ميرزيويەۆ وزبەكستانعا پرەزيدەنت بولىپ تاعايىندالعاننان كەيىن العاشقى بولىپ نە رەسەيگە، نە قازاقستانعا رەسمي ءىسساپار جاسايدى دەپ كۇتىلگەن. الايدا وزبەكستاننىڭ العاشقى پرەزيدەنتى يسلام كارىموۆتىڭ ەسكەرتكىشى تۇركىمەناباد قالاسىندا اشىلدى. 7 ناۋرىزدا ەسكەرتكىشتىڭ اشىلۋ سالتاناتىنا وزبەكستان پرەزيدەنتى شاۆكات ميرزيويەۆ پەن تۇركىمەنستان پرەزيدەنتى گۋربانگ ۇلى بەردىمۇحامەدوۆ قاتىستى. 8 ناۋرىزدا وزبەكستان پرەزيدەنتى شاۆكات ميرزيويەۆ پەن تۇركىمەنستان پرەزيدەنتى گۋربانگۋلى بەردىمۋحامەدوۆ وزبەكستاننىڭ شەكاراسى ماڭىنان ءامۋداريا ارقىلى وتەتىن تۇركىمەنابات-فاراب اتتى جاڭا تەمىرجول جانە اۆتوموبيل كوپىرىن اشتى.
مەملەكەت باسشىلارى لەنتا قيىپ، ەكى كولىك ماگيسترالىمەن ءجۇرىپ وتكەن العاشقى جولاۋشى اتاندى. ۇزىندىعى 1 750 مەترگە دەيىن جەتەتىن تەمىرجول كوپىرى قاتتى جەر سىلكىنىسىنە ءتوزىمدى جانە اسا اۋىر جۇك تاسىمالدايتىن پويىزداردى ەسەپكە الىپ سالىنعان. كوپىردىڭ استى وزەنگە دەيىن 10 مەتردى، ال ەنى - 60 مەتردى قۇرايدى. ءامۋداريانىڭ ەكى جاعالاۋىنداعى تەمىرجول كوپىرىندە جاعالاۋدى قورعاۋ جۇمىستارى كەشەنى قۇرىلعان.
اشىلۋدان كەيىن وزبەكستاننان كوپىرلەردىڭ بىرىمەن تەمىرجول قۇرامى جولعا شىقسا، ەكىنشىسىنەن - تۇركىمەندىك كارباميد، ماتالار مەن باسقا دا ونىمدەر تيەلگەن جۇك كولىكتەرى وزبەكستانعا قاراي بەتتەدى.
وزبەكستانعا ميرزيويەۆ پرەزيدەنت بولىپ كەلگەننەن كەيىن وزبەك ەلى كورشىلەرمەن اشىق قاتىناس ۇستانا باستادى. ءتىپتى ول پرەزيدەنت بولىپ سايلانعانعا دەيىن-اق، ۋاقىتشا پرەزيدەنت كەزىندە قىرعىزستانمەن ارادا شەكارا داۋىنىڭ ءبىراز بولىگىن شەشىپ تاستادى. قازاقستان دا وزبەكتىڭ جاڭا بيلىگى مەن ترانزيتتىك، شەكارالىق بىرنەشە ماڭىزدى كەلىسىمدەر جاساپ ۇلگەردى.
2016 جىلدىڭ 2 قىركۇيەگى وزبەكستاننىڭ شيرەك عاسىرلىق باسشىسى يسلام كارىموۆ قايتىس بولدى دەپ حابارلاندى.
8 قىركۇيەك. وزبەكستاندا پارلامەنتتىڭ ەكى پالاتاسىنىڭ بىرىككەن وتىرىسى ءوتتى. ەل كونستيتۋسياسى بويىنشا پرەزيدەنت مىندەتىن سەنات ءتوراعاسى نيگماتۋللا يۋلداشيەۆ اتقارۋى ءتيىس ەدى. الايدا ول قىزمەتتەن باس تارتىپ، پرەمەر-مينيستر شاۆكات ميرزيويەۆ پرەزيدەنت مىندەتىن ۋاقىتشا اتقارۋشى بولىپ تاعايىندالدى. ەلدە مەرزىمىنەن بۇرىن پرەزيدەنت سايلاۋى 4 جەلتوقساندا وتەتىنى انىقتالدى.
