بۇگىن اقتوبە مۇناي وڭدەۋ زاۋىتى اۋماعىندا جانە قالا ىشىندە وتكەن ارنايى وپەراسيا تۋرالى ۇلتتىق قاۋىپسىزدىك كوميتەتى حابارلاما تاراتتى، - دەپ حابارلايدى Qamshy.kz.

«7 جەلتوقسان كۇنى ۇلتتىق قاۋىپسىزدىك كوميتەتى جەمقورلىققا قارسى ءىس-قيمىل جونىندەگى ۇلتتىق بيۋروجانە ىشكى ىستەر مينيسترلىگىمەن بىرلەسىپ اقتوبە وبلىسىندا جانە ەلدىڭ باسقا دا ءبىرقاتار وڭىرىندە مۇناي جانە مۇناي ونىمدەرىن ۇرلاۋمەن، زاڭسىز ساتۋمەن اينالىسقان ۇيىمداسقان قىلمىستىق توپتاردىڭ قىزمەتىنە توسقاۋىل قويۋ جونىندەگى كولەمدى ارنايى وپەراسيا باستادى. جەدەل ىزدەستىرۋ شارالارى بارىسىندا مۇناي ۇرلىعىنا قاتىسى بار بىرنەشە ازامات ۇستالىپ، مۇناي ونىمدەرى قۇيىلعان اۆتوسيستەرنالار تاركىلەندى»، - دەلىنگەن حابارلامادا.

سونداي-اق، ۇلتتىق قاۋىپسىزدىك كوميتەتى مۇناي ۇرلاۋمەن اينالىسقاندارعا قىلمىستىق «قامقورلىق» جاساپ كەلگەن سالافيزم اعىمىنىڭ بىرنەشە وكىلى ۇستالعانىن دا حابارلادى.

ءقازىر ۇستالعان ازاماتتاردىڭ تۇرعىلىقتى مەكەن-جايلارىندا، ۇرلانعان مۇنايدى ساتۋعا قاتىسى بار دەلىنگەن كاسىپورىنداردا ءتىنتۋ جۇمىستارى ءجۇرىپ جاتقان كورىنەدى.

قولدا بار دەرەكتەر بويىنشا، اقتوبەدەگى مۇناي وڭدەۋشى زاۋىت 2011 جىلدىڭ ناۋرىزىندا اشىلعان. سول جىلدىڭ ءساۋىر ايىندا العاشقى ءونىم شىعارىلدى. العاشقى جىلدارى 150 مىڭ توننا مۇناي وڭدەلىپ، 2013 جىلى قۋاتتىلىعى 300 مىڭ تونناعا جەتكەن.