19 مامىردا قازاقستان باسپا ءسوز ورتالىعىندا «التىن كالام» ادەبي جۇلدەسىنىڭ ۇيىمداستىرۋ كوميتەتى جانە “ZHERSU” ينۆەستيسيالىق-وندىرىستىك كورپوراسياسى بالالار جازۋشىلارىنا ارنالعان حالىقارالىق «دارابوز» بايقاۋى مەن «التىن قالام» جۇلدەسىنىڭ بىرىكتىرىلگەنىن، سونداي-اق ەسەنقۇل مامان ۇلى اتىنداعى جىل سايىنعى سىيلىقتىڭ بەرىلەتىنىن جاريالادى.
«التىن قالام 2017» ادەبي جۇلدەسى باۋىرجان وسپانوۆ جەتەكشىلىك ەتەتىن «ZHERSU» ينۆەستيسيالىق-وندىرىستىك كورپوراسياسىنىڭ، سونداي-اق ارمان شورايەۆتىڭ، قازاقستان باسپا ءسوز ورتالىعىنىڭ، «ارۋنا» باسپاسىنىڭ قولداۋىمەن وتەدى.
«التىن قالام 2017» ادەبي جۇلدەسىنىڭ باس اقپاراتتىق سەرىكتەسى «رۋسسكوە راديو». سونداي-اق «كتك»، «31 تەلەارنا»، «ايقىن»، «جاس الاش» باسىلىمدارى اقپاراتتىق قولداۋ كورسەتەدى.
بيىل العاش رەت «دارابوز» بايقاۋى «التىن قالام» ادەبي جۇلدەسىنىڭ شارتتارى بويىنشا وتەدى. جەڭىمپاز “ZHERSU” ينۆەستيسيالىق-وندىرىستىك كورپوراسياسى اتىنان 1000000 تەڭگە سىيلىق الادى. سونىمەن قاتار، ەسەنقۇل مامان ۇلى اتىنداعى سىيلىقتىڭ يەگەرى 1000000 تەڭگەگە يە بولادى. بۇل سىيلىق بيىل الاشوردا تاقىرىبىنا جازىلعان ۇزدىك شىعارماعا بەرىلەدى.
بيىلعى شارا الاشوردانىڭ 100 جىلدىعىنا ارنالادى. بايقاۋعا قازاق جانە ورىس تىلىندە جازىلعان جۇمىستار اقپاننىڭ 17 باستاپ، قىركۇيەكتىڭ 15-نە دەيىن قابىلدانادى. وقىرماندار قىركۇيەك ايىنىڭ 30-نە دەيىن داۋىس بەرە الادى. ادەبي تۋىندىلاردى ۇيىمداستىرۋ كوميتەتىنىڭ adebiet2014@gmail.com، kenze2002@mail.ru ەلەكتروندىق پوشتاسىنا جولداۋعا بولادى. كونكۋرس جايلى تولىق مالىمەتتى جۇلدەنىڭ www.akalam.kz رەسمي سايتىنان بىلە الاسىزدار. سايىسقا تۇسكەن بارلىق شىعارما اتالعان سايتتا ورنالاستىرىلادى. وقىرماندار تومەندەگى اتالىمدار بويىنشا داۋىس بەرەدى:
1. جىلدىڭ ۇزدىك پوەزياسى
2. جىلدىڭ ۇزدىك پروزاسى
3. دارابوز. جىلدىڭ ۇزدىك بالالار جانە جاسوسپىرىمدەر شىعارماسى
4. ەسەنجول دومبايەۆ اتىنداعى جىلدىڭ ۇزدىك ساتيراسى
5. جىلدىڭ ۇزدىك فانتاستيكا جانە دەتەكتيۆ شىعارماسى
6. جىلدىڭ ۇزدىك كينوسەنارييى جانە دراماتۋرگياسى
7. قازاق ادەبيەتىنە قوسقان ەلەۋلى ەڭبەگى ءۇشىن
8. شەتەل اۆتورىنىڭ ۇزدىك شىعارماسى
9. ەسەنقۇل مامان ۇلى اتىنداعى سىيلىق «الاشوردانىڭ 100 جىلدىعى» تاقىرىبىنا ارنالعان ۇزدىك شىعارماعا بەرىلەدى.
