كەشە استانادا قازاقستاندىق-امەريكالىق «توقال» ءفيلمىنىڭ الدىن الا كورسەتىلىمى ءوتتى، دەپ حابارلايدى «قازاقپارات»
درامانى «Mount Helix Inc.» كومپانياسىنىڭ قاتىسۋىمەن قازاقستاننىڭ «Art Media Production» جانە اقش-تىڭ «Hollywood Film academy» كينوكومپانيالارى تۇسىرگەن. ءتۇسىرىلىم وتكەن جىلى تامىز ايىندا الماتى مەن لوس-اندجەلەس قالالارىندا ءوتتى. سەناريي اۆتورى جانە رەجيسسەرى ەۆگەنيي چەلسوۆ (رەسەي)، باس پروديۋسەر - گاۋحار نۇرتاس. سونداي-اق ءفيلمنىڭ وندىرىسىنە اتقارۋشى پروديۋسەرلەر: ارمانجان بايتاسوۆ (قازاقستان، باس دەمەۋشى)، ولەگ ءابدۋلقابىروۆ (قازاقستان)، كيەۆين فۋ (ۇلىبريتانيا) جانە ستيۆ براۋن (امەريكا) قاتىستى. كارتيناداعى باستى رولدەردى گاۋحار نۇرتاس (بوتا)، جانەل ماقاجان (كاميلا)، ەرىك جولجاقسىنوۆ (قايرات) جانە تۇڭعىشباي جامانقۇلوۆ (تەمىرلان) وينايدى.
كينوكارتينا اۋقاتتى اۋلەت تۋرالى باياندايدى. وتباسىنىڭ ۇيىتقىسى بولۋى ءتيىس بوتا قوعامدىق جۇمىستارمەن اينالىسامىن دەپ ەرى مەن بالالارىنان الىستاپ كەتەدى. وتاعاسى قايرات بولسا، كەلبەتى كەلىسكەن كاميلا ەسىمدى بويجەتكەننەن الدانىش تابادى. ءبارىن بىلگەن بوتا بايبىشە رولىمەن كەلىسىپ، وتباسىن ساقتاپ قالۋعا تىرىسادى. ءبىراق سەزىمگە بەرىلگەن قايرات جاس ايەلىن تاڭدايدى. ءسويتىپ جانۇياسىنان دا، بەدەلدى قىزمەتىنەن دە ايىرىلادى. ونىڭ جاڭا وتباسىن اسىراۋ ءۇشىن جۇمىسقا ورنالاسۋ تالپىنىستارىنان ەشتەڭە شىقپايدى. اقىرى، جۇك كولىگىنىڭ جۇرگىزۋشىسى بولىپ كۇنەلتەدى. سانانى تۇرمىس بيلەگەننەن كەيىن «جاس جۇبايلاردىڭ» اراسىنداعى سەزىم بىرتە-بىرتە كوككە ۇشا باستايدى. قايرات بالالى-شاعالى، توقشىلىقتاعى بۇرىنعى ءومىرىن ساعىنادى. كۇندەردىڭ كۇنىندە جاس ايەلىنەن كەتۋدى شەشەدى. ول ۋاقىتتا زاڭدى نەكەدەگى ايەلى بوتا بولعان ءجايتتاردى وي ەلەگىنەن ابدەن وتكىزىپ، ءبىر قورىتىندىعا كەلگەن بولاتىن. «مەنى قىمبات كورەتىن ءارى ماعان قىمبات ادامدار جانىمدا بار» دەگەن شەشىممەن قايراتتى قايتا قابىلداعىسى كەلمەيدى. ءسويتىپ، نازىك جاندىلاردىڭ ەكەۋى دە قايراتسىز، ال قايرات ەكەۋىنسىز قالادى.
