بۇل ءفيلمدى ق ر مادەنيەت جانە سپورت مينيسترلىگى تاپسىرىسى بويىنشا ش.ايمانوۆ اتىنداعى «قازاقفيلم» اق «الماتىفيلم» كينوستۋدياسىمەن بىرلەسە وتىرىپ شىعارعان دەپ حابارلايدى "قامشى" اقپاراتتىق اگەنتتىگى. گۇلسىم ورازالييەۆانىڭ «نۇرتاس وڭداسىنوۆ» اتتى كىتابىنىڭ جەلىسى بويىنشا تۇسىرىلگەن فيلمدە، قازاقستان ۇكىمەتىن ەڭ اۋىر جىلداردا (1938-1951) 13 جىل تابان اۋدارماي باسقارعان رەسپۋبليكامىزدىڭ ەكونوميكاسى مەن ونەركاسىبىنىڭ، مادەنيەتى مەن ءعىلىم-بىلىمىنىڭ دامۋىنا ۇلانعايىر ۇلەس قوسقان مەملەكەت جانە قوعام قايراتكەرى نۇرتاس ءداندىباي ۇلى وڭداسىنوۆتىڭ ءومىرى مەن قىزمەتى باياندالادى. ءفيلمنىڭ رەجيسسەرى – وڭداسىن تاستانوۆ.
دەرەكتى ءفيلمنىڭ ماقساتى – حالقى ءۇشىن قالتقىسىز ەڭبەك ەتكەن ەردىڭ اتىن ۇمىتپاي، ونىڭ ونەگەلى ىستەرىن بۇگىنگى وسكەلەڭ ۇرپاققا دارىپتەپ ۇلگى ەتۋ.
دەرەكتى ءفيلمنىڭ تۇساۋكەسەرىنە جازۋشى-دراماتۋرگ د. يسابەكوۆ، اقىن، ق ر مەملەكەتتىك سىيلىعىنىڭ لاۋرەاتى ت. مەدەتبەكوۆ، قازاقستان جۋرناليستەر وداعى سىيلىعىنىڭ لاۋرەاتى، «قازاق ءۇنى» گازەتىنىڭ باس رەداكتورى قازىبەك يسا، وڭداسىنوۆتانۋشى گ. ورازالييەۆا ت.ب. ءبىرقاتار بەدەلدى تۇلعالار قاتىستى.
نۇرتاس وڭداسىنوۆ – قازاقستان ۇكىمەتىن ەڭ اۋىر ۇلى وتان سوعىسى كەزىندە جانە سوعىستان كەيىنگى جىلداردا رەسپۋبليكانىڭ ىشكى ەكونوميكاسى مەن مادەنيەتىنىڭ، ءعىلىم-بىلىمىنىڭ دامۋىنا بارىنشا كۇش سالا وتىرىپ جان-جاقتى دامىتا باسقارعان دارا باسشى. ول 1938 جىلى شىعىس قازاقستان وبلىسى اتقارۋ كوميتەتىنىڭ ءتوراعاسى، 1938-1951 جىلدار ارالىعىندا (13 جىل) قازاق سسر ۇكىمەتىنىڭ ءتوراعاسى، 1951-1953 جىلدارى كپسس وك جانىنداعى جوعارى پارتيا مەكتەبىندە وقىپ، 1953-1954 جىلى قازاق سسر جوعارعى سوۆەتى پرەزيديۋمىنىڭ ءتوراعاسى، 1955-1962 جىلدارى گۋريەۆ وبلىستىق اتقارۋ كوميتەتىنىڭ ءتوراعالىق قىزمەتىنەن كەيىن 5 جىل وبلىستىق كپ وك ءبىرىنشى حاتشىسى قىزمەتىن اتقاردى.
سوعىس جىلدارىندا، رەسپۋبليكامىزدا عىلىم اكادەمياسىنىڭ جەكە شاڭىراق كوتەرۋىنە، قازاق مەملەكەتتىك قىزدار پەداگوگيكالىق ينستيتۋتى مەن ۇلتتىق كونسەرۆاتورياسىن قۇرۋعا، شەت تىلدەر، دەنە تاربيەسى جانە بارلىق وبلىس ورتالىقتارىندا مۇعالىمدەر ينستيتۋتىنىڭ اشىلۋىنا بىردەن ءبىر ۇيتقى بولعان قايراتكەر تۇلعا.
سونىمەن قاتار، ەلىمىزدەگى ءىرى قۇرىلىستار: ەرتىس-قاراعاندى، ارىس-تۇركىستان، ءمىرزاشول كانالدارىنىڭ، اتىراۋ، تەمىرتاۋ، جەزقازعان، بالقاش، اقتوبەدەگى ءىرى زاۋىتتاردىڭ، سونىمەن قاتار مويىنتى-شۋ تەمىر جولىنىڭ سالىنۋىنا باسشىلىق جاساپ، ەرەكشە ىسكەرلىگىمەن تانىلدى.
ال، بۇگىنگى «ءقازاقفيلمنىڭ» دە نەگىزى سول ۋاقىتتان باستاۋ الادى. باسقا رەسپۋبليكاعا ەۆاكۋاسيامەن كەتىپ بارا جاتقان «موسفيلم» مەن «لەنفيلمدى» قازاقستان ۇكىمەتى اتىنان ارنايى قازاقستانعا شاقىرتقان نۇرتاس وڭداسىنوۆ ەكەنىن ءقازىر بىرەۋ بىلسە، بىرەۋ بىلمەيدى. ەكى كينوستۋديانىڭ حاس شەبەرلەرىنىڭ قولداۋىمەن «رايحان»، «اباي اندەرى» فيلمدەرى ءتۇسىرىلدى.
«زەينەتكەرلىككە شىققاننان سوڭ شىعارماشىلىق قىزمەتپەن اينالىسىپ، 1969 جىلى «ارابشا-قازاقشا تۇسىندىرمە سوزدىگى»، 1974 جىلى «پارسىشا-قازاقشا تۇسىندىرمە سوزدىگى» جارىق كورىپ، قالىڭ وقىرماننىڭ ىستىق ىقىلاسىنا بولەندى» — دەيدى د. ا. قونايەۆ ءوزىنىڭ «ءوتتى داۋرەن وسىلاي» كىتابىندا.
ن.د. وڭداسىنوۆ ءۇش رەت لەنين، ەكى رەت ەڭبەك قىزىل تۋ وردەنىمەن، كوپتەگەن مەدەلدارمەن، قۇرمەت گراموتالارمەن ماراپاتتالعان.
