ەلباسى پورترەتى بار 10 مىڭدىق بانكنوت
تاۋەلسىزدىكتىڭ 25 جىلدىعىنا وراي ەلباسى بەينەلەنگەن 10 مىڭدىق سۋۆەنيرلىك بانكنوت پەن مونەتالار شىقتى. 100 000 دانامەن تارالعان بانكنوتتىڭ ديزاينى اينالىستاعى اقشا بەلگىلەرىمەن ءبىرىڭعاي ستيلدە ورىندالعان: بەت جاعىندا بەينەلەر باسىم تۇردە تىگىنەن، سىرت جاعىندا كولدەنەڭىنەن ورنالاسقان. بانكنوتتىڭ باسىم ءتۇسى - كوكشىل كۇلگىن.
بانكنوتتىڭ سىرت جاعىندا نەگىزگى بەينە قازاقستان رەسپۋبليكاسىنىڭ تۇڭعىش پرەزيدەنتى، ۇلت كوشباسشىسى - نۇرسۇلتان ءابىش ۇلى نازاربايەۆتىڭ پورترەتى بولىپ تابىلادى. پورترەت قاعازدىڭ بەتىندە بەدەرلىكتى قامتاماسىز ەتەتىن جانە ۇستاعان كەزدە سەزىلەتىن ينتاگليو (تەرەڭ باسۋ) ادىسىمەن ورىندالعان. الەمدىك تاجىريبەدە بۇل ءادىس بانكنوتتارداعى پورترەتتەردى ورىنداعان كەزدە ءداستۇرلى ءادىس بولىپ تابىلادى.
باسقا اقشا بەلگىلەرىمەن قاتار، بۇل بانكنوت اينالىسقا شىعارىلعان ساتتەن باستاپ زاڭدى تولەم قۇرالى بولىپ تابىلادى، سونداي-اق بارلىق تولەمدەر مەن اقشا اۋدارىمدارىندا قابىلدانۋعا مىندەتتى.
تالدىقورعاندا نازاربايەۆقا قويىلعان ەسكەرتكىش
مەرەكەگە ءبىر كۇن قالعاندا، 30 قاراشادا نازاربايەۆقا ەسكەرتكىش ورناتىلدى. تالدىقورعانداعى ەسكەرتكىش مەملەكەتتىك رامىزدەر اللەياسىنا تۇر. ەسكەرتكىش اۆتورى - ءمۇسىنشى قازىبەك ساتىبالدين.
ەسكەرتكىشتىڭ اشىلۋ سالتاناتىنا الماتى وبلىسىنىڭ اكىمى اماندىق باتالوۆ، ءماسليحات دەپۋتاتتارى مەن تۇرعىندار قاتىستى. اماندىق باتالوۆ اشىلۋ راسىمىندە ءسوز سويلەپ، ەسكەرتكىش اشىلعان كۇننىڭ "قازاقستان ءۇشىن تاريحي كۇن" ەكەنىن ايتتى.
الماتىدا سونداي-اق، مەرەكەلىك ءىس-شارا بارىسىندا ق ر تۇڭعىش پرەزيدەنتى نۇرسۇلتان نازاربايەۆتىڭ 1991 جىلدىڭ 10 جەلتوقسانىندا ءوز لاۋازىمىن اتقارۋعا كىرىسۋىنىڭ سالتاناتتى ءراسىمىن ماڭگى ەستە ساقتاۋ ءۇشىن ەستەلىك تاقتانىڭ ورناتىلاتىنى ايتىلادى.
استانا قالاسى اتاۋىن نازاربايەۆتىڭ قۇرمەتىنە وزگەرتۋ ۇسىنىلدى
قازاقستان دەپۋتاتتارى استانانىڭ اتاۋىن نۇرسۇلتان نازاربايەۆتىڭ قۇرمەتىنە وزگەرتۋدى ۇسىندى. پارلامەنتتىڭ قوس پالاتاسىنىڭ بىرىككەن وتىرىسىندا ءماجىلىس دەپۋتاتى قۋانىش سۇلتانوۆ استانا مەن باسقا دا ماڭىزدى نىساندار اتاۋىندا نازاربايەۆتىڭ ەسىمى بولۋى ءتيىس دەگەن پىكىر ايتتى. «تاۋەلسىزدىكتىڭ ۇلى جولى ماڭگى بولۋى ءتيىس. جوعارىدا جاريالانعانداردى ەسكەرە وتىرىپ، ەلوردادا تاۋەلسىز قازاقستان مونۋمەنتىن تۇرعىزۋ قاجەت. ەل كونستيتۋسياسىندا تۇڭعىش پرەزيدەنت ەلباسى نۇرسۇلتان ءابىش ۇلى نازاربايەۆتىڭ ءبىزدىڭ مەملەكەتىمىزدى قۇرۋداعى بىرەگەي ەڭبەگىن اتاپ ءوتۋدى، ەلباسىنىڭ ەسىمىن ەلوردانىڭ جانە ەلىمىزدىڭ باسقا دا نىساندارىندا كورسەتۋدى ۇسىنامىز»، - دەدى سۇلتانوۆ.