9 قىركۇيەك. شاۆكات ميرزيويەۆ وزبەكستاننىڭ سىرتقى ساياساتتاعى باسىمدىقتارىن جاريا ەتتى. وزبەكستان پرەزيدەنتى مىندەتىن ۋاقىتشا اقتارۋشى بولىپ بەكىتىلگەن ەل پرەمەر-مينيسترى شاۆكات ميرزيويەۆ رەسپۋبليكا پارلامەنتى قوس پالاتاسىنىڭ بىرلەسكەن وتىرىسىندا وزبەكستاننىڭ سىرتقى ساياساتتاعى باسىمدىقتارىن جاريا ەتتى. ءدال وسى كۇنى ول يسلام كاريموۆتى ماڭگى ەستە قالدىرۋ ءۇشىن ارنايى قاۋلى قابىلدادى. وندا جىل سايىن كاريموۆتىڭ تۋعان كۇنى اتالىپ ءوتىپ، ال دۇنيەدەن وتكەن كۇنى، قىركۇيەكتىڭ 2ء-سى – ەسكە الۋ كۇنى دەپ بەلگىلەندى. سونداي-اق قاۋلىدا ءبىراز مەكەمە، وقۋ ورىندارىنا يسلام كاريموۆتىڭ اتى بەرىلەتىنى كورسەتىلگەن. فەرعانا شاھارىنداعى ونەر سارايىنا، كولىك قۇراستىرۋ زاۋىتىنا، تاشكەنتتەگى حالىقارالىق اۋەجايعا، وسى قالاداعى مەملەكەتتىك تەحنيكالىق ۋنيۆەرسيتەتكە، سونداي-اق بىرنەشە ءىرى قالالاردىڭ كوشەلەرىنە مارقۇم پرەزيدەنتتىڭ اتى قويىلماق. بۇعان قوسا، كاريموۆتىڭ تۋعان قالاسى سامارقاندتا، تاشكەنتتە جانە بيلىككە كەلمەس بۇرىن ءوزى قىزمەت ەتكەن كارشي شاھارىندا ەسكەرتكىشى اشىلماق.
12 قىركۇيەك. ق ر پرەزيدەنتى سامارقاندقا باردى. مەملەكەت باسشىسى نۇرسۇلتان نازاربايەۆ جۇمىس ساپارىمەن وزبەكستان رەسپۋبليكاسىنا باردى. «وزبەكستان مەن قازاقستاننىڭ تاريحى، ءدىنى جانە مادەنيەتى ءبىر» ، - دەدى نازاربايەۆ وسى ساپاردا. قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ وزبەكستان رەسپۋبليكاسى پرەزيدەنتىنىڭ مىندەتىن ۋاقىتشا اتقارۋشى شاۆكات ميرزيويەۆپەن كەزدەستى.
2016 جىلدىڭ قىركۇيەك ايىندا ەكى ەل باسشىلارىنىڭ سامارقاندتاعى كەزدەسۋى بارىسىندا قول جەتكىزىلگەن ۋاعدالاستىقتارعا سايكەس، ءبىرقاتار پەرسپەكتيۆالىق جوبالار بىرلەسىپ جاسالۋدا.
16 قىركۇيەك. شاۆكات ميرزيويەۆ وزبەكستان پرەزيدەنتتىگىنە كانديدات رەتىندە ۇسىنىلدى. وزبەكستان پرەزيدەنتىنىڭ مىندەتىن ۋاقىتشا اتقارۋشى، پرەمەر-مينيستر شاۆكات ميرزيويەۆ ەل پرەزيدەنتتىگىنە كانديدات رەتىندە ۇسىنىلدى.
22 قىركۇيەك. اسقار ءمامين جۇمىس ساپارىمەن تاشكەنتكە باردى. مەملەكەت باسشىسى نۇرسۇلتان نازاربايەۆتىڭ تاپسىرماسىمەن ق ر پرەمەر-مينيسترىنىڭ ءبىرىنشى ورىنباسارى اسقار ءمامين باستاعان قازاقستاندىق دەلەگاسيا جۇمىس ساپارىمەن وزبەكستان استاناسىنا باردى.
7 قازان. قازاقستان مەن وزبەكستان 13 جىلعا سوزىلعان شەكارانى بەلگىلەۋ جۇمىسىن اياقتاۋى جاقىن ەكەنى حابارلاندى. 2003 جىلى باستالعان قازاقستان مەن وزبەكستان اراسىنداعى مەملەكەتتىك شەكارانى بەلگىلەۋ پروسەسى اياقتالۋعا جاقىن دەلىندى.
