اتىراۋ وبلىسىنىڭ قۇرمانعازى اۋداندىق سوتىنا تالاپ ارىز بەرۋشى د. ەسىمدى ازامات مەكتەپ باسشىلىعىنىڭ قىزىنا ساباققا ورامال – كيمەشەك كيىپ كەلۋگە رۇقسات ەتپەگەندىكتەن، وقۋشى ساباقتان قالعانىن مالىمدەدى، دەپ حابارلايدى قامشى اقپاراتتىق اگەنتتىگى baq.kz-كە سىلتەمە جاساي وتىرىپ.

ارىزدا د. قىزىن ءداستۇرلى ءدىني مادەنيەتكە تاربيەلەيتىنىن، جاس كەزىنەن كيمەشەك كيۋگە داعدىلاندىرىپ جۇرگەنىن جازعان. سوتتا انىقتالعانداي، 2016 جىلدىڭ قىركۇيەك ايىنىڭ باسىندا مەكتەپ اكىمشىلىگى تالاپ قويۋشىعا ءبىلىم جانە عىلىم مينيسترلىگىنىڭ بۇيرىعىنا سايكەس مىندەتتى مەكتەپ كيىمى ۇلگىسى ساقتالۋى ءتيىس ەكەنىن ەسكەرتىپ، قىزدى مۇنداي كيىممەن وقۋعا قابىلداۋدان باس تارتۋ تۋرالى جازباشا حات تابىستاعان. ناۋرىز ايىندا اتا-انا قىزىن وقۋعا قايتىپ اكەلگىسى كەلەتىنىن حابارلاعانىمەن، ايتقانىن ورىنداماعان. سونداي-اق، اتا-انا اۋدان اكىمى جانىنداعى كامەلەتكە تولماعانداردىڭ ءىسى جونىندەگى كوميسسيا وتىرىسىنا بارۋدان باس تارتقان.

«اتالعان ءىستى قاراعان سۋديا ءبىلىم جانە عىلىم مينيسترلىگىنىڭ كيىم ۇلگىسىن ساقتاۋ تۋرالى تالابى زايىرلىلىققا،تەپە-تەڭدىككە جاۋاپ بەرەتىنىن، ەلىمىزدىڭ مەملەكەتتىك قۇرىلىمىنىڭ پرينسيپىنە سايكەس كەلەتىنىن تۇسىندىرەدى. بۇل زاڭ نورمالارى بارلىق كونفەسسيا مەن ۇلت وكىلدەرى ءۇشىن ورتاق بولىپ تابىلادى، وقۋشىلاردىڭ ءدىني كوزقاراس بوستاندىعىنا قۇقىقتارىن شەكتەمەيدى. اتا-انالاردىڭ ءدىني بەتبۇرىسى تۇلعانىڭ وقۋى مەن دامۋى جولىندا كەدەرگى كەلتىرمەۋى ءتيىس»، - دەلىنگەن وبلىستىق سوت باسپا ءسوز قىزمەتىنىڭ حابارلاماسىندا.

وسىلايشا، سوت ەلىمىزدىڭ «ءبىلىم تۋرالى» زاڭىن باسشىلىققا الا وتىرىپ، اتا-انالار جانە باسقا دا زاڭدى تۇلعالار ءبىلىم بەرۋ مەكەمەسىنىڭ بەلگىلەنگەن ەرەجەلەرىن ورىنداۋعا مىندەتتى دەپ ساناعان.

ءبىلىم جانە عىلىم مينيسترلىگىنىڭ بۇيرىعىنا سايكەس، مەكتەپ كيىمى ۇلگىسىنە ءتۇرلى كونفەسسيالاردىڭ ءدىني كيىم ۇلگىسىنىڭ ەلەمەنتتەرىن قوسۋعا جول بەرىلمەيدى. دەرەككوزى وسىعان بايلانىستى سوت ازامات د.-نىڭ تالاپ ارىزىن قاناعاتتاندىرۋدان باس تارتقانىن حابارلايدى.