«تۇركمەنستاندا ساقال-مۇرتتى العىزىپ، قۇراندى تارتىپ الىپ جاتىر» دەگەن اتاۋمەن «يسلام داۋىسى» رەسەيلىك سايتىندا پايدا بولدى. ءدىن مەن ءدىل جاعدايىنا بەيجاي قارامايتىن ءبىزدىڭ سايت ماتەريالدى قازاقشاعا اۋدارىپ، وقىرمان نازارىنا ۇسىنۋدى ءجون سانادى.
ازاتتىق راديوسىنىڭ بەرگەن مالىمەتىنە سايكەس تۇركمەنستانداعى ناماز وقيتىن، ساقال-مۇرت وسىرگەن مۇسىلماندارعا قىسىم جاسالۋدا.
قۋعىنعا ۇشىراعانداردىڭ بىرەۋى تۇركياعا قونىس اۋدارۋعا ءماجبۇر بولعان. ونى ناماز وقىعاندىعى ءۇشىن مەملەكەتتىك قىزمەتتەن بوساتقان. جۇمىستاعى ءوز مىندەتىن اتقارا وتىرىپ ول نامازىن دا قازا قىلماعان. باستىعى ناماز وقۋدى دوعارۋدى بۇيىرعان. اقىر سوڭىندا جۇمىستان شىققان كەيىپكەر مەملەكەتتىك قاۋىپسىزدىك قىزمەتكەرلەرى تاراپىنان قىسىمدى سەزىنە بەرگەن. تەرگەۋ بارىسىندا وعان ءدىني توپتارمەن قارىم-قاتىناسى، قولدا بار يسلام ادەبيەتى جايلى سۇراقتاردى قويا بەرۋدەن شارشاماعان. ءتىپتى قۇران كىتابىن تارتىپ الىپتى.
ەكىنشى وقيعاعا كەزەك بەرسەك. ءبىرشاما ۋاقىت شەتەلدە بولعان ءبىر مۇسىلمان وتانىنا، ءوزىنىڭ ەلدى-مەكەنىنە ورالعان بەتتە جەرگىلىكتى الەۋەتتى قۇرىلىمداردىڭ قىزىعۋشىلىعىنا ىلىنگەن. ولار وعان ساقال-مۇرتتى الىپ تاستاۋعا اقىل-كەڭەس بەرگەن. ناتيجەسىندە بوي بەرمەگەن، ءتىلدى الماعان مۇسىلماننىڭ ساقال-مۇرتىن الەۋەتتى قۇرىلىمدار وزدەرى الىپ تاستايدى. سونىمەن قاتار بايعۇستى ءدىني ەسترەميزمگە بايلانىستى كۇدىكتىلەردىڭ تىزىمىنە ەنگىزىپ تاستاعان. «ماعان بۇل جەردە تىنىشتىق بولمايتىنىن ءتۇسىندىم. سول سەبەپتى تۇركمەنستاننان كەتتىم. ورالاتىن ويىم دا جوق»،-دەيدى ابدەن ءزارازاپ بولعان مۇسىلمان.
ازاتتىق راديوسىنىڭ حابارلاۋىنشا تۇركسمەنتاننىڭ داشوعۇز ايماعىندا جاعداي تىپتەن قيىن. ىس-ارەكەتى، جۇرگەن ءجۇرىسى ءسال دە بولسىن جۇرتتان وزگەرەك بولسا ونداي ادام الەۋەتتى قۇرىلىمداردىڭ نازارىنا ىلىگەدى. ءسويتىپ ولاردىڭ تۇرعان جەرلەرىنە كەلىپ، قۇراندى جانە باسقا دا ءدىني كىتاپتاردى تاركىلەيدى ەكەن.
اۋدارعان: جازيرا بايدالى
