«قازاقستاننىڭ تۇرعىن ءۇي قۇرىلىس جيناق بانكى» دەگەن بار. اتى جاقسى، ناسيحاتى دا جاقسى. ءبىراق  زاڭدى بەلشەسىنەن باسىپ، مەملەكەتتىك ءتىلدى مەنسىنبەي وتىر.

قازاقستاننىڭ ەڭ وزەكتى ماسەلەسى باسپانا ماسەلەسى ەكەنى جاسىرىن ەمەس. اۋدان، قالالاردا تۇرعىن ءۇي كەزەگىنە مىڭداعان ادامدار تۇرعان. جاقىندا عانا الەۋمەتتىك جەلىدە #ۇلىدالاكۆارتيرانتى اتتى حەشتەگ تانىمال بولىپ كەتىپ، ءۇي جالداپ تۇراتىن جۇرتتىڭ قاراسى كوپتىگى ءبىلىنىپ ەدى. اقشاسى كوپتىگىنەن جالدامايدى عوي. باسپاناسى جوقتىعىنان.

سونداي تولەم قابىلەتى بار باسپاناسى جوق جاندارعا، جاستارعا ارنالىپ وسى تاقىرىپتاعى بانك مەملەكەت تاراپىنان قۇرىلعان. ياعني،قۇرىلعانىنا 14 جىل بولعان بانك شەتەلدەن دەندەپ كىرگەن بانك ەمەس كاپيتالى 100 پايىز مەملەكەتكە تيەسىلى قازاقتىڭ بانكى.

بانكتىڭ جارناماسىن نەگە «جاساپ» وتىرمىن. قاراڭىز، مىناۋ بانك سايتىنىڭ باس بەتى. وندا اقپاراتتار ورنالاسادى. ءۇش ءتىل دە ورنالاسقان(قىزىلمەن سىزىلىپ تۇر). تۇسىنىكتى. وسىندا ينتەرنەت-بانكينگ دەگەن بار. ول بانكتىڭ ءاربىر تۇتىنۋشىسىنا ەڭ قاجەتتىسى. بانكتىڭ كەز-كەلگەن سالىمشىسى، زاەم الۋشىسى وسى جەكە كابينەتتەن جيناقتاعى اكتيۆتەرىن باقىلايدى. تولىقتىرادى. تۇتىنۋشىلار سايتتىڭ باس بەتىن اقتارىپ وتىرماۋى مۇمكىن، ءبىراق جەكە كابينەتتە تاپسىرىستى دا بەرەسىز، ءۇي الۋدىڭ مۇمكىندىگىن دە ەسەپتەيسىز. ياعني اقپاراتتىڭ كەرەكتىسى سوندا. ءبىراق وندا بانك نەگە ەكەنىن قازاق ءتىلىن قوسپاعان... تەك جالعىز ءتىل – ورىس ءتىلى. قالاساڭ دا سول ءتىلدى قولداناسىڭ. قالاماساڭ دا.

بانكتىڭ سايتى جاڭا اشىلعان سايت ەمەس. ءالى تولىقتىرىلمادى دەپ قۇتىلاتىنداي. بۇل نەنى تۇسىندىرەدى؟ بانكتىڭ باسشىلارى ءتۇرلى تۇرعىن ءۇي باعدارلامالارىنان قازاقتاردىڭ، قازاق تىلدىلەردىڭ ماقرۇم قالعانىن قالاي ما الدە؟ سۇراقتىڭ جاۋابىن بانك بەرە جاتار. ءبىراق بىزگە كەرەگى اقتالعان «ساندالباي» جاۋاپ ەمەس. ناقتى ناتيجە!

اقان بەكتاس