قازاقستان زاڭگەرلەرىن ءبىر ۇيىمعا توپتاستىرىپ، جاۋاپكەرشىلىك جۇگىن كۇشەيتۋ كەرەك. بۇگىن استانادا وتكەن جوعارعى سوت جانىنداعى حالىقارالىق كەڭەستىڭ وتىرىسىندا وسىنداي باستاما كوتەرىلدى. بۇل جايىندا قامشى اقپاراتتىق اگەنتتىگى 24.kz پورتالىنا سىلتەمە جاساپ حابارلايدى.

كەڭەس مۇشەسى ايگۇل كەنجەبايەۆانىڭ ايتۋىنشا، ەلىمىزدەگى زاڭگەرلەر مەن ادۆوكاتتاردىڭ باسىن قوسىپ، ءبىر ماقسات-مۇددە جولىندا جۇمىس ىستەۋى ماڭىزدى.

سونداي-اق ۇسىنىس-پىكىرلەرى ورتاعا سالىناتىن ارنايى الاڭ قالىپتاستىرۋ ءتيىمدى ءتاسىل بولىپ تابىلادى. ونىڭ اياسىندا ارنايى ۇيلەستىرۋ كەڭەسى قۇرىلىپ، زاڭگەرلەر مەن ادۆوكاتتاردىڭ قوعامداعى ءرولى ارتۋى ءتيىس. بۇل رەتتە جوعارعى سوت ءتوراعاسى قايرات ءمامي تىڭ باستامالاردى ءتيىستى ورگاندارعا جولداپ، جۇيەلى جۇزەگە اسىرۋ قاجەتتىگىن ايتتى.

ەستەرىڭىزگە سالا كەتەيىك، اتالعان كەڭەس وسىدان ءبىر جىل بۇرىن قۇرىلىپ، سوت جۇيەسىن جەتىلدىرۋ باعىتىندا جۇمىس ىستەپ كەلەدى.

ايگۇل كەنجەبايەۆا، حالىقارالىق كەڭەستىڭ مۇشەسى:

- شەتەلدە زاڭگەر بولۋ جوعارى مارتەبە سانالادى. ويتكەنى ولارعا زور جاۋاپكەرشىلىك جۇكتەلگەن. سوندىقتان ءبىز بۇل سالا جۇمىسىن ءبىر رەتكە كەلتىرۋىمىز كەرەك. دالىرەك ايتقاندا، زاڭگەرلەر مەن ادۆوكاتتار ءۇشىن ارنايى ۇيىم قۇرۋدى كوزدەپ وتىرمىز.