دەشتى قىپشاق دالاسىن ۋىسىندا ۇستاپ، 40 جىل تۇركىستان القابىن بيلەگەن ءابىلقايىر حاننان كەيىن تۇركىستان دالاسىندا شايباني ۇلىسى مەن قازاق حاندىعى قالىپتاستى. شايباني ۇلىسى كەيىننەن وزبەك حاننىڭ اتىمەن وزبەك حاندىعى اتالىپ، بۇگىنگى وزبەكستان مەملەكەتىنىڭ اتاۋىنا اينالدى. ال، قازاق حاندىعىنان بۇگىنگى قازاق ەلى – قازاقستان تاريح ساحناسىنان ءوز ورنىن الدى. XX عاسىردىڭ باسىندا پاتشالىق رەسەيدەن ءوز تاۋەلسىزدىگىن الۋعا ۇمتىلعان الاش وردا تەرريتورياسىنىڭ قۇرامىندا بۇگىنگى وزبەكستاننىڭ ءبىراز اۋماعى بار بولاتىن. ەكى ەل دە 70 جىلداي ۋاقىت سوۆەت ۇكىمەتى وتارىندا اۆتونوميالى رەسپۋبليكا بولىپ ءومىر كەشتى.

تاۋەلسىزدىك العاننان كەيىنگى قازاقستان مەن وزبەكستاننىڭ العاشقى قۇجات قويىپ، قول الىسا كەلىسىم جاساۋى 1992 جىلدىڭ 24 ماۋسىمىندا ورىن العان ەكەن.

قازاقستان پرەزيدەنتى نۇرسۇلتان نازاربايەۆتىڭ 1994 جىلى تاشكەنتكە ساپارى بارىسىندا قول قويىلعان ءبىرتۇتاس ەكونوميكالىق كەڭىستىكتى قۇرۋ تۋرالى شارت قازاقستان مەن وزبەكستان اراسىنداعى بايلانىستى جان-جاقتى، اسىرەسە، ەكونوميكالىق ىنتىماقتاستىقتى ودان ءارى تەرەڭدەتۋگە سەپتىگىن تيگىزدى. 1997 جىلى ناۋرىزدا جاسالعان قازاقستان، وزبەكستان مەن قىرعىزستان رەسپۋبليكالارىنىڭ اراسىنداعى ماڭگىلىك دوستاستىق تۋرالى ءۇشجاقتى شارت - قارىم-قاتىناستى دامىتۋداعى تاعى ءبىر ماڭىزدى قادام بولدى.

پرەزيدەنت نۇرسۇلتان نازاربايەۆتىڭ 1998 جىلدىڭ قازانىندا وزبەكستانعا جاساعان رەسمي ساپارى كورشىلەس ەلدەردىڭ ىنتىماقتاستىعىن ارتتىرۋعا تىڭ سەرپىن بەردى.

وزبەكستان - قازاقستاننىڭ نەگىزگى ارىپتەستەرىنىڭ ءبىرى. تاۋەلسىز دامۋ جىلدارىندا وزبەكستاندا مۇناي-گاز سالاسى، سونداي-اق توقىما، اۋىل شارۋاشىلىعى، قۇرىلىس جانە تۋريستىك سالالار قارقىندى دامىدى. اۆتوموبيل ونەركاسىبىندە ەلەۋلى جەتىستىكتەرگە قول جەتكىزگەن وزبەكستان تمد اياسىندا جەڭىل اۆتوموبيلدەردى ءىرى ەكسپورتتاۋشى، سونداي-اق كولىك كوممۋنيكاسيالارى مەن لوگيستيكادا ايتارلىقتاي تابىستارعا قول جەتكىزدى. 2008 جىلى وزبەكستان پرەزيدەنتىنىڭ استاناعا ساپارىنان كەيىن ەكى ەلدىڭ ساۋدا قارىم-قاتىناستارى قارقىندى دامي ءتۇستى. سىرتقى ساۋدا اينالىمى 2005 جىلدان 2013 جىلعا دەيىن 4 ەسەگە ارتىپ، 2 ميلليارد دوللاردان استى. 2015 جىلى ساۋدا اينالىمى 3،2 ملرد. دوللارعا دەيىن جەتتى.

