الماتىدا پاتەر توناپ جۇرگەن  ءبىر توپ ادام ۇستالدى، - دەپ حابارلايدى Tengrinews.kz. ولار شىعىس قازاقستان وبلىسىنىڭ تۋمالارى. الاتاۋ اۋداندىق ءىىب جەدەل ۋاكىلدەرى قالالىق ءىىد كريمينالدىق پوليسيا باسقارماسىنداعى قىزمەتكەرلەرمەن بىرىگە وتىرىپ، الماتىدا پاتەر توناپ جۇرگەن ءبىر توپ ادامدى ۇستادى.

"سوڭعى ءۇش ايدا الاتاۋ اۋدانىنداعى پاتەرلەر مەن ۇيلەر تونالعان. بارلىق جاعدايدا قىلمىسكەرلەردىڭ ارەكەتى ۇقساس بولعان: ولار تەرەزە ارقىلى ۇيگە كىرىپ، قۇندى زاتتار مەن اقشانى ۇرلاپ جۇرگەن"، - دەدى پوليسياداعىلار. 23-28 جاس ارالىعىنداعى كۇدىكتىلەر جەدەل-ىزدەستىرۋ شارالارى بارىسىندا الماتى ورتالىعىندا جالدامالى پاتەرلەردىڭ بىرىندە ۇستالدى.

ولار سول جاقتا تۇرىپ جاتقان. "ۇستالعانداردىڭ باسىم بولىگى شىعىس قازاقستان وبلىسىنىڭ ءۇرجار اۋدانىنان. قازىرگى ۋاقىتتا ولاردىڭ 30 دەرەككە قاتىسى بار ەكەنى راستالدى. كۇدىكتىلەر كىناسىن مويىنداپ وتىر. ق ر قىلمىستىق كودەكسىنىڭ 188-بابىنىڭ 2-بولىگى بويىنشا سوتقا دەيىنگى تەرگەۋ باستالدى"، - دەدى الماتى قالالىق ءىىد كريمينالدىق پوليسيا باسقارماسىنىڭ باسشىسى جانبولات زيادين. قازىرگى ۋاقىتتا پوليسيا ولاردىڭ الماتى قالاسىندا بولعان وسىنداي قىلمىستارعا قاتىسى بار-جوعىن انىقتاپ جاتىر.