ۇزىناعاشتاعى ءۇش اعايىنىنىڭ ولىمىنە قاتىستى سوت پروسەسى اياقتالىپ كەلەدى. اعايىندىلاردى ولتىرگەن باس كۇدىكتى ءومىر بويىنا باس بوستاندىعىنان ايىرىلۋى مۇمكىن. بۇل تۋرالى بۇگىنگى سوت وتىرىسىندا بەلگىلى بولدى، دەپ حابارلايدى «قامشى» پورتالى.

مەملەكەتتىك ايىپتاۋشى باس كۇدىكتى تالعات سۇلەيمەنوۆكە ءومىر باقي باس بوستاندىعىنان ايىرۋ جازاسىن بەرۋدى سۇرادى. ال مۇرات وڭالبايەۆ 24 جىلعا سوتتالۋى مۇمكىن. سونداي اق كۋاگەر بولا تۇرا ەشكىمگە اتالعان قىلمىس جونىندە ءتىس جارماعان باقىت بايقاسىموۆ 4 جىلىن تەمىر توردا وتكىزۋى مۇمكىن.

بۇعان دەيىن حابارلاعانىمىزداي، جابىرلەنۋشى تاراپ قىلمىسكەرلەردى ءولىم جازاسىنا كەسۋدى سۇراعان ەدى.

ەستەرىڭىزگە سالساق، 18 قىركۇيەكتە الماتى وبلىسى جامبىل اۋدانىندا جوعالعان ءۇش ازاماتتىڭ قىلمىسكەرلەر قولىنان قازا تاپقانى، وسى قىلمىسقا قاتىستى كۇدىكتى رەتىندە 24 قىركۇيەكتە ەكى ازاماتتىڭ ۇستالعانى حابارلانعان بولاتىن. اتالعان ءۇش ازامات، 1979 جىلعى دولدان ۇلى جارقىنبەك، 1973 جىلعى زارلىحان ۇلى مۇقيات پەن ءالىمحان قادىلبەك ەسىمدى جىگىتتەر شىعىس قازاقستان وبلىسىنىڭ تارباعاتاي اۋدانىنان 40 باس مال ساتىپ الىپ، ونى ەكى جۇك كولىگىمەن 17 قىركۇيەك، سەنبى كۇنى، الماتى ماڭىنداعى ۇزىناعاش بازارىنا شىعارعان. قازا بولعانداردىڭ ارتىندا 8 بالاسى جانە جارلارى قالدى.

ەرلان تولەۋباي