كۇيەۋىم باسقا ايەلمەن كەتىپ قالدى دەگەن شاعىم بۇگىندە كوپ ايتىلاتىن بولدى. كەيبىر ايەلدەر ءتىپتى ءۇش-تورت بالاسىمەن جىلاپ-ەڭىرەپ قالىپ جاتادى. بۇگىنگە دەيىن قانشاما ايەلدەن وسىنداي شاعىم ەسىتتىم. جاسىنان دا، ۇلكەندەرىنەن دە. ءوزىنىڭ اق نەكەلى ايەلىن وسىنداي جاعدايعا قالدىرعان ەركەكتەر دە كۇن ساناپ كوبەيۋدە. نامازىن وقىپ ءجۇرىپ، وسىنداي قادامعا بارعانداردى ويلاساڭىز، ەرىكسىز جاعاڭىزدى ۇستايسىز. سەبەبىن سۇراساڭ: «ارادا ماحاببات بولماي كەتتى. توسەگىمىز سۋىپ كەتتى. باسقا ءبىر كەلىنشەككە عاشىق بوپ قالدىم» دەگەن سەكىلدى ءبىر نارسەلەردى ايتىپ اقتالعىسى كەلەدى. جاسىراتىنى جوق، سوعان كەيدە سىرتتا جۇرگەن بوتەن قىز-كەلىنشەكتەر سەبەپ بولىپ جاتادى. بىرەۋ ءتانىن سۇلۋ قىپ كورسەتەدى. تاعى بىرەۋى مىنەزى جاقسى سەكىلدى ءرول وينايدى. قىسقاسى، مىڭ ءبىر جولمەن اربايدى، ازعىرادى، تۇزاق قۇرادى. اقىر سوڭىندا بىرەۋدىڭ جاپ-جاقسى وتباسىنىڭ گۇرس ەتىپ قۇلاۋىنا سەبەپ بولادى. ايتىڭىزدارشى، كوزىنىڭ نۇرى بالا-شاعاسىن تاستاپ، قاي-قايداعى بىرەۋدىڭ جەتەگىندە كەتە بارعان ەركەك، شىنىندا دا، باقىتتى بولا الا ما؟ بىرەۋدىڭ شاڭىراعىن شايقالتۋعا سەبەپ بولعان ايەل ءماز بولا ما؟ اللا تاعالا ولاردىڭ قالعان ومىرىنە بەرەكە بەرە مە؟
قالعان ايەل، بالا-شاعا جىلايدى، كوز جاسىن كول قىلادى. ۋايىمدايدى. تىعىرىقتان شىعاتىن جول ىزدەيدى. انا بەيشارا شىرىلداپ وتىرعان بالالارىنىڭ اس-سۋىن تابۋعا باس قاتىرادى. بۇرىنعى ايەلىمنىڭ بارلىق جاعدايىن جاساپ قويدىم دەيتىندەر بار. اس-اۋقاتىن اپەرگەنمەن، ولارعا اكەلىك مەيىرىمدى ەندى كىم توگەدى؟ ول بالا ەندى مەكتەبىندە وقيتىن دوستارىنىڭ بەتىنە قالاي قارايدى؟ اكەم ءبىزدى تاستاپ كەتتى دەي مە؟ وزگە ايەلمەن كەتكەندەر، وتىنەم، رەنجىمەڭىزدەر. ءبىراق سىزدەرگە قويار سۇراعىم بار.
- ءاۋ باستا بىرەۋدىڭ اياۋلى قىزىن الىپ، ۇيىڭىزگە اكەلىپ، ونىڭ پاك ومىرىمەن قوشتاسۋىنا سەبەپ بولعانىڭىز ەسىڭىزدە مە؟ ءسىز بولماعاندا، ول قىز سول كەزدە بار ءومىرىن باسقا ءبىر نامىستى ەر ازاماتقا ارناماس پا ەدى؟
- اتا-انا، باۋىرلارىن تاستاپ، سىزبەن بىرگە كەتە باردى. ءسىزدىڭ ايتقانىڭىزبەن ءجۇرىپ-تۇردى. ءسىز قينالساڭىز ول دا قينالدى، قۋانساڭىز ول دا بىرگە قۋاندى.
