الماتى وبلىسى جامبىل اۋدانىندا ايۋاندىقپەن ولتىرىلگەن ءۇش اعايىندى جىگىتتىڭ ولىمىنە قاتىستى بۇگىن سوت ۇكىمى شىقتى، - دەپ حابارلايدى Qamshy.kz.

مال ساتۋمەن اينالىساتىن اعايىندى ءۇش ازامات جارقىنبەك دولدان ۇلى، مۇقيات زارلىحان ۇلى مەن قادىلبەك ءالىمحانۇلىن ءولتىردى دەگەن نەگىزگى ايىپتالۋشى تالعات سۇلەيمانوۆقا سوت ءومىر بويى باس بوستاندىعىنان ايىرۋ جازاسىن كەستى. ول جازاسىن ەرەكشە تۇزىمدەگى كولونيادا وتەيتىن بولادى. ال، ت. سۇلەيمانوۆتىڭ سىبايلاسى مۇرات وڭالبايەۆ 25 جىلعا باس بوستاندىعىنان ايىرىلىپ، قاتاڭ تۇزىمدەگى كولونياعا جىبەرىلەتىن بولدى.

قاندى قىلمىستى كورىپ، قۇقىققورعاۋ ورگاندارىنا حابارلامادى دەپ ايىپتالعان مالشى باقىت بايقاسىموۆقا سوت ءتورت جىل باس بوستاندىعىنان ايىرۋ جازاسىن كەستى.

بۇدان بولەك، سوت شەشىمىمەن ت. سۇلەيمانوۆ پەن م. وڭالبايەۆ ءارقايسىسى قايتىس بولعان ءار ازاماتتىڭ وتباسىنا 10 ميلليون تەڭگەدەن مورالدىق شىعىندى وتەۋگە مىندەتتەلدى.

سوت ۇكىمىنە جابىرلەنۋشى تاراپ پەن سوتتالعانداردىڭ تۋىستارى دا كەلىسپەۋشىلىك بىلدىرۋدە. سوت زالىنان شىققان سوتتالعانداردىڭ تۋىستارى جۋرناليستەرگە قانداي دا ءبىر پىكىر بىلدىرۋدەن باس تارتسا، مارقۇمداردىڭ جاقىندارى قىلمىسكەر ءولىم جازاسىنا كەسىلۋى كەرەك دەپ سانايدى.

الماتى وبلىسى جامبىل اۋدانىندا قىركۇيەك ايىندا بولعان قاندى قىلمىسقا قاتىستى ماتەريالدارمەن مىنا سىلتەمە بويىنشا تانىسا الاسىزدار. 

ەرلان تولەۋباي