بيىل قازاقستان رەسپۋبليكاسى ءۇشىن ايتۋلى مەرەكە – ەل تاۋەلسىزدىگىنىڭ 25 جىلدىعى. بۇل تاۋەلسىزدىك ءبىزدىڭ اتا-بابالارىمىزدىڭ جانكەشتى كۇرەسىنىڭ ناتيجەسى. قازاق مەملەكەتتىلىگىنىڭ ىرگەتاسىن قالاۋعا «الاش-وردا» قوزعالىسىنىڭ قايراتكەرلەرى  وراسان زور ۇلەس قوسقانى ءمالىم. حح عاسىر باسىنداعى قازاق ينتەلليگەنسياسىنىڭ وزىق وكىلدەرى ءا.بوكەيحانوۆ، ا.بايتۇرسىنوۆ، م.دۋلاتوۆ، ح.دوسمۋحامەدوۆ جانە باسقا الاش ارىستارى قازاقستاننىڭ قازىرگى اۋماعىن كەڭەستىك بيلىككە مويىنداتىپ، مەملەكەتتىلىكتىڭ نەگىزىن قالاپ كەتتى.  

وسىعان وراي، «دەگدار» قوعامدىق كەلىسىمدى قولداۋ» قوعامدى قورى كورنەكتى قالامگەر، عالىم، پروفەسسور تۇرسىن جۇرتبايدىڭ «الاش» قوزعالىسى جونىندەگى زەرتتەۋلەرى نەگىزىندە 3 تومدىق باسىلىمدى جارىققا شىعاردى. باسىلىم مۇراعات دەرەكتەرىنەن، الاش قايراتكەرلەرىنىڭ سوت پروسەسى ماتەريالدارىنان، تەرگەۋ حاتتامالارى مەن كورسەتىندىلەردەن، حاتتاردان تۇرادى.  

بۇگىنگى تاڭدا الاش ارىستارىنىڭ عۇمىرى مەن شىعارماشىلىعىن، قىزمەتىن وسكەلەڭ ۇرپاققا ۇلگى-ونەگە قىلۋ –  ماڭىزدى مىندەت. الاش قايراتكەرلەرى تۋرالى ءاربىر دەرەك الاش يدەياسىنىڭ ءمانىن اشىپ كورسەتۋگە، ەل ەگەمەندىگى ءۇشىن ولاردىڭ قانداي قۇرباندىققا بارعانىن تەرەڭ ۇعىنۋعا مۇمكىندىك بەرەدى. الاش قوزعالىسىن جان-جاقتى زەرتتەۋ، تاريحي ۋاقيعالاردىڭ ءمان-ماڭىزىن اشىپ كورسەتۋ جاستاردى ۇلتتىق رۋحتا تاربيەلەۋ، جاڭا قازاقستاننىڭ ستراتەگيالىق مىندەتتەرىن ىسكە اسىرۋ مىندەتتەرىنە تولىق سايكەس كەلەدى.

«دەگدار» قوعامدىق كەلىسىمدى قولداۋ» قوعامدىق قورىنىڭ ۇيىمداستىرۋىمەن كىتاپتىڭ تۇساۋكەسەرى 2 جەلتوقسان كۇنى الماتى قالاسىنداعى جامبىل اتىنداعى جاستار كىتاپحاناسىندا وتەدى. كىتاپ ءتۇپنۇسقا قۇجاتتار بويىنشا ورىسشا، قازاقشا ەكى تىلدە شىقتى. تۇساۋ كەسەر 14:00-دە باستالادى.