بەيبىت جيىندار مەن ميتينگ ۇيىمداستىرعانى، ۇلتارالىق ارازدىقتى قوزدىرعانى جانە جالعان لاڭكەستىك ءۇشىن سوتتالعاندار راقىمشىلىققا ىلىكپەيدى.  بۇگىن پارلامەنت ماجىلىسىندە  «قازاقستان رەسپۋبليكاسى تاۋەلسىزدىگىنىڭ 25 جىلدىعىنا بايلانىستى راقىمشىلىق جاساۋ تۋرال» زاڭ جوباسى بويىنشا جۇمىس توبى وتىرىسىنىڭ الدىندا تىلشىلەرگە  سۇحبات بەرگەن ق ر باس پروكۋرورىنىڭ ءبىرىنشى ورىنباسارى يوگان مەركەل وسىلاي ءمالىم ەتتى، دەپ حابارلايدى قازاقپارات.

«بۇل باپ زاڭ جوباسىنىڭ تىزىلىمىنە راقىمشىلىققا شەكتەۋ رەتىندە ەنگىزىلگەن. ياعني، وسى باپتار بويىنشا راقىمشىلىق قولدانۋعا شەكتەۋ قويىلعان. سونىمەن قاتار، ءبىر توپ ادام جاساعان جەمقورلىق قىلمىسقا نەمەسە اسا اۋىر قىلمىستارعا دا تىيىم سالىنادى»، - دەدى مەركەل. ونىڭ ايتۋىنشا، اسا اۋىر جەمقورلىق قىلمىس جاساعاندار شىعىندى تولىق كولەمدە وتەگەن جاعدايدا جازانى وتەۋ مەرزىمدەرىن قىسقارتاتىن بولادى.

بۇدان بۇرىن حابارلانعانداي، وسى اپتادا پارلامەنت ءماجىلىسىنىڭ جالپى وتىرىسىندا «قازاقستان رەسپۋبليكاسى تاۋەلسىزدىگىنىڭ 25 جىلدىعىنا بايلانىستى راقىمشىلىق جاساۋ تۋرالى» ق ر زاڭىنىڭ جوباسى جۇمىسقا الىندى. ەسكە سالا كەتەيىك، مەملەكەت باسشىسى نۇرسۇلتان نازاربايەۆ كونستيتۋسيانىڭ 61-بابىنىڭ 1-تارماعىنا سايكەس ءوز باستاماسىمەن پارلامەنت ءماجىلىسىنىڭ قاراۋىنا «قازاقستان رەسپۋبليكاسى تاۋەلسىزدىگىنىڭ 25 جىلدىعىنا بايلانىستى راقىمشىلىق جاساۋ تۋرالى» زاڭ جوباسىن ەنگىزدى. بۇل راقىمشىلىق شاراسى زاڭ بۇزعان ازاماتتارعا قاتىستى ىزگىلىك اكتىسى، مەملەكەت تاراپىنان مەيىرىمدىلىك پەن سەنىم ءبىلدىرۋدىڭ كورىنىسى بولىپ سانالادى. 

زاڭ جوباسىنا سايكەس، ازاماتتاردىڭ الەۋمەتتىك ءالسىز توپتارى، سونىڭ ىشىندە كامەلەتكە تولماعاندار، جۇكتى ايەلدەر، كامەلەتكە تولماعان نەمەسە مۇگەدەك بالالارى بار ايەلدەر، مۇگەدەكتەر، قارت ادامدار، سونداي-اق اۋىر ەمەس قىلمىستىق قۇقىق بۇزۋشىلىقتار جاساعاندار قىلمىستىق جازادان بوساتىلادى. مەملەكەت باسشىسى ەنگىزگەن زاڭ جوباسى اعىمداعى جىلدىڭ 30 قاراشاسىندا ءماجىلىستىڭ جۇمىسىنا الىنعان ەدى.

ايتا كەتەر بولساق، «قامشى» ءتىلشىسى تاۋەلسىزدىكتىڭ 25 جىلدىعىنا وراي، تاۋەلسىز قازاقستان دامۋىنا ءوز ۇلەسىن قوسقان، بەلگىلى جاعدايلارمەن تۇرمەدە وتىرعان، پرەزيدەنتتىڭ كەزەكتى راقىمشىلىعىنا  ىلىنۋگە لايىق ازاماتتاردى سانامالاپ كورگەن ەدى.

تاقىرىپقا تۇزدىق بەرە كەتسەك، بيىلعى جىلى 24 ساۋىردە اتىراۋدا وتكەن جەر رەفورماسىنا قارسى ميتينگتە ۇستالعان تالعات ايان مەن ماكس بوقايەۆ 28 قاراشادا سو ۇكىمىمەن 5 جىلعا سوتتالدى.