وتكەن جىلى ەلىمىزدەگى ەلەۋلى وقيعالاردىڭ ءبىرى ايگىلى كەيكى باتىردىڭ باسىنىڭ ەلگە جەتكىزىلۋى بولاتىن. سول كەزدەگى پرەمەر-مينيستر كارىم ءماسىموۆ پەن قازاقستاننىڭ رەسەيدەگى توتەنشە جانە وكىلەتتى ەلشىسى مارات ءتاجيننىڭ اتسالىسۋىمەن وتانعا ورالعان ارۋاقتى ەردىڭ باس سۇيەگى بيىل باتىردىڭ دەنەسىمەن بىرگە، ءوزى تۋعان تورعاي توپىراعىنا جەرلەنەدى دەلىنگەن ەدى، دەپ حابارلايدى قامشى اقپاراتتىق اگەنتتىگى Baq.kz باسىلىمنا سىلتەمە جاساپ.
بۇگىن استانادا ءوتىپ جاتقان «ۇلى دالا» ءىى گۋمانيتارلىق عىلىمدار فورۋمىندا كەيكى باتىردىڭ باس سۇيەگى ارقىلى ونىڭ كەلبەتىن قالپىنا كەلتىرگەن انتروپولوگ عالىم ماجارستاننىڭ «ماديار-تۋران» قورىنىڭ ءتوراعاسى بيرو اندراش جولت مىرزامەن سۇقباتتاسۋدىڭ ءساتى تۇسكەن ەدى.
«ونىڭ باس سۇيەگى وتە جاقسى ساقتالعان. انتروپولوگيالىق بەت الپەتىن قالپىنا كەلتىرۋدە تىم قينالا قويعامىز جوق. ءبىزدىڭ نەگىزگى جۇمىستارىمىز ونىڭ بەت-الپەتىن تابيعي بەت-پىشىنىنە نەگىزدەپ جاسادىق» - دەيدى انتروپولوگ تاريحشى.
ونىڭ ايتۋىنا قاراعاندا ايگىلى باتىردىڭ بەينەسىنە وزدەرى جاساپ شىققان بەت-الپەت 90 پايىز ۇقسايدى.
«ءبىز كوبىندە 3D تەحنولوگياسىن پايدالاناتىندىقتان كەلبەت باتىر بابالارىڭىزعا وتە ۇقساس بولدى. جانە باس سۇيەك ءبىزدىڭ قولىمىزعا بۇتىندەي كەلدى. سوندىقتان زاماناۋي قۇرالداردىڭ كومەگىمەن ءبىز كەيكى باتىردىڭ شىنايى كەلبەتىن تولىق بەرە الدىق دەپ ويلايمىن» - دەيدى بيرو اندراش.
اندراش جولتتىڭ ايتۋىنا قاراعاندا كەيكى باتىر ولاردىڭ قالپىنا كەلتىرگەن ەكىنشى قازاق.
«ءبىز بۇعان دەيىن وتە كوپ ادامنىڭ بەينەسىن قالپىنا كەلتىردىك. ۇلكەن كوماندامەن جۇمىس ىستەپ جاتىرمىز. ماجارستاننىڭ ۇلتتىق انتروپولوگيالىق ينستيتۋتى تەك وسى جۇمىسپەن اينالىسادى. قازىرگى ۋاقىتتا ءبىزدىڭ قاتارىمىزدا الەمگە ايگىلى ساراپشى-انتروپولوگ اگناش كۋشتەر بار. ءبىز ءبىر قۇرامدا بۇعان دەيىن ءابىلقايىر حاننىڭ كەلبەتىن جاسادىق. وزدەرىڭىز بىلەتىندەي ول مۇردە اقتوبەدەگى «حان مولاسىندا» ساقتالعان. ال ودان بولەك بۋداپەشتە ەجەلگى عۇنداردىڭ، ەجەلگى تۇركىلەردىڭ كەلبەتىن قالپىنا كەلتىردىك. شامامەن كوشپەندىلەرگە قاتىستى 50-55 رەكونسترۋكسيا جاسادىق» - دەيدى انتروپولوگ.
قازاقستاننىڭ تاپسىرىسىمەن ءابىلحايىر حان مەن كەيكى باتىردى عانا جاسادىق دەگەن انتروپولوگ ءالى دە انىقتاۋدى، قالپىنا كەلتىرۋدى كۇتىپ جاتقان باس سۇيەكتەر جەتەرلىك دەيدى.
«بىزدە ءالى دە كوپ باس سۇيەكتەر بار. ول ءبىر عانا قازاقستاننان عانا ەمەس، الەمنىڭ كوپتەگەن ەلدەرىنەن كەلگەن. 40 مىڭنان استام سۇيەك تابيعي كەلبەتىن كۇتىپ جاتىر» - دەيدى اندراش جولت.
ەستەرىڭىزدە بولسا، ەلگە ورالعان كەيكى باتىردىڭ باس سۇيەگىن الماتىداعى ۇلتتىق مۋزەيدىڭ باسشىسى نۇسان ءالىمباي ماجارلىق عالىمداردىڭ قالپىنا كەلتىرىپ جاتقاندىعىن ايتقان بولاتىن. سوڭىنان باتىردىڭ قالپىنا كەلتىرىلگەن بەينەسى دە كورسەتىلگەن ەدى.
