قۇقىق قورعاۋ ورگاندارى مەن ارنايى قىزمەت وكىلدەرى ءبىرقاتار ەكسترەميستىك ۇيىمداردىڭ زاڭسىز ارەكەتىن انىقتادى. تەررورلىق ارەكەتتى جۇزەگە اسىرماق بولعان 220-دان استام ادام قىلمىستىق جاۋاپكەرشىلىككە تارتىلدى. بۇل تۋرالى ق ر ءماجىلىس ءتوراعاسى نۇرلان نىعماتۋللين كوشپەلى وتىرىستا ايتتى، دەپ حابارلايدى قامشى اقپاراتتىق اگەنتتىگى قازاقپاراتقا سىلتەمە جاساپ.

اقتوبەگە پارلامەنت ءماجىلىسىنىڭ حالىقارالىق ىستەر، قورعانىس جانە قاۋىپسىزدىك كوميتەتىنىڭ دەپۋتاتتارى كەلىپ، كوشپەلى وتىرىس وتكىزگەنىن بۇعان دەيىن حابارلاعان بولاتىنبىز.

جيىندا پارلامەنت ءماجىلىسىنىڭ ءتوراعاسى نۇرلان نىعماتۋللين 5 ماۋسىمداعى لاڭكەستىك وقيعا بارىنە ساباق بولعانىن جەتكىزدى.

«بەيبىتشىلىكتى قورعاۋ، تىنىشتىعىمىزدى ساقتاۋ جانە تاتۋلىقتى كۇشەيتۋ بۇل ءبىزدىڭ بابالارىمىزدان كەلە جاتقان قاسيەتتى جول. ەل قاۋىپسىزدىگى ءارقاشاندا تۇراقتى دامۋدىڭ كەپىلى. سوندىقتان تاۋەلسىزدىك العان كۇننەن باستاپ ەلىمىزدە قاۋىپسىزدىكتى نىعايتۋ ءۇشىن كوپتەگەن جۇمىستار قولعا الىندى، زاڭ جاعىنان قولداۋعا ەرەكشە كوڭىل ءبولىندى. ماسەلەن، «تەرروريزمگە قارسى ءىس-قيمىل» زاڭىن قابىلداپ، وعان ەلباسى قول قويدى. وتكەن جىلى وسى ماسەلەگە بايلانىستى زاڭنامالارعا ءبىرقاتار وزگەرتۋلەر ەنگىزىلدى. قازاقستاندا تەرروريزممەن كۇرەس جونىندەگى ارنايى كوميسسيا دا قۇرىلدى. ۇلكەن شارالار اتقارىلىپ جاتىر. دەگەنمەن وتە ساق بولۋىمىز كەرەك. سەبەبى، بۇگىنگى كۇنى بۇكىل الەمدە ءتۇرلى ءقاۋىپتى جاعدايلار بولىپ جاتىر. ەكستەرميزم جانە لاڭكەستىك ماسەلەسى ەشقانداي ۇلتقا، دىنگە قارامايتىن وتە ۇلكەن قاۋىپ-قاتەر. وتكەن جىلى ويلاماعان جەردەن تەررورلىق اكت تىركەلدى. بۇل بارىمىزگە ۇلكەن ساباق بولدى. ەندى ول قايتالانباۋى ءۇشىن بارلىق قوعامدىق ۇيىم، ساياسي پارتيالار، مەملەكتتىك ورگاندار بىرلەسە جۇمىس ىستەۋىمىز كەرەك. سەبەبى ول تەك قۇقىق قورعاۋ ورگاندارىنىڭ عانا ەمەس، بارشامىزدىڭ ورتاق مىندەتىمىز»،- دەدى نۇرلان نىعماتۋللين.

ءماجىلىس ءتوراعاسى ءوز سوزىندە جاستارمەن جۇمىستى كۇشەيتۋدى تاپسىردى. جيىن كەزىندە قۇقىق قورعاۋ ورگاندارى مەن ارنايى قىزمەت وكىلدەرى وتكەن جىلدان بەرى ءارتۇرلى تەررورلىق ارەكەتتى جۇزەگە اسىرماق بولعان 220-دان استام ادامدى انىقتاپ، ولار قىلمىستىق جاۋاپكەرشىلىككە تارتىلعانى جانەبۇل باعىتتاعى جۇمىس ءارى قاراي جالعاساتىنى ايتىلدى.