امەريكانىڭ نۆو كابەلدىڭ ارناسى پرەزيدەنتتىك سايلاۋدا دونالد ترامپتىڭ حيللاري كلينتوننان اسىپ ءتۇسىپ، جەڭىسكە جەتكەنى جايىندا دەرەكتى فيلم ءتۇسىرۋدى قولعا الدى. بۇل جايىندا ارنانىڭ باسپا ءسوز قىزمەتى حابارلايدى، دەپ جازادى RT سايتى.
ءفيلمدى تۇسىرۋگە مارك حەلپەرين يەن دجون حەيليمان اتتى تىلشىلەردىڭ جارىققا شىعا قويماعان كىتاپتارى تۇرتكى بولدى. رەجيسسەرى دجەي روۋچ بولسا، پروديۋسەرلەرى – توم حەنكس پەن گاري گوتسمان.
ءفيلمنىڭ اتاۋى مەن باستى ءرولدى سومداۋشىلار ازىرگە بەلگىسىز.
ايتا كەتەيىك، نۆو ارناسى 2008 جىلى پرەزيدەنتتىك دودا جايىندا فيلم تۇسىرگەن ەكەن. «ويىن وزگەردى» اتتى دەرەكتى فيلمدە اتاقتى اكتريسا دجۋلياننا مۋر باستى ءرولدى سومداعان. بۇل فيلم دە حەلپەرين مەن حەيليمان جازعان كىتاپتارىنىڭ جەلىسىمەن تۇسىرىلگەن.
پىكىر قالدىرۋ