11 جاستاعى وركەندى ءولتىردى دەپ ايىپتالعان شاريپا اقبەردييەۆا ءوزىنىڭ سوڭعى سوزىندە سۋديادان ۇلى تەمىر مەن ونىڭ وگەي اعاسى قادىرجاندى بەس جىلعا باس بوستاندىعىنان ايىرۋدى سۇرادى، - دەپ حابارلايدى قامشى اقپاراتتىق اگەنتتىگى Tengrinews.kz پورتالىنا سىلتەمە جاساپ.

"ايدانانىڭ كىناسى جوق. ونىڭ اقتالىپ شىعۋىن سۇرايمىن. سوسىن مەن وركەەننىڭ وگەي شەشەسى رەتىندە تەمىر اقبەردييەۆ پەن  گۋلياموۆ قادىرجاندى ماعان جالا جاپقاندارى ءۇشىن ۇكىمگە تاعى دا بەس جىل قوسۋىڭىزدى سۇرايمىن. مەنى انا رەتىندە ءتۇسىنۋىڭىزدى سۇرايمىن.مەن ءوز كىنامدى مويىندايمىن. الايدا ول سوزدەردى مەن ايتقان ەمەسپىن. رۋسلاننىڭ دا بۇل جەردە كىناسى جوق. رۋسلان، تيمۋر، گۋلياموۆ، كەمپىربايەۆ اكەسىز وسكەن بالالار. مەن تولىق وتباسىندا دۇنيەگە كەلدىم. (…) وسى قىلمىستى ءوز موينىما الامىن. ءبىراق مەن بالالاردىڭ ايتقان تۇسىنىكتەمەلەرىمەن كەلىسپەيمىن. شىن جۇرەكتەن كەشىرىم سۇرايمىن. وكىنىشتى جاعداي. وركەننىڭ اناسىنان، اجەسىنەن جانە اكەسىنەن كەشىرىم سۇرايمىن. سۋديا مىرزا، پروكۋرور جانە وسى زالدا وتىرعان بارلىق ادامنان كەشىرىم سۇرايمىن. ايدانانىڭ بۇل قىلمىسقا ەش قاتىسى جوق. ونىڭ بالاسى بار، اياعى اۋىر. (…) مەن بالالارىمدى اقتاپ وتىرعان جوقپىن. الايدا وركەننىڭ ولىمىنە مەنىڭ كىنام جوق. بارلىعىنان كەشىرىم سۇرايمىن. قىزىمدى جىبەرىڭىزدەرشى. باسقا ەشتەڭە سۇرامايمىن"، - دەدى شاريپا اقبەردييەۆا.

سونداي-اق، ايەل سوڭعى ۋاقىتتا بالالاردىڭ تاربيەسىمەن اينالىسپاعانىن ايتىپ ءوتتى. اقبەردييەۆانىڭ سوڭعى سوزىنەن كەيىن سۋديا بەرىكجان ءبايجۇنىسوۆ كەڭەس بولمەسىنە كەتتى.

وسىعان دەيىن  ءشاريپا اقبەردييەۆا سوت كەزىندە بالانى ولتىرۋگە كىنالى ەكەنىن مويىنداپ، ولتىرۋگە ەكى سەبەپ بولعانىن ايتقان ەدى.

ايتا كەتەيىك، 24 قاڭتاردا بالانىڭ وگەي شەشەسى جانە تاعى دا ءتورت كۇدىكتى ەكى ايعا قاماۋعا الىنعان بولاتىن.

سونداي-اق، وسىعان دەيىن پوليسەيلەر بالانىڭ ولىمىنە قاتىستى جاڭا دەرەكتەردى جاريالاعان ەدى. سول مالىمەتتەر بويىنشا، وركەن ازامات ۇلىنىڭ وگەي شەشەسى مەن ونىڭ ءتورت سىبايلاسىنىڭ وسى قىلمىسقا قاتىسى بار. كۇدىكتىلەردىڭ اراسىندا ايەلدىڭ قىزى مەن بالاسى بار ەكەنى بەلگىلى بولدى. تەرگەۋ مالىمەتىنشە، ول بالانىڭ اكەسىنەن كەك الۋ ءۇشىن وسىنداي قىلمىسقا بارعان. ايەل قىلمىس جاساماي تۇرىپ، شىمكەنتتەن ءبىرىنشى نەكەدەگى 1995 جىلعى ۇلىن شاقىرتقان. سودان ول دوسىمەن بىرگە سوندا كەلىپ، ايەل ولارعا بالانى ۇرلاۋ ءۇشىن 100 مىڭ تەڭگە ۇسىنادى. كەيىنىرەك ايەلدىڭ 1997 جىلعى قىزى، ۇلى جانە ونىڭ دوسى بالانى اڭدىپ، 19 قاڭتاردا ۇرلاپ كەتەدى.

سونىمەن قاتار، ءىىد رەسمي وكىلى بالانىڭ وگەي شەشەسى مەن ونىڭ دوسىنىڭ شىمكەنتكە كەتپەكشى بولعانىن ايتتى. الايدا ولار ۇستالدى، سەبەبى بالانىڭ اجەسى ارىز جازعان. ايتا كەتەيىك، 11 جاستاعى وركەن وسى ۋاقىتقا دەيىن اجەسىمەن بىرگە تۇرعان ەكەن. اجەسىنىڭ ايتۋىنشا، وركەن جاۋاپكەرشىلىگى بار بالا بولاتىن جانە ول ەشقاشان كەشىكپەيتىن. ال كەيىنىرەك ولتىرىلگەن وركەن ازامات ۇلىنىڭ اناسى مالىمدەمە جاساعان بولاتىن.