ق ر اقپارات جانە كوممۋنيكاسيالار ءمينيسترى داۋرەن ابايەۆ حالىق بانك پەن قازكوممەرسبانك اراسىنداعى بولۋى ىقتيمال مامىلەگە قاتىستى ناقتى ناتيجە بولمايىنشا، اقپارات تاراتىپ، جۇرتتى دۇرلىكتىرۋگە بولمايدى دەپ ەسەپتەيدى، دەپ جازادى قامشى اقپاراتتىق اگەنتتىگى.
«بانكتەردىڭ بىرىگۋى - قالىپتى پروسەسس. ەل تۇرعىندارى ءوز دەپوزيتتەرىن جوعالتىپ الامىز دەپ قورىقپاۋى كەرەك. بالكىم، حالىق وتكەن تاجىريبەلەرگە قاراپ، ۋايىمداپ وتىرعان شىعار. مۇنداي ۋايىم مەن كۇدىككە ەش نەگىز جوق. ەڭ نەگىزگىسىن اتاپ وتكىم كەلەدى: قازكوم دا، حالىق بانك تە قازاقستان ازاماتتارىنىڭ سالىمدارىن كەپىلدەندىرۋ قورىنىڭ قاتىسۋشىلارى. سول سەبەپتى، ەشقانداي سۇراقتار مەن الاڭداۋشىلىقتار تۋىنداماۋى ءتيىس. ناقتى ناتيجەگە قول جەتكىزبەيىنشە، مۇنداي دۇنيەلەردى جاريالاۋعا، جارنامالاۋعا بولمايتىنىن ءتۇسىنۋىمىز قاجەت. بۇل ەندى كوممەرسيالىق قۇپيا دەپ اتالاتىن بولەك ماسەلە»، - دەدى مينيستر «حابار» تەلەارناسىنداعى «وتكرىتىي ديالوگ» جوباسى اياسىندا.
«حالىق بانكى» اق باسقارما ءتورايىمى ءۇمىت شاياحمەتوۆانىڭ ايتۋىنشا، ەگەر مامىلە جۇزەگە اسسا، حالىق بانك قازكومدى ساتىپ الىپ، ءوزىنىڭ ەنشىلەس بانكىنە اينالدىرادى.
«ازىرگە قازكوممەن ناقتى كەلىسىمشارت جاسالعان جوق. مامىردىڭ سوڭىندا مامىلە اياقتالادى دەپ جوسپارلانعان ەدى، الايدا بۇل مەرزىم كەيىنگە شەگەرىلدى. ءقازىر كازكومنىڭ جۇمىس پارامەترلەرى تەكسەرىلىپ جاتىر. سىرتتان اۋديتور، كونسۋلتانت شاقىردىق. سونداي-اق، ۇلتتىق بانكتەن كەڭەس الىپ جاتىرمىز»، - دەدى ءۇ. شاياحمەتوۆا.
سونداي-اق، داۋرەن ابايەۆ قازاقستاندىقتاردى زەينەتاقى قاراجاتتارى تۋرالى الاڭداماۋعا شاقىرادى، ويتكەنى ولار مەملەكەتتىك كەپىلدەمەمەن قورعالعان.
«قازىرگى ۋاقىتتا تەكسەرۋ جۇرگىزىلىپ جاتىر، انىق-قانىعى جاريالانىپ، قوعام نازارىنا ۇسىنىلادى. قازاقستاندا زەينەتاقى جيناقتارىنا مەملەكەتتىك كەپىلدەمە بار، ونى ەشكىم الىپ تاستاعان جوق، ول جەردە ءتىپتى ينفلياسيا دا ەسكەرىلەدى. سونىدىقتان، زەينەتاقى الۋى ءتيىس ازاماتتار مىندەتتى تۇردە الادى. وعان ەشقانداي كۇمان جوق، ەشكىم الاڭداماسىن»، — دەپ مالىمدەدى اقپارات جانە كوممۋنيكاسيالار ءمينيسترى داۋرەن ابايەۆ حابار تەلەارناسىنداعى "وتكرىتىي ديالوگ" جوباسىندا.
ءمينيستردىڭ ايتۋىنشا، ءتيىستى تەكسەرۋ ناتيجەسىندە مۇنداي ينۆەستيسيالاردىڭ دۇرىس-بۇرىستىعى انىقتالادى.
شولۋشى: گۇلىم جاقان
