تالعارداعى «نۇر»، قاپشاعايداعى «كاۋسار» جانە ت.ب قاراۋسىز قالعان، شەت ايماقتا ورنالاسقان بالالار ءۇيىنىڭ سىيلى قوناقتارى جانە قارتتار ۇيىنە ايىنا 2-3 رەت باس سۇعىپ، جىلىنا 2-3 رەت «100 اتا-اپا كەشىن» ۇيىمداستىراتىن، بالالارعا قۋانىش سىيلايتىن «ەرتەگىلەر الەمى» مەرەكەسىن وتكىزگەن، كۇز ايىندا 66 بالانى مەكتەپكە كيىندىرگەن، وسىلاي ءىرى-ۇساق شارالارىمەن كوزگە تۇسكەن «قايىرىمدى جاندار» توبىنا 25 قاراشادا رەسمي تۇردە ءبىر جىل تولدى. العاش بۇل توپ ايدىن توقسانبايەۆانىڭ باستاماسىمەن قۇرىلعان بولاتىن. تاماشا يدەيانى قولداۋشىلار حالىق اراسىنان كوپتەپ تابىلدى. كەيىننەن ايدىن حانىم جەكە ماسەلەلەرىنە بايلانىستى جەتەكشىلىكتى توپتىڭ بەلسەندى مۇشەلەرىنە تابىستادى. ءقازىر ۇيىم جۇمىسىن ماۋلەن العازى جانە نازەركە بازاربەكوۆا جۇرگىزىپ وتىر. «قايىرىمدى جاندار» تەك الماتىدا عانا ەمەس، استانا، شىمكەنت، اقتاۋ، تاراز، اقتوبە قالالارىندا دا اشىلعان. ءسويتىپ «قايىرىمدى جاندار» ەرىكتىلەر توبى ەشقانداي مەملەكەتتىك تىركەۋدە جوق بولسا دا قوعامنىڭ نازارىن اۋدارىپ، قازىرگى ۋاقىتتا قازاقستاندا ەڭ بەلسەندى توپتاردىڭ ءبىرى بولىپ سانالادى. وسىنداي ساۋاپبى مول شارالاردى اتقارا جۇرگەن ولار قىركۇيەك ايىنىڭ 22ء-سى كۇنى  11-جاسار جانەل جايلاۋوۆانىڭ وقيعاسىمەن تانىسادى.

تۋعانىنان جۇرەگىندە اقاۋى بار قىز ۇنەمى دارىگەرلەردىڭ باقىلاۋىندا بولىپ، جىل سايىن مىندەتتى تۇردە اۋرۋحانادا ەمدەلىپ شىعاتىن. 6-شى سىنىپقا كوشكەندە دەنساۋلىعى ناشارلاپ، قايتا-قايتا قۇسىپ، السىرەي باستايدى. جانەلدىڭ ەكى بۇيرەگى ىستەن شىققانىن، تەز ارادا وتا جاساتۋ كەرەك ەكەنىن دارىگەرلەر اناسىنا حابارلاپ ايتادى. قايىرىمدى جانداردىڭ ەرىكتىلەرى دەرەۋ ارادا قيمىلداپ، اقپارات جاعىنان جانە قارجى جاعىنان  قالاي جۇمىس جۇرگىزەتىندىكتەرىن ويلاستىرا باستادى. ەڭ اۋەلى، Qiwi مەن Altynbank-تە شوت اشىلىپ، حالىقتى قۇلاقتاندىرا باستايدى. العاشقى شارالاردىڭ ءبىرى - كوشە كونسەرتى. ارباتتا قازاقتىڭ اۋەندەرىن ايتىپ، "دومبىرا party" ۇيىمداستىردى. سونداعى 2 ساعات ىشىندە 50 000 تەڭگە جيناي العان. كەيىن "قايىرىمدى جانداردىڭ" قىزدارى ءار ءتۇرلى تاتتىلەر ءپىسىرىپ، ءۇش جەردە جارمەڭكە  ۇيىمداستىرعان بولاتىن. جينالعان اقشاعا ارزان باعامەن الما ساتىپ الىپ، المانى قايتا ساتقان ەكەن. العاشقى ميلليون وسىلاي جينالادى. وسىلاي الماتىدا ءار ءتۇرلى شارالار ۇيىمداستىرىلىپ، ناتيجەسىندە «الماتى قايىرىمدى جاندار» تازا ءوز ەڭبەكتەرىمەن 4 500 000 تەڭگە جيناپ بەردى. سان ءتۇرلى مەرەكەلىك شارالار وتكىزىپ 1 200 000 تەڭگەدەن استام قارجىنى «اقتاۋ قايىرىمدى جاندارى» اۋدارسا، «شىمكەنت قايىرىمدى جاندارى» ارزان باعامەن توساپ ساتىپ الىپ، قىمباتقا ساتۋ ارقىلى 500 500 تەڭگەنى جانەلدىڭ شوتىنا سالىپ جىبەرگەن. جاقىندا عانا قۇرىلعان «جەزقازعان قايىرىمدى جاندارى» ءبىر اپتانىڭ كولەمىڭدە 200 000 تەڭگە جيناي بەرگەن. دانيار مىرزا باستاعان «بولاشاق» باعدارلاماسىمەن لوندون قالاسىنا كەتكەن ستيپەنديانتتاردان شوتقا 347 000 تەڭگە ءتۇستى. سونداي-اق، بارلىعى زاڭدى تۇردە بولۋى ءۇشىن جانەلدىڭ اناسى اقمارال جاقسىلىقوۆامەن «قايىرىمدى جاندار» اراسىندا كەلىسىمشارت جاسالدى. كەلىسىمشارتتا جينالعان اقشا تەك قانا جانەلگە جۇمسالاتىنى كورسەتىلگەن.

