استانادا قازاقستان رەسپۋبليكاسىنىڭ مەملەكەتتىك حاتشىسى گۇلشارا ءابدىقالىقوۆانىڭ توراعالىعىمەن قازاقستان رەسپۋبليكاسىنىڭ پرەزيدەنتى جانىنداعى ازاماتتىق ماسەلەلەرى جونىندەگى كوميسسيانىڭ كەزەكتى وتىرىسى ءوتتى دەپ، حابارلايدى قامشى اقپاراتتىق اگەنتتىگى  اقوردانىڭ باسپا ءسوز قىزمەتىنە سىلتەمە جاساپ.

جيىندا قازاقستان ازاماتتىعىن بەرۋ ماسەلەلەرى قارالدى.

ءتيىستى جارلىققا مەملەكەت باسشىسى قول قويعاننان كەيىن ەلىمىزگە تاياۋ جانە الىس شەتەلدەردەن كەلگەن ءتۇرلى ەتنوستىڭ 640 وكىلى قازاقستان ازاماتى اتانادى.

گۇلشارا ءابدىقالىقوۆا، تاۋەلسىزدىك العان ساتتەن بەرى قازاقستان ازاماتى بولۋعا نيەت بىلدىرگەن ادامدار سانىنىڭ جىلدان جىلعا كوبەيىپ كەلە جاتقانىن اتاپ ءوتتى. وسى كەزەڭ ىشىندە ەلىمىزدىڭ حالىقارالىق بەدەلى ءوستى. بۇل – قازاقستان پرەزيدەنتىنىڭ باسشىلىعىمەن قول جەتكىزىلگەن الەۋمەتتىك-ەكونوميكالىق تۇراقتىلىقتىڭ، ەتنوسارالىق كەلىسىمنىڭ، ورنىقتى دامۋدىڭ جەمىسى.

مەملەكەتتىك حاتشى مەملەكەتتىك رامىزدەر كۇنى قارساڭىندا ەلىمىزدىڭ ازاماتتارى جاڭا قازاقستاندىقتاردى ەرەكشە ىقىلاسپەن قارسى الاتىنىن ايتىپ، ولارعا باقىتتى ءومىر جانە قازاقستاننىڭ يگىلىگى جولىنداعى جۇمىستارىنا تابىس تىلەدى.  

گۇلشارا ءابدىقالىقوۆا ولاردىڭ قازاقستان رەسپۋبليكاسىنىڭ لايىقتى ازاماتتارى بولىپ، ەگەمەن ەلىمىزدىڭ ودان ءارى دامۋى مەن وركەندەۋىنە ءوز ۇلەستەرىن قوساتىنىنا سەنىم ءبىلدىردى.

كوميسسيا وتىرىسىنىڭ قورىتىندىسى بويىنشا ءتيىستى شەشىمدەر مەن ۇسىنىمدار قابىلداندى. 

شولۋشى: ايگەرىم تاۋباي