بۇگىن قۇتقارۋشى حريستوس حرامىندا قازاقستان رەسپۋبليكاسىنىڭ رەسەي فەدەراسياسىنداعى توتەنشە جانە وكىلەتتى ەلشىسى يمانعالي تاسماعامبەتوۆ ماسكەۋ جانە بۇكىل رەسەي پاتريارحى كيريللگە I دارەجەلى "دوستىق" وردەنىن تاپسىردى، دەپ حابارلايدى قامشى اقپاراتتىق اگەنتتىگى قازاقستاننىڭ رف-داعى ەلىشىلىگىنىڭ رەسمي سايتىنا سىلتەمە جاساپ.
قازاقستان رەسپۋبليكاسىنىڭ پرەزيدەنتى ن.ءا.نازاربايەۆتىڭ جارلىعىمەن ورىس پراۆوسلاۆ شىركەۋىنىڭ جەتەكشىسى "مەملەكەتتىك جانە قوعامدىق قىزمەتكە، ەلدىڭ الەۋمەتتىك-ەكونوميكالىق جانە مادەني دامۋىنا قوسقان ۇلەسى، حالىقتار اراسىنداعى دوستىق پەن ىنتىماقتاستىقتى نىعايتۋداعى سىڭىرگەن ەڭبەگى ءۇشىن" جوعارى ناگراداعا يە بولدى.
يمانعالي تاسماعامبەتوۆ وسىناۋ ايتۋلى كۇنى قازاقستان رەسپۋبليكاسى مەن ەل پرەزيدەنتى نۇرسۇلتان نازاربايەۆتىڭ اتىنان ناگرادا تاپسىرۋ ۇلكەن مارتەبە ەكەنىن ايتتى. "بۇل ءسىزدىڭ بەيبىتشىلىك پەن كەلىسىمدى، ەكى ەلدىڭ حالىقتارى اراسىنداعى دوستىق قارىم-قاتىناستاردى نىعايتۋداعى تىنىمسىز ءارى ولشەۋسىز ەڭبەگىڭىزگە دەگەن ايرىقشا قۇرمەت"، – دەپ اتاپ ءوتتى قازاقستاندىق ديپلومات.
"قازاقستاندا يسلاممەن قاتار، پراۆوسلاۆ ءدىنى دە قوعامدىق ومىردە ەرەكشە ورنى بار جەتەكشى كونفەسسيالاردىڭ ءبىرى. ءبىزدىڭ ەلىمىزدە ورىس پراۆوسلاۆ شىركەۋى وتە ماڭىزدى جاسامپاز قىزمەتتى اتقارادى"، – دەدى ەلشى.
ءوز كەزەگىندە پاتريارح كيريلل كورسەتىلگەن جوعارى ماراپات ءۇشىن قازاقستان پرەزيدەنتى نۇرسۇلتان نازاربايەۆقا الىعىسىن جەتكىزىپ، بارشا قازاق حالقىنا بەيبىت ءومىر مەن وسىپ-وركەندەۋىنە نيەتتەستىك ءبىلدىردى.
"دوستىق" وردەنى – قازاقستان رەسپۋبليكاسىنىڭ جوعارى ناگرادالارىنىڭ ءبىرى. بۇل وردەنمەن قوعامداعى ۇلتارالىق جانە ازاماتتىق تاتۋلىقتى ساقتاۋدا جەمىستى جۇمىس اتقارعان، حالىقتار اراسىنداعى بەيبىتشىلىكتى، دوستىق پەن ىنتىماقتاستىقتى نىعايتۋعا ەڭبەك سىڭىرگەن ازاماتتار ماراپاتتالادى. وردەن يەگەرلەرىنىڭ اراسىندا – بۇۇ باس حاتشىسى پان گي مۋن، ۇقكۇ باس حاتشىسى نيكولاي بورديۋجا، ماسكەۋ جانە بۇكىل رەسەي پاتريارحى الەكسيي II، اقش پرەزيدەنتى (1989-1993) دجوردج بۋش (ۇلكەنى)، اقش-تىڭ 67ء-شى مەملەكەتتىك حاتشىسى حيللاري كلينتون، ۇلىبريتانيانىڭ پرەمەر-مينيسترى (1979-1990) مارگارەت تەچەر، كاردينال-ەپيسكوپ، كاردينالدار القاسىنىڭ دەكانى (2001) اندجەلو سودانو، ساۋد ارابياسىنىڭ پاتشاسى – ابدۋللا يبن ابدۋل ازيز اس-ساۋد، حورۆاتيا پرەزيدەنتى (2000- 2010) ستەپان مەسيچ، رۋمىنيا پرەزيدەنتى يون يليەسكۋ، تاتارستان رەسپۋبليكاسىنىڭ تۇڭعىش پرەزيدەنتى مينتيمەر شايمييەۆ، 1ء-شى پرەمەر-مينيسترى لي كۋان يۋ، تۇركىمەنستان پرەزيدەنتى گۋربانگۋلى بەردىمۋحامەدوۆ، سلوۆاكيا پرەزيدەنتى (2007) يۆان گاشپاروۆيچ، ۆەنگريا پرەزيدەنتى (2007) – لاسلو شويوم، فيفا پرەزيدەنتى يوزەف بلاتتەر، رف پرەزيدەنتى اكىمشىلىگىنىڭ باسشىسى سەرگەي يۆانوۆ، قارۋ قۇراستىرۋشى ميحايل كالاشنيكوۆ، بالەتمەيستەر يۋريي گريگوروۆيچ، كسرو حالىق ءارتىسى يوسيف كوبزون جانە باسقا تانىمال تۇلعالار بار.