بۇدان وزگە، قۋانىش سۇلتانوۆ نازاربايەۆتىڭ ەڭبەگىن كونستيتۋسيادا كورسەتۋدى دە ۇسىندى. بۇنداي ۇسىنىستاردى بەكبولات تىلەۋحان باستاعان ءبىر نەشە دەپۋتات قولدادى.
ەلباسىنىڭ سۇحباتتارىنداعى «كەلەسى پرەزيدەنت»
نازاربايەۆ Bloomerg News-كە بەرگەن سۇحباتىندا بۇرىن ەشقاشان بارماعان تاقىرىبى كەلەسى پرەزيدەنت تۋرالى ايتتى. ول ءوز سۇحباتىندا كەلەسى پرەزيدەنتتىڭ كىم بولاتىنى تۋرالى سۇراقعا اشىق جاۋاپ بەرگەن.
ەلباسىنىڭ ايتۋىنشا، ونىڭ بالالارى تاق مۇراگەرى بولمايدى. پرەزيدەنت قازاقستان بيلىگىنىڭ كونستيتۋسياعا ساي اۋىساتىنىن، بارلىق پروسەستىڭ تەك زاڭ شەڭبەرىندە جۇزەگە اساتىنىن جەتكىزگەن. ەلباسى سونداي-اق قازاقستان پرەزيدەنتى بولىپ سايلانعان ادامنىڭ 5 جىلدان 2 مارتە سايلانا الاتىنىن ەسكەرتىپ، ءوز جوسپارلارىن جۇزەگە اسىرۋعا بارلىق قاجىر-قايراتىن جۇمسايتىنىن ايتتى. «مەن 2020 جىلعا دەيىن جۇمىس ىستەيمىن، 2020 جىلى جۇزدەسەيىك»، - دەيدى ەلباسى.
ايتا كەتەر بولساق، پرەزيدەنت قۇرمەتىنە بيىل عانا ءىس-شارالار اتقارىلعان جوق.
مەكتەپتەر مەن ۋنيۆەرسيتەتتەر
قازاقستاندا استاناداعى بەدەلدى ۋنيۆەرسيتەتكە ەلباسى ەسىمى بەرىلگەن. كەمبريدج جانە گارۆارد سياقتى ۋنيۆەرسيتەتتەرمەن قاتار تۇرۋعا مۇددەلى نازاربايەۆ ۋنيۆەرسيتەتى 2010 جىلى اشىلعان. مەملەكەت باسشىسى – ۋنيۆەرسيتەتتەگى جوعارى قامقورشىلىق كەڭەسىنىڭ ءتوراعاسى.
ال بۇدان بىرنەشە جىل بۇرىن قازاقستان ەلورداسىندا ءبىرىنشى نازاربايەۆ زياتكەرلىك مەكتەبى اشىلدى، قازىردە مۇنداي ءبىلىم بەرۋ مەكەمەسى ەلىمىزدىڭ بۇكىل قالالارىندا بار.
قىزعالداقتار مەن حريزانتەمالار
گوللانديا مەن جاپونيادا قازاقستان پرەزيدەنتىنىڭ ەسىمى قىزعالداق جانە حريزانتەما تۇرلەرىنە بەرىلگەن. ەكى ەلدە دە گۇلدەردىڭ جاڭا تۇرلەرىنە ەلباسى ەسىمىنىڭ بەرىلۋى ونىڭ بۇل ەلدەرگە ىسساپارمەن بارۋىنا بايلانىستى. وسىلايشا، 2014 جىلى «قازاقستان پرەزيدەنتى» اتتى گوللاند قىزعالداعى پايدا بولدى، ال وسىدان بىرنەشە اپتا بۇرىن جاپونيا ەلىندەگى گۇل كورمەسىندە ءدال وسىنداي اتپەن حريزانتەمالار ۇسىنىلدى.
نازاربايەۆ كوشەلەرى
قازاقستاندا ەلباسى قۇرمەتىنە اتالعان كوشەلەر جوق، الايدا شەتەلدەردە نازاربايەۆ ەسىمى كوشەلەرگە جىلما-جىل بەرىلىپ جاتادى. ماسەلەن، قازاندا جەرگىلىكتى قازاق دياسپوراسىنىڭ وتىنىشىمەن نۇرسۇلتان نازاربايەۆ كوشەسى «پايدا بولدى». ال، تۇركيادا قازاقستان باسشىسىنىڭ ەسىمى ءتورت قالاداعى داڭعىلدارعا بەرىلگەن. تاۋ شىڭى نازاربايەۆ ەسىمى بەرىلگەن العاشقى نىسانداردىڭ ءبىرى – نۇرسۇلتان شىڭى. ول تيان-شاننىڭ ىلە الاتاۋى سىلەمىنىڭ سولتۇستىگىندە ورنالاسقان. 1998 جىلعا دەيىن بۇل شىڭ كومسومول شىڭى دەپ اتالعان بولاتىن.
