ق ر مادەنيەت جانە سپورت ءمينيسترى ارىستانبەك مۇحامەدي ۇلى كورول فەيسال اتىنداعى يسلامدى زەرتتەۋ ورتالىعى باسقارماسىنىڭ ءتوراعاسى، حانزادا تۇركي ال-فەيسال ءال ساۋدپەن كەزدەستى، دەپ حابارلايدى Baq.kz.

كەزدەسۋ بارىسىندا مينيستر قوس ەل اراسىنداعى بايلانىستىڭ ودان ءارى دامي تۇسەتىندىگىن جەتكىزدى.

«قازاقستان مەن ساۋد ارابيا اراسىندا مادەنيەت، سپورت جانە تاعى باسقا سالالاردا قارىم-قاتىناس دامي بەرەدى»، - دەدى ارىستانبەك مۇحامەدي ۇلى.

ءوز كەزەگىندە ساۋد ارابيا حانزاداسى مينيسترگە العىسىن ءبىلدىردى.

كەيىن تۇركي ال-فەيسال ءال ساۋد جۋرناليستەردىڭ سۇراعىنا جاۋاپ بەرىپ، ەلىمىزگە قانداي ماقساتتا كەلگەندىگىن ءتۇسىندىردى.

«ءبىز استاناعا مادەنيەت جانە سپورت ءمينيسترىنىڭ شاقىرتۋىمەن كەلدىك. ساپار اياسىندا مەملەكەتتىك حاتشى، ق ر پارلامەنت سەناتىنىڭ ءتوراعاسى ءارى تۇڭعىش پرەزيدەنت كىتاپحاناسى باسشىسىمەن كەزدەستىم. سونداي-اق، ەۋرازيا ۇلتتىق ۋنيۆەرسيتەتى مەن كورول فەيسال اتىنداعى يسلام زەرتتەۋلەر ورتالىعى اراسىندا ءوزارا تۇسىنىستىك جونىندەگى مەموراندۋمعا قول قويدىق. وسى مەموراندۋم اياسىندا بىرنەشە سالا بويىنشا ىنتىماقتاستىق ورنايدى»، - دەپ تۇيىندەدى ويىن ول.

كەزدەسۋ سوڭىندا ارىستانبەك مۇحامەدي ۇلى ساۋد ارابيا حانزاداسىنا "التىن ادام" كادە-سىيىن سىيعا تارتتى.

شولۋشى: گۇلىم جاقان

فوتو: ابزال قالييەۆ