استانا، 11 مامىر، ءماجىلىس ءۇيى. پارلامەنت ماجىلىسىندە 2017 جىلعى 12 مامىردا «قازاقستان رەسپۋبليكاسىندا حالىقتى تەگىن مەديسينالىق كومەكتىڭ كەپىلدىك بەرىلگەن كولەمى شەڭبەرىندە دارىلىك زاتتارمەن قامتاماسىز ەتۋ جانە فارماسيەۆتيكا سالاسىنىڭ جاي-كۇيى جانە دامۋى تۋرالى» تاقىرىبىندا پارلامەنتتىك تىڭداۋ وتەدى دەپ حابارلايدى قامشى اقپاراتتىق اگەنتتىگى پارلامەنتتىڭ باسپا ءسوز قىزمەتىنە سىلتەمە جاساپ.
پارلامەنت دەپۋتاتتارى دارىمەن قامتاماسىز ەتۋدىڭ وزەكتى ماسەلەلەرىن جانە وسى سالاداعى پروبلەمالاردى شەشۋ جولدارىن تالقىلاماق.
پارلامەنتتىك تىڭداۋعا ءماجىلىس ءتوراعاسى نۇرلان نىعماتۋلين جانە پرەمەر-مينيستردىڭ ءبىرىنشى ورىنباسارى اسقار مامين قاتىسادى دەپ كۇتىلۋدە.
شاراعا دەنساۋلىق ساقتاۋ ءمينيسترى ەلجان ءبىرتانوۆتىڭ، ينۆەستيسيالار جانە دامۋ ءمينيسترى جەڭىس قاسىمبەكتىڭ، اقتوبە وبلىسىنىڭ اكىمى بەردىبەك ساپاربايەۆتىڭ، سونداي-اق دارىلىك ساياسات سالاسىنداعى حالىقارالىق ساراپشى فرانس ستوببەلااردىڭ (نيدەرلاند) تاقىرىپتىق باياندامالارى تىڭدالاتىن بولادى.
سونىمەن بىرگە، تىڭداۋدى دايىنداۋ جونىندەگى ارنايى ۋاقىتشا كوميسسيانىڭ جەتەكشىسى، ءماجىلىس دەپۋتاتى بەيبىت مامرايەۆ بايانداما جاسايدى.
پارلامەنتتىك تىڭداۋعا سونداي-اق، ورتالىق جانە جەرگىلىكتى اتقارۋشى ورگاندار وكىلدەرى، ءىرى فارماسيەۆتيكالىق كاسىپورىنداردىڭ باسشىلارى مەن شەتەلدىك ساراپشىلار، مەديسينا قىزمەتكەرلەرى، ۇكىمەتتىك ەمەس ۇيىمدار مەن بۇقارالىق اقپارات قۇرالدارى وكىلدەرى قاتىسادى دەپ جوسپارلانعان. تىڭداۋ قورىتىندىسى بويىنشا قازاقستان رەسپۋبليكاسىنىڭ ۇكىمەتىنە ۇسىنىستار ازىرلەنەدى.
