الماتى اكىمدىگىنىڭ وكىلدەرى بۇرىنعى ترامۆاي دەپوسىنىڭ ورنىندا قانداي نىساندار سالىناتىنىن ايتىپ بەردى، - دەر حابارلايدى قامشى اقپاراتتىق اگەنتتىگى patrul.kz –كە سىلتەمە جاساپ.

 "بۇرىنعى ترامۆاي پاركىنىڭ اۋلاسىندا لوفت-ورتالىق اشىلىپ، مۇندا جاستارعا قىزمەت كورسەتۋ ايماعى، كوۆوركينگ ورتالىق، 5 شەبەرحانا، وقۋ جانە كونفەرەنس زالدارى، English club، مەملەكەتتىك ءتىلدى وقىتۋ ورتالىعى، 10 ءبىلىم سەكسياسى جۇمىس ىستەيدى"، - دەپ حابارلادى باسپا ءسوز قىزمەتىندەگىلەر.

 لوفت-ورتالىقتا، ايتۋلارىنشا، 25 ۇەۇ 3 مىڭنان اسا جاسپەن قويان-قولتىق جۇمىس اتقارادى. بۇدان وزگە، لوفت-ورتالىق بازاسى نەگىزىندە سىرتتان كەلگەن جاستارمەن جۇمىس ىستەۋ ورتالىعى، كارەرا ورتالىعى، جاتاقحاناعا جەتەكشىلىك ورتالىقتارى دا بولادى ەكەن. ياعني، جاستار ءبىر مەكەنجايدان وزىنە كەرەك اقپاراتتى، قولداۋ الىپ، پروبلەمالارىن شەشىپ، العا قويعان ءىسىن دامىتادى.

اتالعان جوبا اباقتىدان بوساپ شىققان جاستاردىڭ الداعى ۋاقىتتاعى كۇن كورىسىنە دە ءوز سەپتىگىن تيگىزەتىنى حابارلاندى.

مۇنداي شەشىم جاستاردى 2020 جىلعا دەيىن قولداۋدىڭ جول كارتاسىنىڭ اياسىندا قابىلدانعانى بەلگىلى بولدى. ول نەگىزگى بەس باعىتتان تۇرادى، ولار-ساپالى ءبىلىم، جۇمىسپەن قامتۋ، مادەني دەمالىس جانە سالاۋاتتى ءومىر سالتى، تۇرعىن ءۇي جانە جاس وتباسىلاردى قولداۋ، بەلسەندى جاستار قالاسى. 

جول كارتاسىن جۇزەگە اسىرۋ ءۇشىن 7،2 ميلليارد تەڭگە ءبولىنىپ وتىر ەكەن. ايتا كەتەيىك، الماتىدا بۇگىندە 14-تەن 35 جاسقا دەيىنگى ارالىقتا 700 مىڭنان استام جاس بار، ولاردىڭ 435 مىڭى - ەكونوميكالىق بەلسەندى جاستار. تەك سوڭعى 5 جىل ىشىندە جاستاردىڭ ۇلەسى 10 پايىزعا ارتتى. جاسالعان بولجام بويىنشا، الماتىدا 2020 جىلى ەكونوميكالىق بەلسەندى جاستار قاتارى 500 مىڭنان استام ادامعا ارتادى دەپ كۇتىلەدى.

شولۋشى: ايگەرىم تاۋباي