«قازاق ارۋى-2014» بايگەسىندە بارلىعىنان وزا شاۋىپ، حالىققا كەڭىنەن تانىلعان گۇلناز، بۇگىندە اكتريسا، تەلەجۇرگىزۋشى. بىرنەشە تەليەۆيزيالىق جوبالاردا بوي كورسەتىپ جۇرگەن ارۋدى سوزگە تارتىپ، سۇحباتتاسۋدى ءجون كوردىك.
- گۇلناز، وتباسىڭىز جايلى ايتىپ بەرسەڭىز.
- وتباسىمدا ەكى ادامبىز. مەن جانە انام. اكەسىز ءوستىم. ۇيدە جالعىز قىز بولعاندىقتان ايتقانىمدى ورىنداتقىزاتىن، ەركە قىز بولدىم. ەڭ باستىسى، ۇلكەن ماحاببات پەن قامقورلىقتى، جىلۋلىقتى سەزىپ، كورىپ ءوستىم.
- بارەكەلدى! ءسىزدىڭ ويىڭىزشا 21ء-شى عاسىردىڭ ءمىنسىز بولماسا دا سوعان جاقىن قازاق قىزى قانداي بولۋ كەرەك؟
- ارينە، پەندە بولعاننان كەيىن كەمشىلىكسىز ادام بولمايدى. دەسەك تە يدەالعا جاقىن قىزدار بار. ولاردىڭ بويىنان، ەڭ الدىمەن، ءبىلىم، ادامگەرشىلىك سەكىلدى قاسيەتتەر تابىلۋ كەرەك. سونىمەن قاتار، ءوزىن ورتادا دۇرىس ۇستاي بىلەتىن، بىرنەشە ءتىلدى ەركىن مەڭگەرگەن، تالعاممەن كيىنىپ، ءوزىن كۇتەتىن، سالت-داستۇرىمىزدەن حابارى بار بولسا نۇر ۇستىنە نۇر.
- وسى قاسيەتتەر ءسىزدىڭ بويىڭىزدان تابىلا ما؟
- ءوزىم تۋرالى ايتۋعا قينالامىن. الايدا، مەنى جاقسى بىلەتىن ادامداردان جوعارىدا اتاپ وتكەن قاسيەتتەر مەن دە بار ەكەنىن ءجيى ەستيمىن.
- شەت ەلدە وقۋدى ارماندايدى ەكەنسىز. قاي ماماندىق بويىنشا ءبىلىمىڭىزدى شىڭداعىڭىز كەلەدى؟
- مەن كينو سالاسىن جەتىك مەڭگەرۋدى قالايمىن. ونىڭ تارماقتارى كوپ قوي. رەجيسسەرلىك، پروديۋسەر، اكتريسا سەكىلدى. ءقازىر نانىمدى اكتريسا رەتىندە تاۋىپ جۇرگەندىكتەن ءوزىمدى ءدال وسى سالادى شىڭداپ، ءبىلىمىمدى تەرەڭدەتكىم كەلەدى. جىلداپ بولماسا دا ەۋروپا، امەريكا ەلدەرىندەگى كينو ستۋديالاردا 3-4 اي وقىسام دەگەن ماقساتىم بار. بارلىعى ۋاقىتتىڭ ەنشىسىندە، بولاشاقتا كورە جاتارمىز.
- ءقازىر جۋرناليستيكا فاكۋلتەتىندە ماگيستراتۋرادا وقۋداسىز. ونى ءتامامداعاننان كەيىن گازەتكە ماقالا نەمەسە تەليەۆيزيالىق جوبالارعا سەناريي جازۋ ويىڭىزدا بار ما؟
- قازىرگى تاڭدا ەكى سالانى قاتار الىپ كەلە جاتىرمىن. ءبىرى كينو بولسا، ەكىنشىسى تەلەارنا. ەكەۋىندە دە بىلىكتى مامان بولۋ، ىزدەنۋ، وقۋ پارىزىم دەپ ەسەپتەيمىن. تەلەجۇرگىزۋشى بولعاندىقتان جۋرناليستيكانى وقۋدى قاجەت دەپ شەشتىم.
- ءسىز ءبىر سۇحباتىڭىزدا «ءقازىر جىگىتتەر ۇساقتالىپ كەتتى» دەگەن ەدىڭىز. ءسىزدىڭ ويىڭىزشا، ناعىز ەر-ازامات قانداي بولۋ كەرەك؟
- مەنىڭ تۇسىنىگىمدە ناعىز ازامات ەر مىنەزدى بولۋ قاجەت. ياعني، سوزىنە، ىسىنە بەرىك، قايسار مىنەزدى، جىگەرلى. ايتا بەرسەڭ، كوپ قوي. ەڭ باستىسى، مەنى شىن سۇيسە دەيمىن.