8 قازان. قازاقستان مەن وزبەكستان اراسىنداعى ىنتىماقتاستىقتى كەڭەيتۋ ماسەلەلەرى تالقىلاندى. ۇكىمەت ۇيىندە ق ر پرەمەر-مينيسترى باقىتجان ساعىنتايەۆ وزبەكستان رەسپۋبليكاسى پرەمەر-مينيسترىنىڭ ورىنباسارى ۋلۋگبەك روزۋكۋلوۆپەن كەزدەستى.
10 قازان. وزبەكستان پرەزيدەنتى قىزمەتىن ۋاقىتشا اتقارۋشى شاۆكات ميرزيويەۆ قازاقستان پرەزيدەنتى نۇرسۇلتان نازاربايەۆپەن تەلەفون ارقىلى سويلەستى. مەملەكەت باسشىلارى ساۋدا-ەكونوميكالىق، ينۆەستيسيالىق، كولىك-كوممۋنيكاسيالىق، مادەني-گۋمانيتارلىق جانە باسقا دا سالالارداعى ءوزارا ءتيىمدى ارىپتەستىكتى دامىتۋ جونىندە جاقىندا عانا كەلىسىلگەن ماسەلەلەردىڭ ورىندالۋ بارىسىن تالقىلادى. تاراپتار وزبەكستان مەن قازاقستاننىڭ ءتۇرلى سالالارداعى دەلەگاسيالارىنىڭ جۇمىس ساپارلارىن، ماڭىزدى كوممەرسيالىق كەلىسىمدەردىڭ ناتيجەلەرىن جوعارى باعالادى. شاۆكات ميرزيويەۆ پەن نۇرسۇلتان نازاربايەۆ ايماقتىق جانە حالىقارالىق سيپاتتاعى ماسەلەلەر جونىندە پىكىر الماستى. ەكى مەملەكەت باسشىلارى دوستىق پەن تاتۋ قارىم-قاتىناستى نىعايتىپ، ەكى جاقتى بايلانىستاردى ارتتىرۋ جونىندە كەلىستى.
5 جەلتوقسان. شاۆكات ميرزيويەۆ وزبەكستان پرەزيدەنتى بولىپ سايلاندى. سايلاۋ 4 جەلتوقساندا ءوتتى. وزبەكستان پرەزيدەنتىنىڭ مىندەتىن اتقارۋشى، پرەمەر-مينيستر شاۆكات ميرزيويەۆ مەملەكەت باسشىسى سايلاۋىندا 88،61% داۋىسپەن جەڭىسكە جەتتى. وزبەكستاندا سايلاۋ وتە سالا نازاربايەۆ پەن ميرزيويەۆ وڭىرلىك قاۋىپسىزدىكتى نىعايتۋ ماسەلەلەرى جونىندە پىكىر الماستى. قازاقستان پرەزيدەنتى نۇرسۇلتان نازاربايەۆ وزبەكستان رەسپۋبليكاسىنىڭ سايلانعان پرەزيدەنتى شاۆكات ميرزيويەۆپەن تەلەفون ارقىلى سويلەستى.
14 جەلتوقسان. شاۆكات ميرزيويەۆ وزبەكستان پرەزيدەنتى قىزمەتىنە رەسمي كىرىستى. تاشكەنتتە وزبەكستان رەسپۋبليكاسى پرەزيدەنتىنىڭ سالتاناتتى تۇردە لاۋازىمىنا كىرىسۋىنە ارنالعان وليي ماجليس پالاتالارىنىڭ بىرلەسكەن وتىرىسى ءوتتى.
2016 جىلدىڭ قورىتىندىسى بويىنشا، ەكى ەل اراسىنداعى تاۋار اينالىمى 2 ميلليارد دوللاردان اسقان. وزبەكستاندا 230-دان استام كاسىپورىندار قىزمەتى قازاقستاندىق سەرىكتەستەردىڭ قاتىسۋىمەن جۇزەگە اسۋدا. ادەتتەگىدەي، اۆتوكولىك جانە تەمىر جول كولىگى، اۋە قاتىناستارى سالاسىنداعى ءوزارا ارەكەتتەستىك بەلسەندى بولىپ وتىر.
