اقتوبە وبلىسىندا ەرلى-زايىپتىلار 8 جىلدان بەرى كسرو قۇجاتىمەن ءجۇر. ولار تاۋەلسىزدىكتىڭ 25 جىلدىعى قارساڭىندا قازاقستان ازاماتىنىڭ جەكە كۋالىگىن الۋدى ارماندايدى دەپ حابارلايدى "كەرەك info".

جادىگەر ەرماتوۆ پەن مايرا قانجانوۆا ءقازىر ىرعىز اۋدانى، قىزىلجار اۋىلىندا تۇرادى. ولاردىڭ رەسەيدەن اقتوبە وبلىسىنا كوشىپ كەلگەندەرىنە 8 جىل بولعان. الايدا 54 جاستاعى ەرلى-زايىپتىلاردىڭ ءالى كۇنگە دەيىن قۇجاتى، جەكە كۋالىكتەرى بولماعاندىقتان، مەملەكەتتەن بەرىلەتىن كومەكتەن دە قاعىلىپ كەلەدى. تۋىستارىنىڭ جاعدايىنا الاڭداعان باۋىرى تالعات ەرماتوۆ "كەرەك info" گازەتىنە كەلىپ، شاعىمىن ايتتى.

"اعام مەن جەڭگەم ىرعىز اۋدانىندا تۋىپ-وسكەن. بالالارى دا وسىندا دۇنيەگە كەلدى. الايدا 1995 جىلى رەسەيگە كوشىپ كەتكەن. ەل تاۋەلسىزدىكتى ەندى الىپ، اقشا قۇنسىزدانىپ جاتقان كەز عوي. "جۇرتتىڭ ءبارى جوقشىلىق كەلدى" دەپ ۇرەيلەنىپ ءجۇردى. كۇنكورىس ءۇشىن ولار دا ورىنبور وبلىسىنىڭ ءبىر اۋىلىندا تۇراتىن تۋىستارىمىزدى ساعالاۋعا ءماجبۇر بولعان. 2008 جىلى قايتادان ىرعىز اۋدانىنا كوشىپ كەلدى. ءبىراق، ءالى كۇنگە دەيىن ەكەۋىندە دە قازاقستان"، - دەيدى ول.

بۇگىندە اعا-جەڭگەسىنىڭ قۇجاتتارىمەن ءار مەكەمەنىڭ تابالدىرىعىن توزدىرىپ جۇرگەن تالعات ەرماتوۆ بيۋروكراتيالىق اۋرە-سارساڭنىڭ كوپ ەكەنىن دە جاسىرمايدى. ءتولقۇجات الەگىمەن بيىل ورالداعى رەسەي كونسۋلدىعىنا دا بارىپ قايتقان. الايدا ءالى كۇنگە دەيىن ەشقانداي ناتيجە جوق.

"جەكە كۋالىكتەرى بولماعاندىقتان، تەگىن مەديسينالىق كومەك تە الا المايدى. تۇراقتى جۇمىستارى دا جوق. اقشادان قينالعان ساتتە، ءتىپتى نەسيە دە الا المايدى. قۇجاتى بولماعان سوڭ زەينەتاقى قورىنا دا اقشا تۇسپەيدى. زەينەتكە شىعۋلارىنا ساناۋلى جىلدار قالدى. ولار ەندى قولىمىزعا جەكە كۋالىك الساق دەپ ارماندايدى"، - دەيدى تالعات ەرماتوۆ.

اقتوبە وبلىستىق ءىىد-نىڭ باسشىلىعى دا بۇل ازاماتتاردىڭ ءالى كۇنگە دەيىن قۇجاتسىز جۇرگەندىگىن راستادى. پوليسيا پولكوۆنيگى قانىبەك جاقسىعالييەۆتىڭ سوزىنشە، ەرلى-زايىپتىلار بۇعان دەيىن قولدارىنداعى مەرزىمى وتكەن، ازاماتتىعى جوق تۇلعا مەن شەتەل ازاماتىنا بەرىلگەن ىقتيار حاتتاردى كورسەتپەگەن. سول سەبەپتى ولاردىڭ ءوتىنىشى قاناعاتتاندىرىلماي كەلىپتى.

"قازىرگى تاڭدا ولارعا ورال قالاسىنداعى رەسەي فەدەراسياسىنىڭ ەلشىلىگىنە بارىپ، قۇجاتتارىن قايتا راسىمدەۋ تۋرالى كەڭەس بەرىلدى. كەيىن وتىنىشتەرى قايتا قابىلدانىپ، ولارعا ءتولقۇجاتتارىن راسىمدەۋ بو-يىنشا ءتيىستى شارالار الىنادى"، - دەيدى قانىبەك جاقسىعالييەۆ.

ءىىد-نىڭ مالىمەتىنشە، جىل باسىنان بەرى كەڭەستىك كەزدەگى تولقۇجاتپەن جۇرگەن 175 ادامعا جەكە كۋالىك بەرىلگەن. ءقازىر كوشى-قون پوليسياسى باسقارماسىندا ءالى 24 اقتوبەلىكتىڭ ءوتىنىشى قارالىپ جاتقان كورىنەدى.