- العان جارىڭىزدىڭ قانشا رەت ۇيقىسىن بۇزدىڭىز؟ ەسىڭىزدە مە؟ ءسويتىپ ءجۇرىپ ءسىزدىڭ جاعدايىڭىزدى جاساپ، تاماعىڭىزدى بەرىپ، كيىمىڭىزدى تازالاپ بەردى.
- ءسىزدىڭ ارتىڭىزدا اتىڭىزدى، اۋلەتىڭىزدى جالعاستىراتىن، قايتىس بولساڭىز ارتىڭىزدان قۇران وقيتىن پەرزەنتتى سول ايەل توعىز اي قينالىپ قۇرساعىندا تاسىدى. ەسىڭىزدە مە؟
- تۋعان-تۋىس، دوستارىڭىز كەلگەندە، تالاي رەت سول ايەل اياعىنان تىك تۇرىپ قىزمەت ەتتى. سولاي ەمەس پە؟
- وسىلايشا جارتى نەمەسە ودان دا كوپ عۇمىرىن ءسىز سەكىلدى بىرەۋدىڭ جولىنا ارنادى. ءسىز بولماعاندا، وسىنداي بەيمازا كۇيگە تۇسەر مە ەدى؟
ال ەندى بولار ءىستى بولدىرىپ، بوياۋىن ءسىڭدىرىپ العان سوڭ: «مەن باسقا ايەلمەن كەتەمىن» دەپ سونداي ادامنىڭ نازىك جۇرەگىنە قاياۋ ءتۇسىرۋ ەركەك ادامعا جاراسا ما؟
ال ەندى جانۇياسى بار ەركەكتەرمەن بىرگە جۇرگەن قىز-كەلىنشەكتەردىڭ نازارىنا!
- بىرەۋدىڭ وتباسىن بۇزۋ ادامنىڭ ەمەس، شايتاننىڭ ءىسى.
- ءسىزدىڭ سۇيگەنىڭىزدەن قالعان جەسىر مەن جەتىمنىڭ كوز جاسى وتە اۋىر.
- شىن مۇسىلمان بىرەۋلەردىڭ اراسىن بۇزبايدى، كەرىسىنشە تاتۋلاستىرادى.
ماسەلەنىڭ اقيقاتى قايسى؟
ارداقتى پايعامبارىمىز (س.ا.ۋ.) ءبىر كۇنى: «سەندەردىڭ ەڭ جاماندارىڭ كىم ەكەنىن ايتايىن با؟» -دەدى. ساحابالار: «ارينە، ايتىڭىز، ۋا اللانىڭ ەلشىسى!» - دەدى. سوندا ول: «ادامدار اراسىنا ءسوز تاسيتىن، وسەك تاراتاتىن، ءبىر-بىرىن سۇيەتىندەردىڭ اراسىن بۇزىپ، اراز ەتەتىن جانە جازىقسىز ادامدارعا ءجونسىز كىنا ارتاتىندار» دەپ جاۋاپ بەردى. » تاعى ءبىر حاديستە: «ەكى كىسىنىڭ اراسىن بۇزۋعا تىرىساتىندار جۇماققا كىرمەيدى»، - دەلىنگەن.
ەندى ويلاپ كورەيىك. ادامداردىڭ ەڭ جامانى بولۋ، جۇماققا كىرە الماۋ – بۇلار وڭاي نەمەسە بەكەر ايتىلا سالعان سوزدەر ەمەس. سوندىقتان اركىم ءوزىنىڭ وتباسىمەن باقىتتى بولسىن. وزگەنىڭ جانۇياسىن بۇزۋدان اۋلاق بولايىق. ال ەركەكتەر اللا الدىندا نەكەمىز قيىلعان ءوز جۇبىمىزبەن باقىتتى بولۋعا تىرىسايىق. اللا مومىن ەلىمىزدى نامىستى ەركەكتەر مەن ارلى ايەلدەردەن كەندە قىلماسىن!
جازبا muslim.kz سايتىنان الىندى.
