تاۋەلسىزدىكتىڭ 25 جىلدىعىنا وراي 3-4 جەلتوقسان كۇندەرى الماتىدا «التىن دومبىرا» اتتى الامان ايتىس ءوتتى. باس جۇلدەسى مۇحتار نيازوۆقا بۇيىرعان ايتىستىڭ ناتيجەسى «قامشى» پورتالىندا جاريالانعان بولاتىن.

ايتا كەتسەك، نيازوۆقا «التىن دومبىرا» مۇسىنىمەن قاتار، 3 ميلليون تەڭگە سىياقى بەرىلدى. 1-ورىن بولاتبەك ورازبايەۆقا (2 ملن تەڭگە)، 2-ورىن جانسايا مۋسيناعا (1 ملن تەڭگە) بۇيىردى. ال 3-ورىن سەرىكزات دۇيسەنعازى، مەيىربەك سۇلتانعازى، يرانعايىپ كۇزەنبايەۆ پەن ءومىرجان كوپبوسىنوۆقا بەرىلدى (ءارقايسىسىنا 300 مىڭ تەڭگەدەن) بەرىلدى.

قازىلار القاسى وسىنداي شەشىم شىعارىپ، جۇلدەگەرلەردى ماراپاتتاۋ ءراسىمى بارىسىندا باس جۇلدەنىڭ بەرىلۋىنە رەسپۋبليكا سارايىنا لىقا تولعان حالىق نارازى بولدى. ورازالى دوسبوسىنوۆتىڭ ءتول شاكىرتى، ءىرى ءىزى بولاتبەك ورازبايەۆ شەشۋشى ايتىستا جىراۋلارداي جىر توكتى. دەگەنمەن ءادىل قازىلار بەرگەن باعادا «ءبىر توعىز» بەرىلىپ، «التىن دومبىرا» قارسىلاسى مۇحتار نيازوۆقا بەرىلدى.

مۇحامەدجان تازابەك، امانجول التايەۆ، داۋلەتكەرەي كاپ ۇلى، باۋىرجان حاليوللا، ادىلبەك ىبىرايىم ۇلى، قونىسباي ءابىلوۆ، قويلىباي اسانوۆ سياقتى «زەينەتتەگى اقىندار» قازىلىق ەتكەن ايتىستىڭ اقتىق باسەكەسىنە بولاتبەك ورازبايەۆ پەن سەرىكزات دۇيسەنعازى، مۇحتار نيازوۆ پەن جانسايا مۋسينا "التىن دومبىرا" ءۇشىن ايقاسقا شىقتى.

جۇلدە تاپسىرۋدا ءسوز العان الماتى اكىمى باۋىرجان قىدىرعالي ۇلى ءسوزىن حالىققا قاراتا «سابىر ەتىڭىز!» دەپ باستادى. باۋىرجان بايبەك اقىندارعا ريزالىعىن ايتا كەلىپ، باس بايگەنىڭ جۇلدەسىنە تاعى 2 000 000 تەڭگە، ءبىرىنشى ورىننىڭ جۇلدەسىنە 1 000 000 تەڭگە ۇستەمە قوساتىنىن حابارلاعاندا كورەرمەن قوشامەتى ءتىپتى دە ۇدەي ءتۇستى. شۋلاعان حالىققا بولاتبەك ورازباي ۇلىنىڭ ءوزى باسۋ ايتىپ: "حالىقتىڭ بىرلىگى ماعان مىڭ ارتىق" دەدى.

ايتا كەتەيىك، «التىن دومبىرا» ايتىسى وسىمەن V رەت وتكىزىلىپ وتىر. مۇحتار نيازوۆ (2012 جىلى) العاشقى يەگەرى بولعان ەدى. 2013 جىلى جانداربەك بۇلعاقوۆ يەلەنسە، 2014 جىلى بالعىنبەك يماشيەۆتىڭ ەنشىسىنە بۇيىرعان بولاتىن. ال 2015 جىلى «التىن دومبىرا»  اسپانبەك شۇعاتايەۆقا بۇيىردى. ءار جولى «التىن دومبىرا» ايتىسى وتكەن سايىن ارتى بەلگىلى دارەجەدە داۋعا ۇلاسىپ كەلەدى.

ەرلان تولەۋباي