تالايعا تاڭداي قاقتىرىپ، 7 جاسىنان ولەڭ جازىپ، قازاقستاننىڭ رەكوردتار كىتابىنا ەنگەن جاس اقىن جامبىلدى بىلمەيتىن جاندار كەمدە-كەم. سول بالا جامبىل وتاۋ يەسى جاسقا كەلىپ، قالىڭدىق ايتتىرىپ جاتىر دەگەن اقپارات تاراعان بولاتىن. وسىعان وراي، قازاقپارات اقپاراتتىڭ اق-قاراسىن انىقتاۋ ءۇشىن جامبىلدىڭ اناسى كامشات يبرايىموۆاعا حابارلاسىپ، ءىستىڭ انىق-قانىعىن سۇراعان.

 «اناسى رەتىندە ايتارىم، بۇل اقپارات مۇلدەم شىندىققا جاناسپايدى. ءوزىم پەداگوگپىن. قازمۋ-دىڭ فيلولوگيا فاكۋلتەتىن بىتىرگەنمىن. مەن بالاما مۇنداي تاربيە ەش ۋاقىتتا بەرمەس ەدىم. جامبىل - بۇل ءبۇتىن قازاق كوزىن تىگىپ وتىرعان بالا. ءبىزدىڭ ەسكىنى جاڭعىرتۋ ويىمىزدا جوق. ءار نارسە ءوز ۋاقىتىمەن»،  - دەگەن جامبىلدىڭ اناسى كامشات  يبرايىموۆا.

بالا اقىننىڭ اناسى جامبىلدىڭ ەرتەڭ وتەتىن شىعارماشىلىق كەشىندە «ءمولدىر مونشاق» دەگەن ءاننىڭ ورىندالاتىندىعىن اتاپ ءوتتى. «شىعارماشىلىق كەشىندە «ءمولدىر مونشاق» دەگەن ءانىنىڭ ورىندالاتىندىعى راس. بۇل ءبىرىنشى شىعارعان تۋىندىسى، تۇساۋى كەسىلەدى. ءقازىر ونىڭ كومپوزيتورلىقپەن دە اۋەستەنىپ جۇرگەنى شىندىق. اڭگىمە وسى اننەن شىققان سياقتى. ءبىراق، ول ەشكىمگە ارنالماعان. جامبىلدىڭ ەكى كىتابى جارىق كوردى. ەندى مىنە، ءۇشىنشى كىتابى دايىن تۇر. مادەنيەت جانە سپورت مينيسترلىگىنىڭ قولداۋىمەن جاقىن ارادا «ولەڭىم - ءومىرىم» دەگەن اتپەن شىعادى. تۇڭعىش كىتابى «تاڭىردەن كەلگەن ءتاتتى سىي» دەگەن اتاۋمەن اۋديو تۇرىندە شىعىپ، بالاباقشالارعا تاراتىلدى. ەكىنشى كىتابى ەلباسى قورىنىڭ قولداۋىمەن «پەرىشتە تىلەك»  دەگەن اتپەن جاريالاندى»، - دەدى كامشات يبرايىموۆا.