العاشقى كەزەڭدە شىعارمالار www.akalam.kz ۆەب-سايتىندا ىرىكتەلەدى. وقىرماندار وزىنە ۇناعان جۇمىسقا داۋىس بەرە الادى. www.akalam.kz سايتىنداعى ونلايىن-داۋىس بەرۋ 7 اي بويى جالعاسادى. داۋىس بەرۋ اياقتالعان سوڭ، ءار اتالىم بويىنشا 5 شىعارما تاڭداپ الىنادى. سايىستىڭ ەكىنشى كەزەڭىنە وقىرماندار تاراپىنان ەڭ كوپ ۇپاي جيناعان شىعارمالار وتەدى. ودان كەيىن جۇلدەنى ۇيىمداستىرۋشىلار مەن جوبا سەرىكتەستەرىنەن قۇرالعان قازىلار ءاربىر نوميناسيا بويىنشا جەڭىمپازداردى انىقتايدى. وتكەن جىلدارداعىداي سايىس بارىسىندا شىعارما اۆتورلارى كورسەتىلمەيدى.
«التىن قالام 2017» ادەبي جۇلدەسى جەڭىمپازدارىنىڭ ەسىمدەرى كۇزدە وتەتىن ماراپاتتاۋ شاراسىندا جاريالانادى.
«بىلىمگە، ونەرگە قۇمار وسكەلەڭ ۇرپاقتى تاربيەلەۋ ءۇشىن قازاقستان ادەبيەتىن دامىتۋ جانە بۇگىنگى اۆتورلاردى قولداۋ كەرەك. بىزگە ءوز حالقىنىڭ ءداستۇرىن، قۇندىلىقتارىن قۇرمەتتەيتىن تاربيەلى جاس ۇرپاق كەرەك. ادامنىڭ رۋحىن كوتەرەتىن، شابىتىن ارتتىراتىن كىتاپ. سوندىقتان بالالار جازۋشىلارىنا ارنالعان حالىقارالىق «دارابوز» بايقاۋى مەن «جىلدىڭ ۇزدىك بالالار شىعارماسى» اتالىمىنىڭ بىرىكتىرىلۋى جاڭا اۆتورلاردى تابۋعا سەپتىگىن تيگىزىپ قانا قويماي، ولاردىڭ كەڭ تانىلۋىنا، جاس وقىرماندار تابۋىنا جول اشاتىنىنا سەنەمىز»، - دەدى بايقاۋدى ۇيىمداستىرۋشىلاردىڭ ءبىرى كەنجە جۇمان ۇلى.
ايتا كەتەتىن بولساق، بالالار جازۋشىلارىنا ارنالعان «دارابوز» بايقاۋى 2006 جىلى «ZHERSU» ينۆەستيسيالىق-وندىرىستىك كورپوراسياسىمەن بىرلەسىپ اشىلدى. باستى ماقسات – بالالار جازۋشىلارىنىڭ مارتەبەسىن كوتەرۋ جانە بالالار ادەبيەتىنىڭ ساپاسىن ارتتىرۋ.
«دارابوز» بايقاۋىنا قىزىعۋشىلىق جىل سايىن ارتىپ كەلەدى. بۇعان قاتىسۋشىلار تاراپىنان ءتۇسىپ جاتقان وتىنىشتەردىڭ كوپتىگى دالەل. جۇلدە قورى 50 ملن تەڭگەدەن استى. 11 جىل ىشىندە شامامەن 1000 اۆتور بايگەگە قاتىستى. ۇزدىك شىعارمالاردان جيناقتالعان «كاۋسار بۇلاق» جانە «چيستىي رودنيك» كىتاپتارى وقىرمان نازارىنا ۇسىنىلدى. جارىق كورگەن كىتاپتار ەلىمىزدەگى مەكتەپتەرگە جانە كىتاپحانالارعا تەگىن تاراتىلدى. بۇل جيگناقتار وقۋشىلار مەن ۇستازدارعا، تاربيەشىلەر مەن اتا-انالارعا جانە جالپى وقىرمان قاۋىمعا ارنالعان.
