جەمقورلىق جاسادى دەپ ايىپتالىپ، 10 جىلعا سوتتالىپ، جازاسىن وتەپ جاتقان قازاقستاننىڭ بۇرىنعى پرەمەر-مينيسترى سەرىك احمەتوۆكە تاۋەلسىزدىكتىڭ 25 جىلدىعىنا وراي جاريالانعان راقىمشىلىق بەرىلۋى مۇمكىن. بۇنداي پىكىردى بەلگىلى زاڭگەر سەرگەي ۋتكين ايتقان.

Sputnik قازاقستان اگەنتتى حابارلاۋىنشا، «جەمقورلىق تۋرالى باپتارعا دا راقىمشىلىق بەرىلۋى مۇمكىن. ولاردىڭ دا ورتاشا، اۋىر، اسا اۋىر تۇرلەرى بولادى. سونداي-اق كەلتىرىلگەن شىعىن كولەمىنە دە بايلانىستى، ۇلكەن نەمەسە ۇلكەن ەمەس قۇقىقبۇزۋشىلىق. سول سەبەپتى دە جەمقورلىق تۋرالى باپتارعا راقىمشىلىق بەرىلۋى مۇمكىن»، — دەگەن ۋتكين «Sputnik قازاقستان» اگەنتتىگىنە بەرگەن سۇحباتىندا.

سەرىك احمەتوۆ: 2012 جىلدىڭ قىركۇيەگىنەن 2014 جىلدىڭ ءساۋىر ايىنا دەيىن قازاقستان پرەمەر-مينيسترى قىزمەتىن اتقارىپ، وتستاۆكاعا كەتكەن. بۇدان سوڭ ول قورعانىس ءمينيسترى بولىپ تاعايىندالىپ، سول جىلى قازان ايىندا قىزمەتىنەن بوساتىلعان ەدى. سەرىك احمەتوۆ وعان دەيىن قاراعاندى وبلىسى اكىمى (2009)، پرەمەر-مينيستردىڭ ءبىرىنشى ورىنباسارى (2012) قىزمەتتەرىن اتقارعان.

ايتا كەتەر بولساق، بۇگىن ماجىلىستە راقىمشىلىق تۋرالى زاڭ جوباسى قارالدى. وسىعان وراي جالپى وتىرىستا زاڭناما جانە سوت-قۇقىقتىق رەفورما كوميتەتىنىڭ ءتوراعاسى نۇرلان ءابدىروۆ:

«وسى جىلى قازاقستان تاۋەلسىزدىگىنىڭ 25 جىلدىق مەرەيتويىن اتاپ وتۋدە. رەسپۋبليكا كونستيتۋسياسى ادام جانە ادامنىڭ ءومىرى، قۇقىقتارى مەن بوستاندىقتارىن ەڭ قىمبات قازىنا دەپ جاريالايدى. گۋمانيزم قاعيداتىنىڭ ءبىر كورىنىسى وعان سايكەس راقىمشىلىق جاساۋ اكتىن قولداناتىن زاڭدى قابىلداۋ بولىپ تابىلادى. زاڭ جوباسىنا سايكەس، ازاماتتاردىڭ الەۋمەتتىك ءالسىز توپتارى، سونىڭ ىشىندە كامەلەتكە تولماعاندار، جۇكتى ايەلدەر، كامەلەتكە تولماعان نەمەسە مۇگەدەك بالالارى بار ايەلدەر، مۇگەدەكتەر، قارت ادامدار، سونداي-اق اۋىر ەمەس قىلمىستىق قۇقىق بۇزۋشىلىقتار جاساعاندار قىلمىستىق جازادان بوساتىلادى»،- دەگەن ەدى.

ەسكە سالساق، كەشە مەملەكەت باسشىسى كونستيتۋسيانىڭ 61-بابىنىڭ 1-تارماعىنا سايكەس ءوز باستاماسىمەن پارلامەنت ءماجىلىسىنىڭ قاراۋىنا «قازاقستان رەسپۋبليكاسى تاۋەلسىزدىگىنىڭ جيىرما بەس جىلدىعىنا بايلانىستى راقىمشىلىق جاساۋ تۋرالى» زاڭ جوباسىن ەنگىزدى.

وسىعان بايلانىستى «قامشى» پورتالىندا «پرەزيدەنتتىڭ كەزەكتى راقىمشىلىعىنا لايىق، تاۋەلسىز قازاقستاننىڭ دامۋىنا ءوز ۇلەستەرىن قوسقان، ءقازىر قاماۋدا وتىرعان تانىمال ازاماتتار» تۋرالى ماقالا جاريالانعان بولاتىن.

اقپاراتتاندىرا كەتسەك،  سەرىك احمەتوۆ راقىمشىلىققا ءىلىنىپ بوساپ شىعار بولسا ول راقىمشىلىققا ىلىنگەن العاشقى مينيستر بولمايدى. بۇعان دەيىن «الاياقتىق» بابىمەن ايىپتالىپ، 7 جىلعا سوتتالعان مينيستر جاقسىلىق اقمىرزا ۇلى پرەزيدەنتتىڭ راقىمشىلىق جارلىعىمەن جازاسى 2 جىلعا تومەندەتىلىپ بوساپ شىققان بولاتىن. جاقسىلىق دوسقالييەۆ 2008 جىلدىڭ قاراشا ايىنان - 7 قازان 2010 جىلدار ارالىعىندا قازاقستان رەسپۋبليكاسىنىڭ دەنساۋلىق ساقتاۋ ءمينيسترى قىزمەتىن اتقاردى.