باسپا ءسوز ءماسليحاتىندا ءمالىم بولعانداي، وقيعا جەلىسىن گاۋحار نۇرتاس جازىپ شىققان، كەيىن ونى ەۆگەنيي چەلسوۆتىڭ نازارىنا ۇسىنعان. ە.چەلسوۆتىڭ ايتۋىنشا، رەسەيدە توقال ماسەلەسى بار بولعانىمەن، ول باسقاشا اتالادى ءارى وعان كوزقاراس بولەك. كارتينا اۆتورلارى بۇل ماسەلە بارلىق ۇلتتارعا جاقىن، ەر ادامنىڭ ەكى وتتىڭ اراسىندا قالۋى بارلىق ورتادا كەزدەسەدى دەگەندى ايتۋدا. «بۇرىن توقالدى بايبىشە بالا كوتەرە الماعاندا، اۋلەتتىڭ ۇرپاعىن جالعاستىرۋ ءۇشىن العان. بولماسا، اعايىندىلاردىڭ ءبىرى كوز جۇمعاندا، ونىڭ ايەلى مەن بالا-شاعاسى قاڭعىپ قالماس ءۇشىن، باۋىرلارىنىڭ ءبىرى توقالدىققا العان. ال توقالدىڭ بۇگىنگى فەنومەنى اتا-بابا ءداستۇرىن جاڭعىرتىپ وتىر دەپ ايتا المايمىن. ءبىز بۇل فيلممەن ەشكىمگە اقىل ايتقىمىز كەلمەيدى، دوگمالار تۋرالى ايتپايمىز»، - دەيدى گاۋحار نۇرتاس.
ال توقالدىڭ ءرولىن ويناعان جانەل ماقاجان كارتيناعا تۇسكەننەن كەيىن ءوزى ءۇشىن قۇندىلىقتاردى قايتا باعالاپ شىققانىن اتاپ ءوتتى. توقالدى سومداۋ كوڭىلىنە جاقپاعانىن ءارى «شىنايى ومىردە مۇنداي رولمەن كەلىسپەس ەدىم»، دەگەندى ايتىپ وتىر. سونداي-اق ول، توسەكتەگى قارىم-قاتىناس كورىنىسىنە تۇسۋدەن باس تارتقانىن جەتكىزدى. رەجيسسەر ول ەپيزودقا ديۋبلەردى جالداعان. فيلم رەجيسسەرى ەۆگەنيي چەلسوۆتىڭ ايتۋىنشا، ول سەناريي بويىنشا ءبىر جارىم جىل بويى جۇمىس ىستەگەن. ءاۋ باستا قازاقتىڭ بيزنەسمەنىن، ياعني قايراتتىڭ ءرولىن امەريكالىق اكتەر مارك داكاسكوس ويناۋى ءتيىس بولعان. ول بۇل رولگە قۋانا كەلىسىپ، العاشقى تۇسىرىلىمدەرگە دە قاتىسقان. الايدا، فيلم تۋرالى جارناما ينتەرنەتكە تۇسكەننەن كەيىن، مارك داكاسكوستىڭ كەزەكتى رەت قازاقتىڭ ءرولىن سومداۋى حالىققا جاقپاعان جانە ولار ءوز پىكىرلەرىن الەۋمەتتىك جەلىلەردە قىزۋ بىلدىرە باستاعان. بۇدان كەيىن اۆتورلار باستى كەيىپكەردى اۋىستىرۋ شەشىمىن قابىلداپ، ورنىنا اكتەر ىزدەستىرەدى. ۇزاققا سوزىلعان ىزدەنىس جۇمىستارىنان كەيىن كەزدەيسوق ەرىك جولجاقسىنوۆقا كەزىگەدى. جولجاقسىنوۆ رەسەيلىك رەجيسسەر بىردەن ۇناعان. «توقال» كەڭ پروكاتقا 8 جەلتوقسان كۇنى شىعادى. فيلم ءبىر مەزگىلدە موڭعوليا، ازەربايجان جانە قىرعىزستان ەلدەرىندە كورسەتىلە باستايدى.