ال 2013 جىلدىڭ 13-14 ماۋسىمىندا قازاقستان پرەزيدەنتى نۇرسۇلتان نازاربايەۆتىڭ وزبەكستانعا رەسمي ساپارى بارىسىندا تاراپتار ساياسي، ساۋدا-ەكونوميكالىق جانە مادەني-گۋمانيتارلىق ىنتىماقتاستىق ماسەلەلەرىن تالقىلادى.

2014 جىلى وزبەكستان پرەزيدەنتى يسلام كارىموۆتىڭ قازاقستانعا رەسمي ساپارى بارىسىندا دا ءبىرقاتار ەكىجاقتى قۇجاتتارعا - 1997 جىلدىڭ 2 ماۋسىمىنداعى ونەركاسىپتىك مەنشىكتەردى قورعاۋ سالاسىنداعى ىنتىماقتاستىق تۋرالى ۇكىمەتارالىق كەلىسىمگە وزگەرىستەر ەنگىزۋ تۋرالى حاتتاما جانە 2015-2016 جىلدارعا ارنالعان ىنتىماقتاستىق باعدارلاماسىنا قول قويىلدى. سونىمەن قاتار، ءارتۇرلى دەڭگەيدەگى كەزدەسۋلەردە دە تاراپتار ساۋدا-ەكونوميكا، سۋ-ەنەرگەتيكا، كولىك-لوگيستيكا جانە مادەني-گۋمانيتارلىق سالالارداعى ەكىجاقتى ىنتىماقتاستىقتىڭ نەگىزگى باعىتتارىن تالقىلاپ كەلەدى. ەكى ەلدى بىرىكتىرەتىن ورتاق تاريحي-مادەني مۇرالار، قۇندىلىقتار دا بارشىلىق. قازاق حالقىنىڭ ايگىلى بيلەرى تولە بي مەن ايتەكە ءبيدىڭ ەتنومەموريالدىق كەشەندەرى وزبەكستان اۋماعىندا. 2013 جىلى تاشكەنتتە اباي ەسكەرتكىشى اشىلدى.

الىس ساپارعا تۋىسىن شىعارىپ تۇرىپ وزبەكتەر: «دوسىڭ قازاق بولسىن» دەپ باتا بەرەدى ەكەن. بۇل قازاق حالقىنىڭ ادالدىعىن، دوسىن جاۋعا بەرمەيتىن جاۋگەرلىگىن، قوناعىنا دەگەن كەڭ پەيىلدىگىن اڭعارتسا كەرەك. ءتۇبى ءبىر تۇركى جۇرتىندا وزبەكتى قازاق «ءوز-اعام» دەپ سىيلايدى.

تاۋەلسىزدىكتەن بەرى وزبەك بيلىگىن تىزگىندەپ وتىرعان پرەزيدەنت يسلام كارىموۆ بىلتىر 78 جاسىندا ومىردەن وزعاننان سوڭ، ونىڭ ورنىنا شاۆكات ميرزيويەۆ سايلانعان. ناۋرىز مەرەكەسى قازاق پەن وزبەك حالقى ءۇشىن دە ۇلىق. وزبەكستاندا دا ناۋرىز مەرەكەسى تويلانىپ، ءۇش كۇن دەمالادى.

ساراپشىلار  وزبەكستان پرەزيدەنتى شاۆكات ميرزيويەۆ ءوز لاۋازىمىنا كىرىسكەننەن بەرى ەكى جاقتى قارىم-قاتىناستىڭ بەلسەندى دامي باستاعانىن العا تارتادى. بىلتىرعى جىلدىڭ سوڭى مەن 2017 جىلدىڭ اياعىندا ءتۇرلى  دەڭگەيدە كەلىسسوزدەر ءجۇرىپ، شەشىلۋى ءتيىس ءبىرشاما ماسەلە ساراپتالعان.