25 مامىردا قازاقستان جازۋشىلار وداعىنىڭ ادەبيەتشىلەر ۇيىندە قازاقستان جازۋشىلار وداعىنىڭ مۇشەسى، اقىن، سىنشى، اعارتۋشى نۇرمۇقان جانۇزاق ۇلىنىڭ 70 جاسقا تولعان كۇنى اتاپ ءوتىلدى دەپ جازادى قامشى  اقپاراتتىق اگەنتتىگى.

اقىننىڭ اتاجۇرتقا ورالعان 2010 جىلدان بەرى ەڭبەكتەنگەن ءۇش كىتابى – «ءبىر اۋىز ءسوزىم - مىڭ ءدىلدا» عاقليالار جيناعى،  «وتكەن ىزبەن كۇتكەن ارمان» تاڭدامالى داستاندار جيناعى «كوكتەمنەن كۇزگە دەيىن» عۇمىرنامالىق ادەبي شىعارمالارىنىڭ تۇساۋى كەسىلدى.

شارانى بەلگىلى اقىن سايات قامشىگەر جۇرگىزدى. شارادا جازۋشىلار وداعى ءتوراعاسىنىڭ ورىنباسارى اقىن مارالتاي رايىمبەك ۇلى جازۋشىلار وداعى اتىنان اقىنعا وقالى قۇرمەت شاپانىن جاپتى. ءارى قازاقستان جازۋشىلار وداعىنىڭ باسقارما ءتوراعاسى نۇرلان ءورازاليننىڭ قۇتتىقتاۋ حاتىن وقىدى. سونداي-اق ۇلت جاناشىرى ءدىلدا ماتاي قىزى تاسماعانبەت كەلىنىنىڭ، قىتايدا شىعاتىن «عىلىم-تەحنيكا» گازەتىنىڭ باس رەداكتورى باقىتقان ءبىلال ۇلى مەن گازەت ۇجىمىنىڭ قۇتتىقتاۋ حاتىن جەتكىزدى.

سىنشى، وداق ءتوراعالار القاسىنىڭ القاسى باقىت ساربالايەۆ، قحر فلكلور قوعامىنىڭ مۇشەسى، شىنجاڭ جاۋشىلار قوعامىنىڭ مۇشەسى، جۋرناليست، جازۋشى قاپاس اسەيىن ۇلى قاتارلى ءتورت قالامگەر كىتاپتىڭ تۇساۋىن كەستى. ءارى نۇرمۇقان جانۋزاق ۇلىنىڭ ومىرىمەن قالامگەرلىگى، ادامگەرشىلىگى تۋرالى قىسقاشا باياندامالار جاسادى. قوعام قايراتكەرى  جەتتىكباي مەدەۋيەۆ، قازاقستان جازۋشىلار وداعىنىڭ مۇشەلەرى دانيار البوزين، بولات بوپاي ۇلى قاتارلى قالامگەرلەر نۇرمۇقان جانۇزاق ۇلى شىعارمالارىنىڭ ەرەكشەلىكتەرى تۋرالى توقتالدى.

ءبىر توپ جاس وقىرماندار اقىن ولەڭدەرىن وقىدى. اقىن وقىعان ولەڭدەر تىڭدارماننىڭ القاۋىنا بولەندى. قۇرمانبەك سەيتىنعازى، اينۇر قاجيموللا قاتارى ءبىر توپ انشىلەر اقىن سوزدەرىنە جازىلعان اندەردى شىرقادى. اقىننىڭ نەمەرەلەرى «ءبىر اۋىز ءسوزىم - مىڭ ءدىلدا» كىتابىنان ۇزىندىلەردى جاتقا وقىدى.