قانات يسلام مەن نوربەرتو گونسالەس كەزدەسۋى اقش-تىڭ فلوريدا شتاتىنداعى بوكا راتون قالاسىندا ورنالاسقان «Boca raton resort & club»-تا ءوتتى. مايتالماندار WBO NABO جانە WBA Inter-Continental ۆاكانتتى تيتۋلى ءۇشىن تالاستى. وسى كەشتە جانقوش تۇراروۆ 21ء-ىنشى جەڭىسىنە جەتتى.
بۇل قانات يسلامنىڭ اقش-تاعى ءتورتىنشى كەزدەسۋى. شارشى الاڭعا «ءدۇر قامشى» انىمەن كوتەرىلگەن قانات يسلامنىڭ كيىمى دە ەرەكشە بەزەندىرىلگەن.
32 جاستاعى وتانداسىمىز قانات يسلام كاسىپقوي بوكسقا 2012 جىلى اۋىسىپ، سول ۋاقىتتان بەرى ەشكىمگە دەس بەرگەن جوق. ول ءوزى وتكىزگەن 22 كەزدەسۋدىڭ بارلىعىندا جەڭىسكە جەتتى. 20 رەت قارسىلاسىن نوكاۋتقا ءتۇسىردى. قانات يسلام WBO Intercontinental جانە WBA Fedelatin چەمپيوندىق اتاقتارىنا يە.
نوربەرتو گونسالەس بۇگىنگە دەيىن 31 كەزدەسۋ وتكىزىپ، 23-ىندە جەڭىسكە جەتكەن: 13 جەكپە-جەگىن نوكاۋتپەن جەڭىپ، 8 كەزدەسۋىندە جەڭىلىس تاپقان. نوربەرتو گونسالەستىڭ لاقاپ اتى – ءازازىل! ول ءوز سالماعى بويىنشا مەكسيكالىق بوكسشىلاردىڭ ۇزدىك تورتتىگىندە.
12 راۋندقا سوزىلعان كەزدەسۋدىڭ العاشقى راۋندىنان-اق قانات باسىم قوزعالىستا بولدى. كوپ سوققى جىبەرسە دە قارسىلاسى دا وسال ەمەس ەكەنىن كورسەتتى. بەسىنشى راۋندتا قاناتتىڭ بۇرىشقا قاماعان سوققىلارىنان گونسالەستىڭ قاباعى جارىلىپ، بەتىن قان جۋىپ كەتتى. 9-ىنشى راۋندتا گونسالەس ءوزىنىڭ شارشاعانىن انىق كورسەتتى. تەك قورعانىسقا كوشكەن ول قاناتقا قايتا-قايتا جابىسىپ الىپ جاتتى. جاراقات السا دا جەكپە-جەكتەن باس تارتقان جوق. جەكپە-جەك باسىنان باستاپ قاناتتىڭ باسىمدىعىندا بولدى دەۋگە بولادى. 24ء-ىنشى كەزدەسۋىندە قانات ۇپاي سانىمەن جەڭىسكە جەتتى. جەڭىس سوزىندە جەرلەسىمىز بوكسسۇيەر قاۋىمدى EXPO كورمەسىنە شاقىردى.
ءاربىر جەكپە-جەگىن جاستار اسىعا كۇتەتىن قانات يسلام سوڭعى رەت اقپان ايىندا امەريكانىڭ دەلاۆەر شتاتى ۋيلمينگتون قالاسىندا برازيليالىق بوكسشى روبسون اسسيسپەن جەكپە-جەك جاساعان بولاتىن. ويىن باستالا سالا جەرلەسىمىز قارسىلاسىن ءبىر مينۋتقا جەتپەس ۋاقىتتا-اق نوكاۋتقا جىبەرگەن ەدى. جەرلەسىمىز 22ء-ىنشى كەزدەسۋىن الماتىدا وتكىزگەن بولاتىن. 2016 جىلدىڭ ايتۋلى وقيعالارىنىڭ ءبىرى رەتىندە ەستە قالعان، 29 قازان «الماتى ارەنادا» وتكەن باسەكەدە قانات يسلام قارسىلاسى پاتريك اللوتەيدى ۇپاي سانىمەن جەڭدى. وتكەن جىلدىڭ ەڭ ماڭىزدى سپورتتىق وقيعاسىندا قاناتتان بولەك، جانقوش تۇراروۆ تا باسەكەلەسى ايساك اريەنى (گانا) 4 راۋندتا جايراتىپ سالعان ەدى.
ايتا كەتسەك، بىرنەشە كۇن بۇرىن عانا حالىقارالىق بوكس قاۋىمداستىعىنىڭ (IBF) جاڭارعان قۇرلىقتىق رەيتينگىسىندە وتانداسىمىز كوش باسىنا شىقتى.
Qazaq بيىل 9 قىركۇيەكتە استانادا جەكپە-جەك وتكىزەدى دەپ جوسپارلانعان. بەلگىلى بولعانداي وعان قىزىعۋشىلىق تانىتىپ، «قۇدا» ءتۇسىپ جاتقان پروموۋتەرلەر كوپ. مايك تايسوننىڭ جاتتىقتىرۋشىسى بولعان ستەيسي ماككينلي دە ونىڭ جاتتىعۋىن باقىلىپ جۇرگەن كورىنەدى. وسى جەكپە-جەك بارىسىندا قانات يسلاممەن ءتۇرلى كەلىسىم شارتتار جاسالعانى دا حابارلادى.
اتالعان كەزدەسۋگە مەسەنات باۋىرجان وسپانوۆ پەن الماتى اكىمى باۋىرجان بايبەك قولداۋ جاساسا، «قازاقستان» مەن «Kazsport» تەلەارنالارى قانات يسلام (23-0، 19كو) مەن نوربەرتو گونسالەستىڭ (23-8، 13كو) جەكپە-جەگىن تىكەلەي ەفيردە كورسەتتى.
