countrymeters.info سايتى قازاقستان حالقىنىڭ سانى 18 ميلليوننان اسقانىن كورسەتتى، دەپ حابارلايدى «قامشى» پورتالى. بۇگىنگى كورسەتكىش بويىنشا، قازاقستان حالىق سانى 18 ميلليون 22 مىڭ 500 ادامدى قۇرايدى.
وندا، قازاقستان حالقىنىڭ 2015 جىلدىڭ اياعىنا دەيىن 17 769 475-عا جەتكەنى، بيىلعى جىلدىڭ ءوسىمى بويىنشا، قازاقستان حالقىنىڭ سانى 18 044 724 دەيىن جەتۋى مۇمكىن ەكەنى بولجانعان.
ايتا كەتەر بولساق، بيىلعى جىلدىڭ 17 قىركۇيەگىندە، اقتوبە وبلىسى اكىمى بەردىبەك ساپاربايەۆ اقتوبەدە وتكەن «كلاستەرلىك مەديسينا، مەملەكەتتىك-جەكە سەرىكتەستىك، حالىقارالىق بايلانىستىڭ دامۋى» اتتى حالىقارالىق فورۋمدا دا بۇنداي قۋانىشتى جاڭالىقتى ايتقان بولاتىن.
«تاۋەلسىزدىك جىلدارى قازاقستان مەملەكەتى، باسشىلىعى مەديسينانى باستى نازاردا ۇستاپ كەلەدى. بىرنەشە مەملەكەتتىك باعدارلاما قابىلدانىپ، تولىعىمەن ىسكە اسىرىلدى. «100 مەكتەپ، 100 اۋرۋحانا»، «سالاماتتى قازاقستان»، «دەنساۋلىق» باعدارلامالارى بار. مەملەكەتتىك باعدارلامالاردىڭ ناتيجەسىندە قازاقستان حالقىنىڭ ورتاشا ءومىر ءسۇرۋ جاسى 72-گە جەتتى، حالىق سانى 18 ميلليوننان استى. قازاقستاندا دۇنيەجۇزىلىك ستاندارتقا ساي اۋرۋحانالار مەن ەمحانالار سالىنىپ، عالىمدارى، دارىگەرلەرى الەمنىڭ ۇزدىك ەمدەۋ ورتالىقتارىندا ءبىلىم الىپ، ەڭبەك جولىن ەلىمىزدە جالعاستىرىپ جاتىر»، - دەگەن ەدى اكىم ءوز سوزىندە.
ەسكە سالساق، 2015 جىلعى 1 قاراشاداعى جاعداي بويىنشا ەلىمىزدەگى حالىق سانى 17 ملن. 630،7 مىڭ ادامدى قۇرادى. بۇل تۋرالى ق ر ۇلتتىق ەكونوميكا مينيسترلىگىنىڭ ستاتيستيكا كوميتەتىنەن حابارلانعان بولاتىن. وندا، 2015 جىلعى قاڭتار-قازاندا حالىق سانى جالپى ەل بويىنشا 213 مىڭ ادامعا نەمەسە 1،2 پايىزعا وسكەنى، وسى كورسەتكىش بويىنشا 2014 جىلعى 1 قاراشامەن سالىستىرعاندا حالىق سانى 253 مىڭ ادامعا نەمەسە 1،46 پايىزعا ارتقاندىعى ايتىلعان بولاتىن.
بيىلعى جىلى ناۋرىز ايىنداعى پرەمەر-مينيستر كارىم ءماسىموۆتىڭ رەسمي سايتى وسى جىلعى اقپاننىڭ 1ء-ى كۇنگى جاعداي بويىنشا، قازاقستان حالقىنىڭ سانى 17 ميلليون 693 مىڭ 5 ادام بولعانىن حابارلاعان ەدى. ال، قازاقستان حالقىنىڭ سانى جىل باسىنان ناۋرىز ايىنىڭ بىرىنە دەيىن بەرى 0،2%-عا ارتىپ، 2016 جىلدىڭ 1 ناۋرىزىنا 17 ملن 713،8 مىڭ ادام بولدى، دەپ حابارلاعان بولاتىن ق ر ۇلتتىق ەكونوميكا مينيسترلىگىنىڭ ستاتيستيكا كوميتەتى. ول اقپاراتتا 2015 جىلعى 1 ناۋرىزبەن سالىستىرعاندا حالىق سانى 255،3 مىڭ ادامعا نەمەسە 1،46% ءوستى، دەلىنگەن ەدى.