2017 جىل. 6 قاڭتار. وڭتۇستىك قازاقستان وبلىسىنىڭ اكىمدىگىندە قازاقستان رەسپۋبليكاسىنىڭ وزبەكستان رەسپۋبليكاسىنداعى توتەنشە جانە وكىلەتتى ەلشىسى ەرىك وتەمبايەۆ پەن وزبەكستان رەسپۋبليكاسى سىرتقى ىستەر مينيسترلىگىنىڭ ايرىقشا تاپسىرمالار بويىنشا ەلشىسى يلحوم نەماتوۆ كەزدەسىپ، قوس مەملەكەتتىڭ تۋىستىق قارىم-قاتىناسىن ودان ءارى جاقسارتىپ، دامىتۋ جايىن تالقىلادى.
28 قاڭتار. قىزىلوردا وبلىسىنىڭ اكىمى قىرىمبەك كوشەربايەۆ باستاعان دەلەگاسيا شەكارالاس وڭىرلەرمەن ىنتىماقتاستىق بايلانىس ماسەلەلەرىن تالقىلاۋ ماقساتىندا جۇمىس ساپارىمەن وزبەكستان رەسپۋبليكاسىندا بولدى.
ساپار وزبەكستان رەسپۋبليكاسىنىڭ تۇڭعىش پرەزيدەنتى يسلام كاريموۆتىڭ سامارقاند قالاسىنداعى شاحي زيندا كەسەنەسىندەگى بەيىتىنە گۇل شوقتارىن قويۋدان، سونداي-اق داڭقتى قولباسشى، جەرلەسىمىز - ءجالاڭتوس ءباھادۇردىڭ كەسەنەسىنە ءتاۋ ەتۋدەن باستالدى.
دەلەگاتتار ءبىرقاتار كاسىپورىنداردى ارالاپ، كاسىپكەرلەرمەن جانە جەرگىلىكتى كومپانيا باسشىلارىمەن كەلىسسوزدەر جۇرگىزدى. سونىمەن قاتارا قىرىمبەك كوشەربايەۆ سامارقاند وبلىسىنىڭ اكىمى حيممات وكبۋتايەۆپەن كەزدەستى. وندا تاراپتار قىزىلوردا جانە سامارقاند وبلىستارىنىڭ اراسىنداعى وندىرىستىك جانە ساۋدا-ەكونوميكالىق ىنتىماقتاستىقتىڭ پەرسپەكتيۆالارىن تالقىلادى.
23 اقپان. وزبەكستان رەسپۋبليكاسىنىڭ پرەزيدەنتى شاۆكات ميرزيويەۆ قازاقستان رەسپۋبليكاسى پرەمەر-مينيسترىنىڭ ءبىرىنشى ورىنباسارى اسقار ءماميندى قابىلدادى. اسقار ءمامين وزبەكستان مەن قازاقستان اراسىنداعى ەكىجاقتى ىنتىماقتاستىق جونىندەگى بىرلەسكەن ۇكىمەتارالىق كوميسسيانىڭ كەزەكتى وتىرىسىنا قاتىسۋ ءۇشىن وزبەكستانعا كەلدى.
وزبەكستان پرەزيدەنتى ەكى ەلدىڭ وڭىرلەرى اراسىنداعى تىعىز قارىم-قاتىناستى ورناتۋ جانە نىعايتۋ قاجەتتىگىن، وسى ارقىلى ساۋدا بايلانىستارى جانە مادەني الماسۋ مۇمكىندىكتەرى اشىلاتىنىن باسا ايتتى. اسقار ءمامين جىلى قارسى العانى ءۇشىن شاۆكات ميرزيويەۆكە شىن جۇرەكتەن العىس ءبىلدىردى جانە قازاقستاننىڭ وزبەكستانمەن كەڭ اۋقىمدى ىنتىماقتاستىققا دايىن ەكەنىن راستادى.
ميرزيويەۆ بيلىككە كەلگەننەن كەيىن كوپتەگەن جاعىمدى جاڭالىقتار ورىن الدى. وزبەكستاندا قالا تۇرعىندارىنىڭ سانى اۋىل حالقىنان اسىپ كەتتى. وزبەكستان ەكسپو-2017 كورمەسىنە قاتىسۋ شارتىنا دا قول قويدى.
