«جۇلدىز» FM راديوسىنا سۇحبات بەرگەن ق ر مادەنيەت جانە سپورت ءمينيسترى ارىستانبەك مۇحامەدي ۇلى قازاقتىڭ ۇلى اقىنى اباي قۇنانباي ۇلىنىڭ سكريپكادا ويناعانىن ايتقان. BAQ.kz حابارلاعانداي، مادەنيەت جانە سپورت ءمينيسترى «قۇنانباي» تولىق مەتراجدى كوركەم ءفيلمى توڭىرەگىندە اڭگىمە وربىتكەندە، قۇنانبايدىڭ اعارتۋشىلىق قىزمەتىنە توقتالۋ بارىسىندا وسىنداي اڭگىمە ايتقان.
«قۇنانباي اعا سۇلتان عانا ەمەس، اعارتۋشى دا بولعان. اباي، شاكىرىم، اقىلباي ت. ب اينالاسىنداعى بالالارى مەن تۋىستارىنا، سكريپكاشى مامانىن شاقىرتىپ، وقىتقان. اباي جاس كەزىندە سكريپكادا ويناعان»، – دەيدى ا. مۇحامەدي ۇلى.
ايتا كەتەيىك، بۇعان دەيىن ابايدىڭ ۇلكەن ۇلى اقىلبايدىڭ ساۋىقشىل، ءانشى، سكريپكاشى بولعانى باسپا ءسوز بەتتەرىندە جازىلعان ەدى.
ال باۋىرجان ەردەمبەكوۆ ءوزىنىڭ «ابايدىڭ ءانشى شاكىرتتەرى» اتتى ماقالاسىندا قۇنانباي ەمەس، اباي سكريپكاشى ماماندى شاقىرتىپ، اينالاسىنداعىلاردى مۋزىكاعا باۋلىعانىن جازادى:
«اباي قاسىنداعى اسا تالانتتى انشى-مۋزىكانتتاردى اتاعاندا الدىمەن مۇقا ءادىلحان ۇلى ەسىمى ايتىلادى. سوناۋ حاليوللا قالادان كەلىپ جۇرگەن كەزدەردە اباي اۋىلىنىڭ ءان مەن كۇيىن كەلتىرەتىن مۇقا كەلە-كەلە اباي اۋىلىنداعى انشىلەر مەكتەبىنىڭ ۇستازىنا اينالدى. مۋزىكا ونەرىن قالادان ارنايى ۇيرەنىپ كەلگەن مۇقادان كوكباي، شاكارىم، اقىلباي، ماعاۋيا، كاكىتاي، تۇراعۇل، الماعامبەت، مۇحامەدجان، وتەگەلدى تاعى بىرنەشە جاستار دومبىرا، گارمون، سكريپكا تارتىپ، مۋزىكا ءتىلىن ۇيرەنىپ شىعادى. ابايدىڭ مۇقا سياقتى تالانتتى اۋىلىنا العىزۋى سياقتى ونەگەلى ءىسى ءوز شاكىرتتەرىنىڭ ءومىر جولىندا دا جالعاسقان. ماسەلەن، ماعاۋيا ءىنىسى تۇراعۇلدىڭ ان-كۇيگە اۋەستىگىن ءبىلىپ سەمەيدەن ياكوۆ دەگەن سكريپكاشىنى الدىرىپ، اقى تولەپ، تۇراعۇلعا سكريپكا ۇيرەتكەن. مۇقانىڭ تالانتىن اسا جوعارى باعالاعان اباي ونى مۋزىكا سالاسىندا وقىتۋ ءۇشىن ماسكەۋ، پەتەربور سياقتى ۇلكەن قالالارعا جىبەرمەك بولىپ، ارنايى كيىم تىككىزىپ، جول جابدىعىن دا دايىنداعان كورىنەدى»، - دەپ جازاعان ەدى اۆتور.
