قايىم مۇراسىن جيناقتاۋشى، "قايىم مۇحامەدحانوۆ اتىنداعى ءبىلىم جانە مادەنيەت قورىنىڭ" ديرەكتورى دينا قايىم قىزىنىڭ ارحيۆىنەن عالىمنىڭ 1986 جىلى جەلتوقسان كوتەرىلىسىنە ارناپ جازىلعان ولەڭى تابىلدى. ولەڭ اراب گرافيكاسىمەن جازىلعان. بۇگىنگى گرافيكاعا تۇسىرگەن تاريح عىلىمدارىنىڭ كانديداتى امانتاي يسين.
جاماليتتەنوۆكە! (كوم - ن)
حالقىن ساتىپ، قانعا بوككەن قاندى اۋىز،
جەمتىك جالماپ، جالاڭداعان جالماۋىز.
قۋ قۇلقىنعا قۇل بولعان سۇم، سۇرقيا،
سەن - ارام نيەت، سەن – قارابەت، سەن – جاۋىز!
يتتەن تۋىپ، ىننەن شىققان سەكىلدى،
كوز كورمەسىن ارسىز قارا بەتىڭدى.
كۇڭىرەنىپ، كوككە ساۋىپ اق ءسۇتىن،
سەنى تاپقان قايران انا وكىندى!
ماڭگۇرت-دوڭىز وتىردى-اۋ دەپ تورىمدە،
عۇلاميتدين دوڭبەكشىدى كورىندە.
اتا-اناڭنىڭ قارعىس اتقان ءجۇزقارا
قاراڭدى ءوشىر، جات وكىرىپ كورىڭدە!
قىزىل قىرشىن قازاقتىڭ قىز-ۇلدارىن،
ادال جۇرەك، ار-نامىستىڭ قۇلدارىن
(ماڭگى باقي ەل ەسىنەن كەتەر مە)
سوگىپ، سوعىپ، قانىن توگىپ قىرعانىڭ!
تۇنشىعارسىڭ شايىتتەردىڭ قانىنا،
جانتالاسىپ، سايا تاپپاي جانىڭا.
قارا جەردە تىتىركەنىپ، جيرەنىپ،
جان جولاماس ولەكسەڭنىڭ ماڭىنا!
12.05.1407 – 20.12.1986. قايىم مۇحامەدحانوۆ
قايىم مۇحامەدحانوۆ امانتاي ءيسيننىڭ ولەڭگە جازعان كومەنتارييى: «ماسكەۋدىڭ ساياسي ديكتاتۋراسىنا بولعان قارسىلىقتى بيلىكتىڭ جالعان ناسيحاتتاۋىنا جانە 1986 جىلعى الماتىداعى جەلتوقسان كوتەرىلىسى اياۋسىز باسىپ-جانشىلعان كەيىنگى كۇندەردە جازىلعان، اشۋلى ولەڭ. «جاماليتتەنوۆ» (سولاي جازىلعان) دەگەن فاميليانىڭ استارىندا، 1986 جىلى حالىق قوزعالىسىن قارالاۋشىنىڭ ءرولىن اتقارعان قازاقستان كومپارتياسى ورتالىق كوميتەتىنىڭ حاتشىسى كامليدەنوۆ بولۋى مۇمكىن. ونى كوپتەگەن ادامدار جەلتوقسان تراگەدياسىنىڭ ەڭ نەگىزگى سەبەپكەرى رەتىندە سانادى. تاقىرىپتان كەيىنگى جاقشا ىشىندەگى «كوم-ن» دەگەن ءسوز، قىسقارتىلعان «كوممۋنيستەن» دەگەن ءسوز بولۋى مۇمكىن. حيدجرا بويىنشا داتادان سوڭ، جالپى قابىلدانعان جىل ساناعى قويىلىپتى».
