اعىمداعى جىلدىڭ قىركۇيەك ايىندا مەدەۋ مۇز ايدىنىندا «ازيا جۇلدىزى» فەستيۆالى وتەدى. بۇل تۋرالى بۇگىن اقوردادا وتكەن رۋحاني جاڭعىرۋ جونىندەگى ۇلتتىق كوميسسيا وتىرىسىنان كەيىن ب ا ق وكىلدەرىنە سۇحبات بەرگەن الماتى قالاسىنىڭ اكىمى باۋىرجان بايبەك ايتتى دەپ حابارلايدى قامشى اقپاراتتىق اگەنتتى.

«بۇگىن مەن جوسپاردا تۇرعان 2 جاڭا باستاما جايىندا ايتتىم. بۇرىن الماتىلىقتار، جالپى قازاقستاندىقتار «ازيا داۋىسى» جوباسى تۋرالى كوپ ايتاتىن. سوندىقتان ءبىز مەدەۋ، شىمبۇلاقتى كورسەتۋ، جالپى الماتىنىڭ تۋريستىك الەۋەتىن كوتەرۋ ءۇشىن «ازيا جۇلدىزى» دەگەن جوبانى باستاماقپىز. قىركۇيەك ايىندا، وزدەرىڭىز بىلەتىندەي، ءاربىر ءۇشىنشى دەمالىس كۇنى الماتى قالاسى كۇنى تويلانادى. سول كۇنى مەدەۋ مۇز ايدىنىندا وسىنداي فەستيۆالدى وتكىزۋ ارقىلى ءوزىمىزدىڭ مادەنيەتىمىزدى ازياعا پاش ەتەتىن بولامىز»، - دەدى قالا باسشىسى.

مۇنان بولەك، ونىڭ ايتۋىنشا، «قازاقفيلم» كينوستۋدياسى اۋماعىندا بوس جاتقان جەردە ەتنولەند جوباسى قولعا الىنادى. ول جەردە قالا تۇرعىندارى، ايماقتاردان كەلگەن ازاماتتار، شەتەلدىك قوناقتار الماتىنىڭ مىڭ جىلدىق تاريحىمەن تانىسا بولادى.

«بەلگىلى عالىمىمىز كارل بايپاقوۆ الماتى قالاسىندا ءتۇرلى قورعانداردىڭ وتە كوپ ەكەندىگىن ايتقان بولاتىن. ولاردىڭ كوبى جەكە كاسىپكەرلەردىڭ، بانكتەردىڭ يەلىگىندە. ءبىز سول جەرلەردى مەملەكەت مەنشىگىنە قايتارىپ، اشىق اسپان استىنداعى مۋزەيلەر جاسايتىن بولامىز»،- دەدى باۋىرجان بايبەك.

سونىمەن قاتار قالا باسشىسى الماتىدا ورنالاسقان قارجى ينستيتۋتتارىنىڭ قارجىسى ەسەبىنەن قازىرگى ۋاقىتتا 1 ملرد. تەڭگەدەن استام سوماعا 20 جوبا جۇزەگە اسىرىلىپ جاتقانىن اتاپ ءوتتى. ماسەلەن، جاڭادان قۇرىلعان ناۋرىزباي اۋدانىندا 500 ادامعا ارنالعان ەمحانا مەن 1200 وقۋشىعا ارنالعان مەكتەپتى كاسىپكەرلەر ءوز قارجىلارىنا سالىپ، قالاعا سىيعا تارتاتىن بولادى.

«مادەنيەت سالاسىندا دا قالامىزدىڭ جەتىستىكتەرى جەتكىلىكتى. وتكەن جىلدىڭ وزىندە مۋلتيمەديالىق مۋزىكا ورتالىعىن، مىڭجىلدىق مۋزەيىن اشتىق. مۋلتيمەديالىق قۇرالدارمەن قالانىڭ، مەملەكەتتىڭ تاريحىن كورسەتۋدەمىز. مۇنان بولەك، شەبەرلەر اۋىلى، ءداستۇرلى مۋزىكا تەاترى دا اشىلعان ەدى»، - دەدى ول.