«التىن قالام» ادەبي جۇلدەسى
قازاق ادەبيەتىنىڭ بۇگىنى مەن بولاشاعىنا بەي-جاي قاراي المايتىن، قوعامدىق قىزمەتتىڭ ءار سالاسىندا ەڭبەك ەتىپ جۇرگەن دوسىم ساتپايەۆ، قۋات دومباي، كەنجە جۇمان ۇلى، راسۋل جۇمالى جانە ايدوس سارىم سەكىلدى ازاماتتار اقىلداسا كەلىپ، 2009 جىلى «التىن قالام» ادەبي جۇلدەسىن وتكىزۋ تۋرالى باستاما كوتەرگەن بولاتىن. ماقسات – ەلىمىزدىڭ رۋحاني-مادەني دامۋىنا قازاقستان ازاماتى رەتىندە ءوز ۇلەسىن قوسۋ جانە جاس دارىندار مەن جاڭا ەسىمدەردىڭ قالىڭ جۇرتقا تانىلۋىنا ىقپال ەتۋ.
كەيىن بايقاۋدى ۇيىمداستىرۋ كوميتەتىنىڭ قۇرامىنا «كتك» تەلەارناسىنىڭ بۇرىنعى جەتەكشىسى ارمان شورايەۆ قوسىلدى. سونداي-اق، ۇيىمداستىرۋ جۇمىستارىنا تاتيانا فيليپچيك قولداۋ كورسەتىپ وتىر. ۇزدىكتەردى انىقتاۋعا وقىرمانداردىڭ ات سالىسۋى بايقاۋدىڭ باستى ەرەكشەلىگى سانالادى. شىعارمالاردى باعالاۋ ەكى كەزەڭنەن تۇرادى. ايتا كەتەتىن ءجايت، قازىلار قۇرامىندا كاسىبي قالامگەرلەر، ادەبيەتشىلەر جوق. كوپتىڭ تالقىسىنا ۇسىنىلعان ادەبي شىعارمالاردىڭ اۆتورى دا كورسەتىلمەيدى. مۇنداي تالاپتار جۇلدەنىڭ ءادىل وتۋىنە كەپىل بولا الادى. ايتا كەتەتىن جايت، «التىن قالام» بايقاۋ جۇمىستارىنا جازۋشىلار ەمەس، وقىرماندار باعا بەرەتىن قازاقستانداعى ءبىرىنشى ادەبي جۇلدە.
«التىن قالام» ۇلتتىق ادەبي جۇلدەسى العاش رەت 2010 جىلى ۇيىمداستىرىلدى.
ەرەكشە اتاپ وتەتىن جايت، «التىن قالام» جۇلدەسىنىڭ ۇيىمداستىرۋ كوميتەتى ساياسي قىلمىسكەر دەپ ايىپتالىپ، جۇڭگو تۇرمەلەرىندە 40 جىل وتىرعان، «قىلمىس» اتتى 6 تومدىق كىتاپتى اباقتىدا جازىپ شىققان، جۇڭگو وكىمەتى تاراپىنان ساياسي سەبەپتەرگە بايلانىستى قۋدالانعان قازاقتىڭ اردا ازاماتى، تالانتتى قالامگەر، بۇكىل عۇمىرى ازاتتىق ءۇشىن كۇرەسپەن وتكەن قاجىعۇمار شابدانۇلىن «قازاق ادەبيەتىنە قوسقان زور ۇلەسى ءۇشىن» ماراپاتتادى. بۇل قاجىعۇمار شابدان ۇلىنىڭ تۋعان جەرىنەن العان العاشقى ادەبي سىيلىعى جانە وسى سىيلىقتى ۇيىمداستىرعانىمىزدى ماقتانىش ەتەمىز.
2016 جىلدان «ارۋنا» باسپاسى «التىن قالام» ادەبي جۇلدەسىمەن ىنتىماقتاسا باستادى. كونكۋرسقا قاتىسۋشىلاردىڭ ءبىرى تۇمار مۇقاشتەگىنىڭ بالالارعا ارنالعان «شيماي-شاتپاق» كىتابىن باسپادان شىعاردى. ەندى باسپا وتكەن جىلدىڭ قورىتىندىسى بويىنشا «جىلدىڭ ۇزدىك بالالار شىعارماسى» نوميناسياسىنىڭ ۇزدىك شىعارمالارىنىڭ ءبىرىن كىتاپ ەتىپ شىعارۋدى جوسپارلاپ وتىر.