- سول يدەالىڭىزدى تاپتىڭىز با؟
- (ءبىراز ويلانىپ)تۇرمىس قۇرىپ، ءبىر وتباسى بولعانشا، تاپتىم دەپ ايتۋعا قورقامىن. سوندىقتان، ازىرشە ەشتەڭە ايتا المايمىن.
- ءسىز جۋرناليستەرگە بەرگەن سۇحباتىڭىزدا «ءقازىر قوعام جەڭىل-جەلپى فيلمدەر مەن سەريالداردى جاقسى كورەدى»، - دەگەن ەدىڭىز. ءوزىڭىز تۇسكەن تەلە ونىمدەردى قانداي ساناتقا جاتقىزار ەدىڭىز؟
- مەن تۇسكەن جوبالار سۇرانىسقا يە. ونىڭ اربىرىنەن ويعا تۇيەتىن، ساباق الاتىن دۇنيەلەر بار. سەبەبى، وندا شىنايى ماحاببات، دوستىق، ساتقىندىق، قازىرگى قوعامنىڭ كەلبەتى كورىنىس تابادى. ماسەلەن، «ماحابباتىم جۇرەگىمدە» تەلەحيكاياسىندا الەۋمەتتىك تەڭسىزدىكتى، ادىلەتسىزدىكتى بايقايسىز. مۇنىڭ بارلىعى شىنايى ءومىر عوي. ال تەلەحيكايانىڭ ەكىنشى ءبولىمى «حەپپي ەندپەن» بولمايدى. ادەتتە، فيلم، تەلەحيكايالارداعى بارشا كەيىپكەر سوڭىندا باقىتقا جەتەدى. ءبىراق، شىنايى ومىردە، ميلليوننىڭ ءبىرى عانا قيىنشىلىقتى جەڭىپ، باقىتقا كەنەلەدى. سوندىقتان، مۇندا پافوسقا جول بەرىپ، شىنايى ومىردەن الشاق كەتپەدىك. ال «قۇستار انىنە» كەلەر بولسام، ونىڭ ورنى ايرىقشا. سەبەبى، ايگىلى كۇيشى كومپوزيتور، ديريجەر نۇرعيسا تىلەندييەۆتى ءاربىر قازاق ءبىلۋ قاجەت دەپ ەسەپتەيمىن. وسى تۇرعىسىندا قوعامدا «قۇستار ءانى» سەكىلدى ونىمدەر كەرەك. ول ارقىلى ءبىز كۇيشىنىڭ ءومىرى، شىعارماشىلىعىمەن تانىسىپ قانا قويماي، قازاق مادەنيەتىن، ونەرىن كورە الامىز. سوندىقتان، مۇنداي جوبالار كوپ بولۋ كەرەك.
- ارمانىڭىزداعى ءرول بار ما؟
- قازاقستاندا، وكىنىشكە وراي، كينو يندۋسترياسى قاتتى دامىماعان. ماسەلەن، دجوني دەپپ سياقتى ءتۇرلى وبرازدارعا ەنىپ، بىر-بىرىنە مۇلدە ۇقسامايتىن رولدەر سومداۋعا ازىرشە مۇمكىندىك جوق. بۇل رەتتە، مەن ءاربىر ءۇيدىڭ تورىندە ورىن العان قارا جاشىكتە كورسەتەتىن ونىمدەردى ايتىپ وتىرمىن. سەبەبى، تەاتردا جاعداي مۇلدە باسقا. ماسەلەن، اكتەر بۇگىن قايىرشىنى ويناسا، ەرتەڭ حاننىڭ ءرولىن سومدايدى. دەسەك تە كينو، تەلەحيكايالاردا بوي كورسەتىپ جۇرگەن بەرىك ايتجانوۆتىڭ وبرازدارى بىر-بىرىنە ۇقسامايدى، ءارتۇرلى. ال مەنىڭ قازىرگى امپۋلام – اۋىلدان كەلگەن قىز. قانداي كاستينگكە شاقىرسا دا اۋىلدان كەلگەن، اڭقاۋ، اقكوڭىل، كەيدە اقىلى بار، كەيدە اقىماق قىزدىڭ رولىنە بايقاپ كورەدى. سول بەرىلگەن ءرولدى ءوز دەڭگەيىندە ويناپ، تاجىريبەمدى شىڭداۋ مىندەتىم. ونى جوعارى دارەجەدە الىپ شىعىپ، وسسەم دەگەن ويدامىن. كەيىن، ودان دا كۇردەلى وبرازداردى سومداۋ ءۇشىن ءپىسىپ، جەتىلەمىن. بالكىم، بولاشاقتا جاعىمسىز كەيىپكەردى وينارمىن. جاس تا كەلەدى دەگەندەي. ودان كەيىن، جاس، اڭقاۋ قىزدىڭ ءرولىن ويناي المايسىڭ. بارلىعى ءوز رەتىمەن بولۋى كەرەك.
