قازاقستان زيالى قاۋىمىنىڭ وكىلدەرى جىر سەمسەرى، الداسپان اقىن ماحامبەت باتىردىڭ ءارۋاعىنا دۇعا باعىشتادى.
اتىراۋ وبلىسىنداعى قاراوي جەرىنە انەس ساراي، ءسابيت دوسانوۆ، سەرىك تۇرعىنبەك ۇلى، قاجىعالي مۇحامبەتقالي ۇلى، قاسىمحان بەگمانوۆ، مەرەكە قۇلكەنوۆ، ەسەنعالي راۋشانوۆ، روللان سيسەنبايەۆ، اقۇشتاپ باقتىگەرەيەۆا، سۆەتقالي نۇرجان، باۋىرجان حاليوللا، گۇلزادا نيەتقالييەۆا، ساۋلەش شاتەنوۆا، ءاليا داۋلەتبايەۆا، باقىتگۇل باباش سىندى اقىن-جازۋشىلار جيىلدى.
قوناقتار باتىرعا دۇعا باعىشتاعاننان سوڭ سول جەردە ۇيىمداستىرىلعان "ماحامبەت پوەزياسى كۇنى" سالتاناتتى شاراسىنا قاتىستى. جيىلعاندار ماحامبەت تۇلعاسىن ۇلىقتاپ، تاريحتان سىر شەرتىپ، ولەڭ وقىدى.
شارا كەزىندە سويلەگەن وبلىس اكىمى نۇرلان نوعايەۆ بۇل كۇننىڭ توي تويلاۋمەن قاتار، كوپ دۇنيەلەردى وي ەلەگىنەن وتكىزەتىن ۋاقىت ەكەنىن اتاپ ءوتتى.
"ەلباسىمىزدىڭ "بولاشاققا باعدار: رۋحاني جاڭعىرۋ" ماقالاسىندا ەلدىڭ دامۋى جولىندا ەڭبەكتەنگەن ازاماتتاردى ءبىلۋ، ولاردىڭ ەرلىكتەرىن، اتقارعان ىستەرىن حالىققا ناسيحاتتاۋ، ەستەن شىعارماي ۇرپاققا جەتكىزۋ ماسەلەلەرى ايتىلدى. تاريحتى قاراساڭىزدار قاجەت كەزدە ءومىر ساحناعا ەلىم، جەرىم، وتانىم دەپ، ازاتتىق جولىندا جانىن پيدا ەتكەن تالاي ازاماتتاردى شىعارىپ وتىرعان. سولاردىڭ بىرەگەيى ماحامبەت دەسەك ارتىق بولمايدى، – دەدى ايماق باسشىسى.
ايتا كەتەلىك، مۇنداي شارا اتىراۋدا 2003 جىلى يۋنەسكو-نىڭ قولداۋىمەن وتكىزىلدى. قازاقستاننىڭ ەڭبەك سىڭىرگەن قايراتكەرى قويشىعۇل جىلقىشييەۆتىڭ يدەياسىمەن وتكىزىلگەن "ماحامبەت پوەزياسى كۇنىن" بيىلدان باستاپ جىل سايىن ۇيىمداستىرۋ جوسپارلانعان. شارا اياسىندا ماحامبەت سىيلىعى تاعايىندالىپ، ءار ءتۇرلى سالادا وزىپ شىققانداردى ماراپپاتتاۋ قولعا الىنۋى مۇمكىن.