قورىتا كەلگەندە، ميرزيويەۆ قىسقا ۋاقىت ىشىندە ۇكىمەتتە، ايماقتىق اكىمشىلىكتەردە كادرلىق وزگەرىستەر جاسادى. سونداي-اق كاريموۆتىڭ بيلىگى كەزىندە ساحناعا شىعۋعا تىيىم سالىنعان بەلگىلى ارتيستەر ساحنا تورىنە قايتا ورالدى. كەز كەلگەن وزبەكستان ازاماتى ءوزىن تولعاندىرعان ماسەلە جونىندە جاۋاپ الا الاتىن قوعامدىق قابىلداۋ ورىندارىن اشتى. الەۋمەتتىك جەلىلەردە پرەمەر-مينيستر جانە پارلامەنتتىڭ ارنايى بەتتەرى پايدا بولدى.
كاسىپكەرلەرگە دە ءبىرشاما جەڭىلدىكتەر جاسادى. ول – «كاسىپكەرلىكتى جەدەلدەتىپ دامىتۋدى، جەكە مەنشىكتى جانجاقتى قورعاۋ مەن ىسكەرلىك احۋالدى ساپالى جاقسارتۋدى قامتاماسىز ەتۋ جونىندەگى قوسىمشا جەڭىلدىكتەر تۋرالى» جارلىعى. جارلىق بيۋروكراتيالىق كەدەرگىلەردى جويىپ، ەل ەكونوميكاسىنا تارتىلعان ينۆەستيسيانى قورعايتىن بولادى. ۇستىمىزدەگى جىلدىڭ قاڭتارىنان باستاپ، كاسىپكەرلىك سۋبەكتىلەرىنە جوسپاردان تىس تەكسەرىس جۇرگىزىلمەيدى. سونىمەن قاتار، جاقىن ۋاقىتتا ۇلتتىق ۆاليۋتانى ەركىن اينالىمعا ەنگىزۋدى كوزدەپ وتىر. بىلايشا ايتقاندا، قارجى نارىعىن ۇلكەن رەفورما كۇتىپ تۇر. بۇل ماسەلە، وتكەن جىلدىڭ قاراشا ايىندا باستالعان. سول كەزدە-اق، شاۆكات ميرزيويەۆ كوپشىلىكتىڭ تالقىسىنا «ۆاليۋتا ساياساتىنىڭ باسىمدى باعىتتارى تۋرالى» قاۋلىنىڭ جوباسىن شىعاردى. ەندى سونى ىسكە اسىرۋ عانا قالدى.
يسلام كارىموۆتىڭ كەزىندەگىدەي ەشقانداي ايماقتىق، نە بولماسا جاھاندىق وداق، ۇيىمدارعا كىرمەي-اق، ميرزيويەۆ وزبەك ەكونوميكاسىن الەۋەتتى ەتۋگە كۇش سالا باستادى. سونىڭ ءبىرى – ەلدىڭ وڭتۇستىگىندە بىرنەشە ەركىن ەكونوميكالىق ايماقتار اشۋ. بۇرىننان جۇمىس ىستەپ تۇرعان ءۇش ەركىن ەكونوميكالىق ايماققا الداعى كەزدە جۇمىسى باستالاتىن ءتورت جاڭا ەركىن ەكونوميكالىق ايماق قوسىلاتىن بولسا، وزبەكستان تىڭ سەرپىن الادى.
ميرزيويەۆتىڭ سوڭعى ءبىر شىعارعان جارلىعى ول، ارميانى زاماناۋي قارۋ-جاراقپەن جاراقتاندىرۋ. اسكەري تەحنيكا مەن اتىس قۇرالدارىن سىرتتان الماي، وزبەك جەرىندە ءوندىرۋ كوزدەلگەن. بۇدان بىلاي وزبەك ارمياسى ساپا جاعىنان دا، قارۋلانۋ جاعىنان دا باسىمدىلىققا يە بولىپ قالا بەرەتىنى انىق. ول ۆيزا جۇيەسىنە دە وزگەرىس ەنگىزۋدى قولعا الدى.
شاۆكات ميرزيويەۆتىڭ اشىق قوعامعا قادام باسقانىن مىنادان دا بايقاۋعا بولادى. ول – الداعى ۋاقىتتا وبلىس، قالا اكىمدەرىن تەك جەرگىلىكتى حالىقتىڭ سايلاۋى ارقىلى عانا بيلىككە كەلەتىنىنە كۇش سالۋى. وسىدان-اق وزبەكستان ۇلكەن وزگەرىسكە بەت بۇرعانىن كورۋگە بولادى. ءوز ەلىندە از عانا ۋاقىتتىڭ ىشىندە وسىنداي ۇلى وزگەرىستەردى باستاعان شاۆكات ميرزيويەۆتىڭ قازاقستانعا باستى ءمان بەرىپ وتىرعانىن دا تۇسىنۋگە بولادى.
