قازىرگى زاماندا قىزمەتكەرلەردىڭ كوبىسى كومپيۋتەرى كوپ وفيستەردە وتىرىپ تاماقتاناتىنى راس. ويتكەنى، اراسىندا شاي ءىشىپ، جۇرەك جالعاۋعا ارنالعان اس بولمە بارلىق مەكەمەدە قامتاماسىز ەتىلمەگەن. جالپى ەلەكتروندى قۇرالداردىڭ جانىندا وتىرىپ اس ءىشۋدىڭ زيانىنا اسا ءمان بەرمەيمىز. كومپيۋتەر مەن تەلەديدار الدىندا تاماقتانۋ ادامنىڭ دەنساۋلىعىنا وراسان زياندى ەكەنىن بۇگىندە عالىمدار دالەلدەي باستادى.
جۋىردا كييەۆتىڭ ادام ەكولوگياسى ينستيتۋتى ەلەكتروندى قۇرالداردىڭ كەز-كەلگەنى ۋلى ساۋلە شىعاراتىنىن جانە ونىڭ سول ماڭداعى سۋسىن بولسىن، قۇرعاق تاماق بولسىن، كەز-كەلگەن قورەكتىك زاتتىڭ تاعامدىق قۇندىلىعىن جويىپ، قۇرامىن بۇزاتىنىن انىقتادى. سوندىقتان وفيسكە نەمەسە ۇيدەگى جۇمىس كابينەتىنە اس-سۋ قويۋعا بولمايدى.
عالىمدار كومپيۋتەر مەن نوۋتبۋكتىڭ الدىندا وتىرىپ، مونيتوردان كوز الماستان جۇرەك جالعايمىن دەگەن كەز-كەلگەن ادام اقىرىندا قاتەرلى ىسىككە شالدىعاتىنىن ايتۋدا. سوندىقتان شارۋاڭىز شاش ەتەكتەن بولسا دا تاماقتى كومپيۋتەرى جوق بولمەدە( ەڭ دۇرىسى اس بولمە، ارينە) جەگەن ءجون.
امەريكانىڭ ميننەسوتا ۋنيۆەرسيتەتىنىڭ عالىمدارى تەلەديدار، ت.ب. تەحنيكانىڭ الدىندا وتىرىپ تاماق ىشكەندى ۇناتاتىن ادامدار اس بولمەدە جۇرەك جالعايتىندارعا قاراعاندا كوبىرەك اۋىراتىنىن ايتۋدا. تەلەديداردىڭ زيانىن زەرتتەگەن اقش عالىمدارى ەلەكتروندى تەحنيكانىڭ الدىندا ادامنىڭ ارانى اشىلىپ كەتەتىنىن انىقتاعان. ارتىق سالماقتىڭ ارتۋىنا دا ەلەكتروندى قۇرالدان كوز الماستان اس ءىشۋدىڭ زور ۇلەس قوساتىنى بەلگىلى. ادامنىڭ اس مازىرىنەن العان ءلاززاتىن تەلەديدار «جۇتىپ قويادى» دا تويۋ سەزىمىن تۋدىرمايدى. وسىدان اشتىق سەزىمىنەن ارىلماي، كوبىرەك جەۋگە ءماجبۇر بولادى. كومپيۋتەر دە ءدام سەزۋ رەسەپتورلارىنىڭ جۇمىسىن تەجەپ، ادام نە جەپ، نە قويعانىن سەزبەي قالادى.
ۇلىبريتانيا عالىمدارى كومپيۋتەردىڭ الدىندا وتىرىپ تاماقتانۋ ارتىق سالماق قانا ەمەس، گاستريت ءتارىزدى اسقازان اۋرۋلارىنا اپاراتىنىن ايتۋدا. كييەۆتىڭ ادام ەكولوگياسى ينستيتۋتىنىڭ زەرتتەۋشىلەرى كومپيۋتەردىڭ جانىندا تۇرعان تاعامنىڭ قۇرامىنداعى سۇيىقتىق تەحنيكادان شىققان ساۋلەنىڭ اسەرىمەن دورەكىلەنىپ، قۇرامى بۇزىلاتىنىن انىقتاعان. عالىمدار كومپيۋتەردىڭ جانىنا قويىلعان سۋدىڭ ەلەكتروماگنيتتىك ساۋلەلەنۋ اسەرىمەن قۇرامى تۇگەل وزگەرەتىنىن بايقاعان. ال بۇنداي سۋدى ىشكەن ادام قاتەرلى ىسىككە شالدىعادى. سونداي-اق كومپيۋتەردىڭ جانىندا تۇرعان تاعامدى جەۋ ادامنىڭ ەستە ساقتاۋ قابىلەتىن تومەندەتىپ، مەرزىمىنەن بۇرىن قارتايۋعا اكەلىپ سوعادى.
شارافات جىلقىبايەۆا
