وزبەكستان ورتالىق سايلاۋ كوميسسياسى 4 جەلتوقساندا وتكەن پرەزيدەنت سايلاۋى ناتيجەسىن جاريالادى. وزبەكستان ورتالىق سايلاۋ كوميسسياسىنىڭ ءتوراعاسى ميرزا-ۇلىقبەك ابدۋسالوموۆ وتكىزگەن بريفينگ بارىسىندا شاۆكات ميرزيويەۆتىڭ سايلاۋدا 88،61% داۋىسپەن جەڭىسكە جەتكەنى بەلگىلى بولدى.

سايلاۋعا ءتورت ۇمىتكەر قاتىسقان — وزبەكستاننىڭ ليبەرالدىق-دەموكراتيالىق پارتياسى اتىنان پرەزيدەنت مىندەتىن اتقارۋشى شاۆكات ميرزيەيەۆ، حالىق -دەموكراتيالىق پارتياسىنان حاتامجون كەتمونوۆ، سوسيال-دەموكراتتاردان ناريمان وماروۆ جانە دەموكراتيالىق پارتيادان سارۆار وتامۋراتوۆ.

ءبىر ايتا كەتەرلىگى، بۇرىنعى پرەزيدەنت كاريموۆتىڭ بيلىگى مۇراگەرلىك جولمەن بەرىلمەدى. وزبەك بيلىگى ازەربايجانداعىداي اكەدەن بالاعا بەرىلمەدى. كەرىسىنشە بۇرىنعى پرەزيدەنتتىڭ قىزى گۇلنارا كاريموۆا ءقازىر وزبەكستاندا قاماۋدا وتىر. دەگەنمەن ناقتى جاعدايى تۋرالى اقپارات جوق. ءتىپتى قاراشانىڭ 22ء-سى گۇلنارا كاريموۆا ۋلانىپ قايتىس بولدى دەگەن قاۋەسەت تاراپ كەتىپ، كەيىن ونى ۇلى، اتاسىمەن اتتاس يسلام كاريموۆ تەرىسكە شىعارعان بولاتىن. يسلام كاريموۆ BBC-گە بەرگەن سۇحباتىندا، اناسىن اتاسىنىڭ «قولشوقپارلارى» ۇستاپ وتىرعانىن ايتىپ، اناسىنىڭ 2014 جىلدان بەرى قاماۋدا وتىرعانىن، ەكەۋىنە دە قاستاندىق جاسالعانىن بايانداعان ەدى.

كاريموۆتىڭ كەزىندەگى وزبەكستان تاريحىندا جۇرت جادىنان وشپەستەي بولىپ ءاندىجان وقيعاسى قالدى. 2005 جىلى 13 مامىردا ءاندىجان قالالىق حوكيمياتىنىڭ (اكىمدىگىنىڭ) الدىنداعى بابىر الاڭىندا بيلىك «اكراميستەر» دەگەن ايىپ تاعىپ، تۇتقىنعا الىنعان 26 بيزنەسمەندى قورعاۋدى كوزدەگەن ميتينگ ءوتتى. «مۇنداي ۇيىم ەشۋاقىتتا بولعان ەمەس، ونى «ءدىني ەكسترەميستەر» دەپ اتالىپ جۇرگەندەردى تورعا ءتۇسىرۋ ءۇشىن بيلىكتىڭ ءوزى ويلاپ تاپتى» دەگەن بولجامعا توقتادى.

ميتينگىگە شىققان ءاندىجاننىڭ بىرنەشە مىڭ تۇرعىنى حالىقتىڭ الەۋمەتتىك جاي-كۇيىن جاقسارتۋ جانە ەلدەگى قۋعىن-سۇرگىن ساياساتىن دوعارۋ جونىندە تالاپتار قويدى.

وزبەكستان بيلىگى ميتينگىنى اسقان قاتىگەزدىكپەن جانشىدى. رەسمي ماعلۇماتقا قاراعاندا وسى وقيعا كەزىندە 187 ادام كوز جۇمعان. ونىڭ ىشىندە اسكەري قىزمەتكەرلەر مەن پوليسەيلەر دە بار، ءبىراق باسىم كوپشىلىگى «بيزنەسمەندەردى تۇرمەدەن شىعارىپ الماق بولعان الدەبىر ەكسترەميستەر مەن يسلامشىلدار». ال تاۋەلسىز باقىلاۋشىلاردىڭ بايقاۋىنا قاراعاندا سول كۇنى مىڭنان استام ءاندىجان تۇرعىنى مەرت بولعان. الايدا قازا بولعانداردىڭ ءدال سانى سول كۇيى بەلگىسىز قالدى.

وزبەكستان بيلىگى بۇل بيزنەسمەندەردى 1990 جىلدارى تىيىم سالىنعان «اكراميا» قوزعالىسىنىڭ جاقتاستارى دەپ مالىمدەدى. ءبىراق ول ۇيىم جونىندەگى مالىمەتتەردىڭ ەكىۇشتىلىعى سونشالىقتى، ءتىپتى كەيبىر ساراپشىلار.

ايتا كەتەر بولساق، يسلام كاريموۆتىڭ بيلىگى كەزىندە قازاق-وزبەك اراسىندا ساۋدا، ەكونوميكا، مادەني بايلانىستار جوقتىڭ قاسى بولدى.