وسى كورسەتكىشتەرگە اناليز جاسايتىن بولساق، countrymeters.info كورسەتكىشتەرى شىندىققا جاقىن بولۋى ابدەن مۇمكىن. قازاقستان ستاتيستيكا كوميتەتىنىڭ نەگىزگى الەۋمەتتىك-ەكونوميكالىق كورسەتكىشتەردىڭ سوڭعى دەرەكتەرى بويىنشا، حالىق 2016 جىلعى 1 مامىرعا 17 ميلليون 753 مىڭ 200ء-دى كورسەتكەن. قازاقستان حالقىنىڭ ءبىر جىلدىق ءوسىمى 250 مىڭ ادامنان كوبىرەك دەڭگەيدە بولاتىن بولسا، ءبىز جىل اياعىنا دەيىن انىق 18 ميلليون كورسەتكىشىن كورىپ قالۋىمىز مۇمكىن.
اتالعان سايتتا سايكەس ۋاقىتقا دەيىنگى جەر بەتىنىڭ حالىق سانى 7 ميلليارد 480 ميلليون 500 مىڭعا جۋىق ەكەنى كورسەتىلگەن. ءارى، جەر بەتىنىڭ حالىق سانى شامامەن كەلەر جىلدىڭ ناۋرىز ايىندا 7،5 ميللياردقا جەتۋى مۇمكىن ەكەنى ايتىلعان. جوبانىڭ بولجاۋىنشا، جەر بەتىندەگى كەلەسى جارتى ميللياردتىق ءوسىم 5-اق جىلدا بايقالىپ، 2022 جىلى ادام بالاسى 8 ميللياردقا جەتەتىنىن تۇسپالدانعان.
ايتا كەتسەك اتالعان جوبا حالىق سانىنىڭ ءوسىم ديناميكاسىن كورسەتۋدى ماقسات ەتەدى جانە الەمنىڭ كەز كەلگەن ەلىندەگى باسقا دا دەموگرافيالىق، الەۋمەتتىك پروسەسستەردى كورسەتۋگە باعىتتالعان. 2011 جىلدىڭ سوڭىندا جوبانى قۇرۋ كەزەڭىندە، جوبا قۇرۋشىلارى الدىنا ستاتيستيكالىق اقپاراتتىڭ نەگىزگى كوزى بولىپ تابىلۋدى ماقسات ەتپەدى. سوندىقتان شىنايى ستاتيستيكالىق كوز بولىپ تابىلمايدى. الايدا، جوبا يەلەرى ءوز الگوريتمدەرىن ۇنەمى جەتىلدىرە وتىرىپ، بولجامدارىنىڭ شىنايى دەموگرافيالىق كورىنىسكە بارىنشا جاقىن بولعانىن كوزدەيدى. سوندىقتان جوبا ستاتيستيكاسى كورسەتكەن ناتيجە ءار ەلدىڭ ستاتيستيكالىق قىزمەتتەرىنىڭ جاريالاعان مالىمەتتەرىمەن بارىنشا قارايلاس كەلەدى.
سونداي-اق، جوبانىڭ كورسەتكەن ستاتيستيكاسى بۇۇ-نىڭ ەكونوميكالىق جانە الەۋمەتتىك ماسەلەلەر دەپارتامەنتىنىڭ حالىقتىڭ ءبولىمى جاريالاعان مالىمەتتەردى دە پايدالانادى.