وتا بۇيىرتسا كەلەسى اپتاعا جوسپارلانىپ وتىر. دارىگەرلەر قۇرامى تولىعىمەن ناقتىلانعان جوق. ءبىراق، وتا الماتى قالاسىندا وتەتىنى انىقتالدى.

قالامقاس: قازىرگى تاندا جانەلدىڭ دەنساۋلىعى قالاي؟ وتاعا مورالدى تۇرعىسىنان دايىن با؟

اقمارال جاقسىلىقوۆا: ءقازىر كۇندەلىكتى اناليزدەرىن وتكىزىپ جاتىر. جاڭا اۋرۋحاناعا اۋىسقان سوڭ با، ۇيرەنە الماي جاتىر. ۋاقىت جاقىنداعان سايىن كۇندە، تۇندە جىلاپ، «ماما، مەنى الىپ كەتشى» - دەيدى.

قالامقاس:  دونوردى تابۋ قيىنعا سوقتىرعان شىعار. سول دونور ەستۋىمشە ءسىزدىڭ الىس تۋىسقانىز ەكەن، سول دونورعا كومەگى ءۇشىن اقشا تولەيسىزدەر مە؟

اقمارال جاقسىلىقوۆا: ول ادام ءوزىنىڭ ءاتى-جونىن ايتپاۋىن ءوتىندى. ءبىر قىزىعى، «ماعان وسىنشا اقشا تولەيسىڭدەر» دەپ ايتقان جوق. ءبىراق، مەنىڭ بالاما كومەكتەسىپ وتىرعان ادامعا قالاي راقمەتىمدى ايتپايمىن؟!

قالامقاس: ۇكىمەت جاقتان كومەك بولدى ما؟

اقمارال جاقسىلىقوۆا: انشىلەر مەن دەپۋتاتتارعا حابارلاستىق. تەلەفوندارىن كوتەرمەي، كورىپ تۇرسا دا جاۋاپ بەرمەگەندەر بولدى. قاراجات جينالعاندا سەنبەستىك تانىتتىم.2 اي 10 كۇننىڭ ىشىندە وسىنداي قوماقتى اقشا قالاي جينالدى دەپ تاڭ قالدىم. جانەل ەكەۋمىز قۇشاقتاسىپ جىلاپ الدىق. ماعان كومەكتەسكەن  ميلليونەرلەر ەمەس، دەپۋتاتتار ەمەس، قاراپايىم حالىق. وسىنداي قاراپايىم، جۇرەكتەرى مەيرىمگە تولى جاستارىمىز كوپ ەكەنىنە كوزىم جەتتى.

قالامقاس: ماۋلەن، سىزدەردى وسىنداي جەتىستىكتەرىڭىزبەن قۇتتىقتايمىن. وسى شارالاردا ويلاناتىن، تاڭ قالاتىن جاعدايلار بولدى ما؟

ماۋلەن العازى: بولدى. قىمبات كيىنىپ، ءاميانىن تولتىرىپ العانداردىڭ 200 تەڭگە بەرىپ كەتكەنىن كوردىك. ال قاراپايىم عانا ادامدار 5000 تەڭگە اقشاسىن قالتادان شىعارىپ، بار اقشاسىمەن بىزبەن ءبولىستى. بۇل قايىرىمدىلىق ءۇشىن قانداي دا ءبىر ستاتۋستىڭ كەرەك ەمەستىگىن كورسەتەدى.

جانەلدىڭ اناسى اقمارال جاقسىلىقوۆا ايدىن توقسانبايەۆا، ماۋلەن العازى باستاعان بارلىق «قايىرىمدى جاندارعا»، قاراپايىم جاندارعا ريزاشىلىعىن ءبىلدىرىپ، اق تىلەگىن ايتتى.

ال ءبىز "قامشى" پورتالى جانەلگە جانە ونىڭ وتباسىنا دەنساۋلىق تىلەيمىز.

قامشىگەر: قالامقاس نۇرلان قىزى