كوكشەتاۋدا 5 سىنىپتا وقيتىن قىز جوعالىپ كەتتى، ول 23 مامىردا ۇيىنەن شىعىپ، قايتا ورالماعان، دەپ حابارلايدى قامشى اقپاراتتىق اگەنتتىگى Sputnik باسىلىمىنا سىلتەمە جاساپ.

كوكشەتاۋدىڭ الەۋمەتتىك جەلىلەرىندە №6 مەكتەپتىڭ بەسىنشى سىنىپ وقۋشىسى جوعالىپ كەتكەنى تۋرالى اقپارات تاراتىلدى. تكاچەنكو الەكساندرا 23 مامىردا ۇيىنەن شىعىپ، قايتا ورالماعان.

"ءيا، وقۋشى قىز جوعالىپ كەتتى، ءقازىر ىزدەستىرىپ جاتىرمىز. ول تىركەۋدە بولعان ەمەس"، — دەپ كوكشەتاۋ ىشكى ىستەر باسقارماسى مالىمەتتى راستادى. "مەكتەپ وقۋشىسى اجەسىنىڭ قولىندا تۇرادى ەكەن. اجەسى 24 مامىردا پوليسياعا حابار بەرىپتى. قىزدىڭ اناسى بىلتىر قايتىس بولعان، بۇدان بۇرىن ءبۇلدىرشىن ۇيدەن قاشقان ەمەس"، — دەدى ءىىب رەسمي وكىلى ساۋلە حامزينا. قىزدىڭ بويى 140 سانتيمەتر، ارىقتاۋ كەلگەن، شاشى قوڭىر، ۇزىن. ۇستىنە قارا كوك ءتۇستى كارديگان كيىپتى، اياعىندا سپورتتىق اياق كيىم بولعان. ەرەكشە بەلگىسى: يەگى شىعىڭقى كەلگەن.