قازاقستاننىڭ حالىق ءارتىسى تۇڭعىشباي جامانقۇلوۆقا كەشە ۇكىم وقىلدى. سوت شەشىمىن ەستىگەننەن كەيىن تۇڭعىشباي جامانقۇلوۆ azattyq.org تىلشىسىنە ق ر پرەزيدەنتى نۇرسۇلتان نازاربايەۆقا وكپەلى ەكەنىن ايتتى. 

"ارنايى ۇندەۋ جاساعان پرەزيدەنتىمە ۇلكەن ءىنىسى رەتىندە وكپەلىمىن. اراشا تۇسپەگەنىنە وكپەلىمىن" دەدى تۇڭعىشباي جامانقۇلوۆ. 

ەستەرىڭىزگە سالا كەتەيىك،«قارجى جىمقىردى» دەپ تۇتقىندالعان تۇڭعىشباي جامانقۇلوۆتىڭ، قاماۋعا الىناردان بىرنەشە كۇن بۇرىن ۆيدەو مالىمدەمە ارقىلى ەلباسىنان اراشا سۇراعان.

ۆيدەودا اكتەر مادەنيەت ءمينيسترى ارىستانبەك مۇحامەديۇلىمەن باس ارازدىعىنىڭ بولعانىن، فيلمگە بولىنگەن قاراجاتتى «قازاق ەلى» سەريالىنا اۋدارىپ جىبەرگەنىن، تالعات جانىبەكوۆتىڭ شالىس باسىپ، ءمينيستردى ايىپتاپ اعات قىلىق جاساعانىن، ءوزىنىڭ ەڭلىك سىدىقوۆانى قورعاپ، جۋرناليسكە ۆيدەو سۇحبات بەرگەنىن، ارىستانبەك مۇحامەديۇلىمەن ءتۇسىنىسۋ ءۇشىن استانادا كەزدەسكەنىن، كەشىرىم سۇراعانىن مويىنداي وتىرىپ، ءبىراق مادەنيەت ءمينيسترىنىڭ مامىلەدەن باس تارتقانىن، «بالا-شاعاڭ قاڭعىرىپ قالادى» دەپ قوقان-لوققى كورسەتكەنىن، قيسىنسىز ايىپ تاعىپ، تالاپ قويعانىن ايتقان.
ايتا كەتەيىك، سوت پروكۋرور سۇراعانداي جازا تاعايىندادى. №2 مەدەۋ اۋداندىق سوتىندا پروكۋرور تۇڭعىشباي جامانقۇلوۆتى 7 جىل 6 ايعا سوتتاۋدى، ءبىراق قازاقستان تاۋەلسىزدىگىنىڭ 25 جىلدىعىنا وراي جاريالانعان راقىمشىلىق بويىنشا جازا مەرزىمىن 3 جىل 7 ايعا ازايتۋدى جانە جاسى جەتكەنىن ەسكەرىپ شارتتى جازا كەسۋدى سۇراعان ەدى.

شولۋشى: اسەم المۇحانبەت

،