ءدال وسى ماسەلە جونىندە ءماجىلىستىڭ حالىقارالىق ىستەر، قورعانىس جانە قاۋىپسىزدىك كوميتەتى ءتوراعاسى ماۋلەن اشىمبايەۆ وي قوزعادى. ونىڭ ايتۋىنشا، ورتا ازيادا قوڭسىلاس وتىرعان رەسپۋبليكالار ءوزارا بايلانىستى نەعۇرلىم رەتتەپ، ونى جاڭا دەڭگەيگە كوتەرۋى ءتيىس. ويتكەنى، بۇل ەلدەردىڭ اراسىندا قوردالانىپ قالعان ماسەلەلەر جەتكىلىكتى.
سونىڭ ءبىرى – ترانسشەكارالىق وزەندەر. ونى بىرلەسە پايدالانۋ. ايماقتىڭ ەكولوگيالىق تۇيتكىلدەرىن بىرلەسە قاراۋ، ترانزيتتىك-بايلانىس سالاسىن كۇشەيتۋ، اسىرەسە، سوڭعى جىلدارى قاۋىپتىلىگى تىم ارتىپ بارا جاتقان تەرروريزم ءھام ەكسترەميزممەن كۇرەسۋ، لاڭكەستىكتىڭ الدىن الۋ ماسەلەلەرى. وسىنىڭ ءبارىن ساراپقا سالا كەلە دەپۋتات ايماقتا جاڭا ءبىر وڭىرلىك وداق دۇنيەگە كەلۋگە ءتيىس، دەپ ەسەپتەيدى. ءبىراق، بۇعان وڭىردەگى وزگە ەلدەر قالاي قارايدى؟ ويتكەنى، ءبىراز جىل بۇرىن ەلباسى نۇرسۇلتان نازاربايەۆ «ورتا ازيا وداعىن قۇرايىق» دەگەن باستاما كوتەرگەن ەدى. ويتكەنى بۇل ەلدەردىڭ اۋماعىندا اسا ءىرى كومىرسۋتەگى وتىنىنىڭ قورى بار. سونداي-اق، باتىس پەن شىعىستى، سولتۇستىك پەن وڭتۇستىكتى قوسىپ جاتاتىن دالىزدىك ءرول اتقارادى. ساۋدا-ساتتىقتىڭ كورىگىن قىزدىراتىن ءھام ارعى تەگى تامىرلاس جەتپىس ميلليونعا تارتا حالىق ءومىر سۇرەدى. بۇدان تىس، رەسەي، جۇڭگو، ءۇندىستان، پاكىستان جانە يران سەكىلدى الىپ ەلدەرمەن شەكارالاس.
دەمەك، وداق قۇرىلىپ جاتسا، ۇتپاسا ۇتىلماسى انىق-تۇعىن. سونىمەن قاتار، وسى ايماققا قىزىعىپ، باسەكەلەستىك تانىتىپ، ىقپال ەتۋگە اسىق بولىپ وتىرعان الىپ مەملەكەتتەردىڭ جەمساۋىنا ءتۇسىپ كەتپەۋىنىڭ دە ءبىر كەپىلى وسى وداق بولۋى ءتيىس ەدى. الايدا، جەكەلەگەن ەلدەر باسشىلارىنىڭ جەكە امبيسياسى ورتا ازيا وداعىنىڭ دۇنيەگە كەلۋىنە بوگەت بولعانى بەلگىلى. وسى جولى كوتەرىلىپ وتىرعان جاڭا ءبىر باستاماعا ولار قالاي قارايدى؟ بۇل سۇراقتىڭ جاۋابى وسى كەزدەسۋدە ناقتىلانۋعا ءتيىس.
ايتا كەتسەك، وزبەكستان باسشىسى ناۋرىز مەرەكەسى قارساڭىندا كەشە 22 ناۋرىزدا رەسمي ىس-ساپارمەن كەلدى. پرەمەر-مينيستر باقىتجان ساعىنتايەۆ قارسى العان بولاتىن.
بۇگىن ەلباسى نازاربايەۆ اقوردادا وزبەك باسشىسىن زور سالتاناتپەن قابىلدادى. الداعى ۋاقىتتا ەكى ەل اراسىنداعى ىنتىماقتاستىق تالقىلاناتىن بولادى.
نۇرعالي نۇرتاي
