بۇگىن اقتوبە وبلىستىق قىلمىستىق ىستەر جونىندەگى مامانداندىرىلعان اۋدانارالىق سوتىندا اعىمداعى جىلدىڭ 5 ماۋسىمىندا ورىن العان تەراكت بويىنشا ايىپتىلارعا ۇكىم شىعارىلدى. سوت 7 ادامدى ءومىر بويى باس بوستاندىعىنان ايىرىپ، ولاردى ەرەكشە رەجيمدە جازاسىن وتەۋ تۋرالى جازاعا كەستى، دەپ حابارلايدى قازاقپارات.
تاعى ەكى نەگىزگى ايىپتالۋشى جۇبانوۆ ايدوس پەن ابدراحمانوۆ ازاماتتىڭ جازاسىن 22 جانە 20 جىلعا ەرەكشە رەجيمدە وتەۋگە كەستى. قولعا تۇسكەن 29 كۇدىكتىنىڭ ىشىندە 9-ى باستى ايىپتالۋشىلار بولاتىن. ولارعا ءبىرقاتار قىلمىستار بويىنشا، سونىڭ ىشىندە تەراكت جاسادى دەگەن ايىپ تاعىلىپ وتىر. ايتا كەتەرلىگى، بۇعان دەيىن مەملەكەتتىك ايىپتاۋشىلار جۇبانوۆ ايدوسقا 25 جىل جانە ابدراحمانوۆ ازاماتقا 22 جىل، ال قالعان جەتەۋى باقىت قۋانىشبايەۆ، اسحات يمانعالييەۆ، ساديحوۆ انۋار، الىبەك اقپانبەتوۆ، اسحات راحمەتوۆ، جاڭاباي قۋانىشبايەۆ، ارسەن تاڭاتاروۆتارعا ءومىر بويى باس بوستاندىعىنان ايىرۋ جازاسىن سۇراعان بولاتىن. سوت ولاردىڭ 7-ەۋىنە ءومىر بويى باس وستاندىعىنان ايىرۋ تۋرالى ۇكىم شىعاردى. قىلمىسكەرلەردىڭ مۇلىكتەرى تاركىلەنىپ، جازاسىن ەرەكشە رەجيمدە وتەيتىن بولادى. قالعان 18-نە قىلمىس تۋرالى قۇزىرلى ورگاندارعا حابارلاماۋ (ق ر قك 434 بابى)، 2-ەۋىنە قىلمىستى جاسىرۋ ارەكەتتەرى (ق ر قك 432 بابى) بويىنشا ايىپ تاعىلۋدا. سونىمەن قاتار، اقتوبەدە 2016 جىلدىڭ 5 ماۋسىمى كۇنى بولعان تەرروريستىك اكتىگە قاتىسقان ابدراحمانوۆ پەن وزگە دە ازاماتتاردىڭ قىلمىستىق ىستەرى بويىنشا، سوت 21 قاراشا كۇنى ايىپتالۋشىلاردىڭ سوڭعى سوزدەرىن ەستىگەن ەدى. ءبىرقاتار قىلمىستار جاساعان، سونىڭ ىشىندە تەرروريستىك اكت ۇيىمداستىردى دەپ سوتتالعاندار مەن ايىپ تاعىلعان ازاماتتار ىستەگەن ارەكەتتەرىنە وكىنەتىندەرىن ايتىپ، سوت وكىلدەرىنە ءومىر بويىنا قاماۋعا الۋ تۋرالى ۇكىم شىعارماۋ جونىندە ءوتىنىش جاساپ، وتباسىلارى مەن بالالارىنا قايتقىلارى كەلەتىندىكتەرىن ايتقان. سوتتالعان ا.ج.جۇبانوۆ پەن ا.ا.ابدراحمانوۆ (تەررورلىق اكتىنىڭ قاتىسۋشىلارى) تا سوت قىزمەتكەرلەرىنەن قاتاڭ ۇكىم شىعارماۋدى سۇرادى. قىلمىس تۋرالى قۇزىرلى ورگاندارعا حابار بەرمەگەنى جانە قىلمىستى جاسىرعانى ءۇشىن سوتتالعاندار (گاسايەۆتان باسقاسى) سوتتا ىستەگەن ارەكەتتەرىن مويىنداپ، سوتتان باس بوستاندىعىنان ايىرۋ جازاسىن قولدانباۋدى سۇرادى. ر.م.گاسايەۆ بولسا سوت وكىلدەرىنەن ءوزىن اقتاپ شىعۋدى سۇرادى. ايتا كەتەيىك، اقتوبەدە تەراكت 5 ماۋسىم كۇنى بولدى. تەرروريستەردىڭ توبى «پاللادا» جانە «پانتەرا» اتتى قارۋ-جاراق دۇكەندەرى مەن №6655 اسكەري بولىمىنە قاراقشىلىق شابۋىل جاساپ، سونىڭ سالدارىنان 8 ادام مەرت بولدى. ولاردىڭ 3ء-ۋى اسكەري قىزمەتكەرلەر. تەرروريزمگە قارسى باعىتتالعان وپەراسيا بارىسىندا 18 ادامنىڭ كوزى جويىلىپ، 9 ادام قۇرىقتالدى.
ەسكە سالا كەتسەك، بۇگىن سوت ۇكىمى شىققان لاڭكەستىك جاساعان سالافيتتەرمەن اتىسقان اقتوبەلىك پوليسەي «التىن ادام» اتاعىن يەلەنگەن ەدى.