- «وسى ءرولدى ويناۋعا ەشقاشان كەلىسپەۋشى ەدىم» دەپ بىرەۋىن ءدوپ باسىپ ايتا الاسىز با؟
- مەنىڭشە، قازاقستاندا «مەن وسى ءرولدى ەشقاشان ويناماس ەدىم» دەيتىندەي فيلمدەر تۇسىرىلمەيدى. سەبەبى، ءبىزدىڭ مەنتاليتەتىمىز وعان جول بەرمەيدى. دەگەنمەن، ناعىز اكتريسا ەشقاشان ولاي ايتپاۋى قاجەت. سەبەبى، قانداي ءرول بولسىن، ونى الىپ شىعۋ اكتريسانىڭ باستى ميسسياسى.
- گۇلناز، سوڭعى وقىعان كىتابىڭىز قانداي؟
- حالەد حوسسەينيدىڭ «ي ەحو لەتيت پو گورام» كىتابىن وقىدىم. جازۋشى پاكىستان تۋرالى جازعان. كلاسسيكا ەمەس. ءبىراق، وقۋعا تۇرالىق كىتاپ. ال، قازاق ادەبيەتىنەن سوڭعى مارتە «اقبىلەكتى» وقىدىم. جالپى، سۇيىكتى جازۋشىلارىم رەتىندە، مۇحتار اۋەزوۆ، ءازىلحان نۇرشايىقوۆتى اتاي الامىن. اقىنداردان مۇقاعالي ماقاتايەۆتىڭ ولەڭدەرىن ءسۇيىپ وقيمىن.
- كەيىپكەرىڭىزدىڭ اۋىر تاعدىرىن جۇرەگىڭىزگە جاقىن قابىلداپ، وبرازدان شىعا الماي جۇرەتىن ساتتەرىڭىز بولا ما؟
- «تاراز» فيلمىندە، ءتۇسىرىلىم باستالعاندا رولگە كىرىپ، جىلاۋ قاجەت بولسا، جىلايسىڭ. بىرەۋ ايقايلاپ، توبەلەسىپ جاتادى. الايدا، رەجيسسەردىڭ «ستوپ» دەگەن سوزىنەن كەيىن بارلىعىمىز كۇلىپ، قالجىڭداسىپ، ءتۇسىرىلىم الاڭىندا جىلى اتموسفەرا ورنايدى. بارلىعىمىز تاتۋلاسىپ كەتتىك. رەجيسسەرىمىز دە وتە كوڭىلدى ادام. ال «ماحابباتىم جۇرەگىمدە» تەلەحيكاياسىنىڭ 1ء-شى ماۋسىمى كوڭىل-كۇيىمە اسەر ەتتى. سەبەبى، سەناريي اۋىر بولدى جانە ەڭ العاشقى تاجىربيەم دەگەندەي. 1 اي بويى سەريالداعى كوڭىلسىز ەپيزودتاردى ويناعاندا، جۇرەگىمە جاقىن قابىلدادىم. قاي جەر جۇمىس، قاي تۇسى ءومىر ەكەنىن اراجىگىن اجىراتا الماي قالدىم با؟ ءبىراق، ۋاقىت وتە كەلە بارلىعى ورنىنا كەلدى. ءوز باسىم اكتەردىڭ سومداعان ءرولى ومىرىنە اسەر ەتەتىنىنە سەنەمىن. ونى ءوز تاجىربيەمنەن ايتىپ وتىرمىن. بالكىم بۇل جاي عانا سايكەستىك شىعار. ءبىراق، از-ماز بولسا دا سەنارييدەگى تاعدىر قايتالاتىن ۋاقىتتار بولادى.
- ءوزىڭىزدى 10 جىلدان كەيىن، قالاي ەلەستەتەسىز؟
- اياۋلى انا، ارداقتى جار. تەلەجۇرگىزۋشى ءارى اكتريسا. سونىمەن قاتار، وتباسىنا دا، جۇمىسىنا دا ۋاقىت تاۋىپ جۇرگەن ادام رەتىندە ەلەستەتەمىن. مۇمكىن، ءتىپتى باسقا سالاعا كەتىپ قالاتىن شىعارمىن. ونى ۋاقىت كورسەتەدى.
- راحمەت! بارلىق ارماندارىڭىزعا جەتۋگە تىلەكتەسپىز!
- راحمەت!
سۇحباتتاسقان: اسەم المۇحانبەت
