اتىراۋ وبلىسىندا مەملەكەتتىك ءنومىرسىز جۇرگەن كولىكتى توقتاتقانى  ءۇشىن جول ساقشىلارى باستىقتارىنان ءسوز ەستىدى. ءنومىرسىز جۇرگەن كولىكتى «نەگە توقتاتاسىڭدار» دەگەن ماحامبەت اۋداندىق جەرگىلىكتى پوليسيا قىزمەتىنىڭ باستىعىنا ۇقسايتىن ازامات، تولتىرىلعان حاتتامانى جىرتىپ، جەلگە ۇشىرعان. سونداي-اق، ءوز قىزمەتكەرلەرىن بالاعاتتاعان باستىقتىڭ سوزدەرى بەينەتىركەۋىشتە جازىلىپ قالعان.  بۇل تۋرالى «31 ارنا» جاڭالىقتارى حابارلادى.

ماحامبەت اۋداندىق ىشكى ىستەر ءبولىمىنىڭ جەرگىلىكتى پوليسيا قىزمەتىنىڭ باستىعى نۇرلىبەك دوسقايىروۆقا ۇقسايتىن ازاماتتىڭ مەملەكەتتىك نومەرى جوق كولىكتى توقتاتقان جول پوليسيا قىزمەتكەرلەرىنە قوقان-لوقى كورسەتكەندىگى مىنا اۋەسقوي تۇسىرىلىمنەن بايقالادى. بۇل جولعى داۋدىڭ باسى  جەرگىلىكتى اكىمشىلىككە قاراستى تەحنيكادان باستالعان. نومەرسىز جۇرگەن مىنا كولىكتى توقتاتقان ءتارتىپ ساقشىلارى اۋدان اكىمى ورىنباسارىنان دا ورىنسىز ايقاي ەستىگەندىگىن انىق اڭعارۋعا بولادى. 

جەلىنى شۋلاتىپ، ءتارتىپ ساقشىلارىنا توسىن ساۋال تاستاعان شەنەۋنىكتەر الەۋمەتتىك جەلىگە تاراعان وسى ۆيدەودان كەيىن وزدەرىنىڭ وكىنەتىندىكتەرىن جەتكىزدى. 
ماحامبەت اۋدانى اكىمىنىڭ ورىنباسارى مالىك امانوۆ، «وتە ماناعىعا وكىنەمىز ەندى. وسىنداي جاعدايعا بارىپ، وسىلاي شىعىپ كەتكەنىنە. مەن پوليسياعا سويلەگەندە ەشتەڭە ايتپاعان سياقتىمىن. مەن جاڭا سۇرادىم، نە ءۇشىن توقتاتقانىن، توقتاتىپ تۇرعان كىم ەكەنىن سۇرادىم»، دەپ اقتالعان.
الەۋمەتتىك جەلىگە تاراعان ۆيدەو بويىنشا ماحامبەت اۋداندىق  جەرگىلىكتى پوليسيا قىزمەتىنىڭ باستىعى جاۋاپ بەرمەدى. تىلشىلەرمەن تىلدەسۋگە قۇلىقسىز باسشى «قولى بوس ەمەستىگىن» عانا ايتتى. ەسەسىنە، وبلىستىق ىشكى ىستەر دەپارتامەنتى قاراماعىنداعى قىزمەتكەرلەرگە قاتىستى تەكسەرۋدى باستاپ كەتكەن. 
اتىراۋ وبلىستىق ءىىد باسپا ءسوز قىزمەتىنىڭ جەتەكشىسى گۇلناز مۇحتاروۆا «بۇل فاكتى بويىنشا ءىىد-نىڭ وزىندىك قاۋىپسىزدىك باسقارماسىمەن قىزمەتتىك تەكسەرىس جۇرگىزىلىپ جاتىر. قوسىمشا اقپارات تەكسەرىس قورىتىندىسى بويىنشا بەرىلەتىن بولادى»، دەدى.
ال مەملەكەتتىك ءنومىرى جوق كولىكتى توقتاتىپ، حاتتاما تولتىرعان قاتارداعى جول پوليسەيلەرىنە قاتىستى قانداي جازا قولدانىلعانى بەلگىسىز.