا كەرەك، مەنىڭ ۇيشىگىمدى قورشاپ الىپ، قىزىقتاپ تۇر ەكەن. قوجايىنسىپ جەتىپ كەلۋگە ىڭعايسىزدانىپ، اۋلاعىراقتان سوزدەرىنە قۇلاق ءتۇردىم.
- مىناۋ نەمەنە، سوندا، ءۇي مە؟ - دەپ سۇرادى بىرەۋى.
- جوعا، وسىنداي ءۇي بولۋشى ما ەدى... - دەدى ەكىنشىسى.
- بالانىڭ ويىنشىعىنداي اپ-ادەمى ەكەن! - دەدى ءبىر ايەل.
- كوكە-ە-ە، وسىنداي ءۇي الىپ بەرشى ماعان!.. - دەپ، قىڭقىلداي باستادى تورت-بەس جاسار قىز بالا، اكەسىنىڭ جەڭىنەن تارتقىلاپ.
- جاز بويى ءبىر قورا قۇرىلىسشى ءجۇرىپ، سالعاندارى وسى ما؟!. - دەگەن داۋىس شىقتى. - يەسى كىم ءوزىنىڭ؟..
ماسقارا... و، ماسقارا!.. كورشىلەرىمنىڭ كوزىنە تۇسۋگە بەتىمنەن باسىپ، سول اۋلاعىراقتان اينالىپ، كەتە باردىم. ەرتەسىنە، ەل ۇيقىسىنان تۇرماعان بوزالا تاڭدا اعامدى ەرتىپ قايتا كەلدىم. اعام ەكى-ۇش اتتاپ، ءۇيدىڭ ارتىن اينالىپ كوردى، تاعى ەكى-ۇش اتتاپ، الدىنا شىعىپ قارادى.
- پاي، پاي... - دەدى ءبىر كەزدە. - كەلىسكەن ءۇي بولىپتى مىناۋىڭ!.. بارەكەلدى! مەنىڭ جاسىما جەتكەنشە، بۇدان دا زورىن سالارسىڭ، ينشاللا...
تۇسىنبەدىم. مەن نە كورىپ تۇرمىن، اعام نە دەپ تۇر... وسىنىڭ سىرىن بىلمەككە، ەندى ۇيىمە كۇندە كەلىپ قارايمىن... قاراي-قاراي، اقىرى، اعامنىڭ ايرىقشا ستاتۋسىن مويىنداپ تىندىم. اعام جانە قانداي ءاققوڭىل ەدى دەپ ويلايمىن... و باستا كەڭ پەيىلىمەن مەنىڭ ستاتۋسىمدى تىم اسىرا باعالاپ جىبەرىپتى!.. ۇققانىم - ەندى ءبارى ورىن-ورنىنا كەلگەن. ەشقانداي ميستيكا جوق... جاز بويى جان الىپ، جان بەرىپ، ءومىر بويى جيعان-تەرگەنىمدى سارقىپ سالعان مىنا قۋىرشاق ءۇي - زامانىم بەلگىلەپ بەرگەن ناقتى ستاتۋسىمنىڭ كورىنىسى!..ءبارى - دۇرىس... قايداعى ميستيكا؟..
اۆتورى: تۇرسىنجان شاپاي
دەرەككوز: azattyq.org
