تاۋەلسىز قازاقستاننىڭ بوكستان تۇڭعىش وليمپيادا چەمپيونى، كاسىبي بوكستاعى العاشقى قازاقستاندىق چەمپيون ۆاسيليي جيروۆ امەريكاداعى ءومىرى تۋرالى inform.kz-كە ۆيدەوسۇحبات بەرىپتى. "قامشى" پورتالى وزگە ەلدە جۇرگەن ۇلانىنىڭ جۇرەكتەن شىققان سىر-لەبىزىن قازاقشاعا اۋدارىپ، وقىرمان نازارىنا ۇسىنۋدى ءجون سانادى. 

حالىق مەنى تانىمايدى ەمەس، جاقسى تانيدى. قاي جەردە كورسە دە توقتاپ تۇرىپ قالىپ، ءوزارا اڭگىمەلەسىپ تە قالامىز، كەيبىرەۋلەرى وزدەرىنىڭ ىستىق ىقىلاستارىن دا ءبىلدىرىپ جاتادى. بۇل، ارينە، جاقسى، سونداي جاعىمدى سەزىم.

مەن جاتتىقتىرۋشى بولۋدان قاشقان ەمەسپىن. كەرىسىنشە، ءوزىمنىڭ قولىمنان كەلەتىن نارسەنى وزگە ادامدارعا، بىزدەن كەيىنگى جاس بۋىنعا ۇيرەتىپ، شاكىرت تاربيەلەسەم دەپ ويلايمىن. سول شاكىرتتەرىم دە بولاشاقتا بيىك شىڭداردى باعىندىرىپ، ءوز قابىلەتتەرىمەن ەلگە ەڭبەك ەتسە ەكەن دەيمىن. مەن ءۇشىن اقشانىڭ ماڭىزى جوق، جوعارى تولەماقى تالاپ ەتپەيمىن، تەك قابىلەتى جاقسى بولسا بولعانى. قولىمنان كەلسە حالىقتان كومەگىمدى ايامايمىن.

مەن سپورتقا ەرتە باستان قىزىعۋشىلىق تانىتىپ، بوكسقا جەتكەنشە ءار ءتۇرلى سپورتپەن اينالىسا باستادىم. مىسالى: ءجۇزۋ، كۇرەس، ت.ب.

نە سەبەپتى بوكسقا كەلىپ تابان تىرەدىم؟ ءبىر كەزدەرى  اتى شۋلى بولعان «روككي» ءفيلمىن كورىپ، سونداعى باس كەيىپكەر روككيعا ەلىكتەپ، سول سەكىلدى بولۋعا تىرىستىم. سودان قاتتى قىزىعىپ، بىلەك سىبانا كىرىستىم. باستاپقى كەزدە، ارينە، ءبىراز قيىندىقتار بولدى، دەنەم اۋىرىپ، كوگەرىپ تە كەتەتىن. «بۇل قيىندىقتان دا وتەمىن» دەپ وزىمە ءوزىم ۋادە بەردىم.

مەنىڭ ءبىرىنشى جاتتىقتىرۋشىم ەتيل راۆانچا پاشينسكييدىڭ ماعان سىڭىرگەن ەڭبەگى وتە زور. ول كىسى مەنىڭ تەك بوكسەر ەمەس، ادام بولىپ قالىپتاسۋىما زور ىقپال ەتتى. ول وتە قاتال ەدى، سونىڭ ارقاسىندا ءومىردىڭ كوپ قيىنشىلىقتارىنا ءتوزۋدى ۇيرەندىم.

قازاقستاندا قالۋىما، ارينە، بولار ەدى. مەنىڭ شىققان جەرىم قازاقستان، سول سەبەپتى  دە مەن قاي ەلدە جۇرسەم دە، قايدا تۇرسام دا امەريكاندىق ازامات بولمايمىن. ەگەر مەنى ەلىم كەرەك قىلسا مەن ويلانباستان قالار ەدىم. الايدا بۇل ۋاقىتقا دەيىن ەلىمنەن ونداي ىقىلاستى بايقاي قويمادىم. ەگەر مەن ەلىمە كەرەك بولسام، ولار مەنى وزدەرى الىپ قالار ەدى. شىندىعىنا كەلسەك، ول جاقتا مەن ءدال وسى ەلدەگىدەي جاقسى تۇرا السام، وتباسىمدى قامتاماسىز ەتە السام، نەگە قالماسقا؟!

قازاق ەلىنىڭ حالقى وتە اقجارقىن، اقكوڭىل جاندار. ال بۇل جەردىڭ ادامدارى تەك باسپەن عانا جۇرەدى. قاي جەردەن، كىم ارقىلى، قالاي اقشا تابامىن دەپ ۇنەمى ويلاۋ ۇستىندە جۇرەدى. بۇل جاقتا اقشاڭ بولسا ءومىر سۇرەسىڭ، بولماسا اقشاسى بارلارعا قىزمەت ەتىپ، ءتىپتى سولاردىڭ قۋىرشاعىنا اينالاسىڭ.

وزگە ەلدە ءجۇرىپ سۇلتان بولىپ، الەمنىڭ ەڭ جاقسى سپورتشىسى اتاعىن الىپ تۇرساڭ دا ىشىمدە ءبىر مۇڭ جاتادى. بۇل سەزىمدى سوزبەن ايتىپ جەتكىزۋ مۇمكىن ەمەس...

قامشىگەر: نازەركە لابيحان